Ibomma Ravi : ఐ బొమ్మ రవి కేసులో దిమ్మతిరిగే ట్విస్ట్

Ibomma Ravi : ఐబొమ్మ వెబ్‌సైట్ ద్వారా కోట్లాది రూపాయలు గడించిన రవి, కేవలం ఒక సాధారణ పైరేట్ మాత్రమే కాదని, అత్యంత తెలివైన క్రిమినల్ అని పోలీసుల విచారణలో తేలింది. 2007లోనే మహారాష్ట్రలో ఫోర్జరీ సంతకాలు, నకిలీ పత్రాలతో డ్రైవింగ్ లైసెన్స్ మరియు పాన్ కార్డులను సృష్టించి తన అసలు ఆనవాళ్లను దాచిపెట్టాడు. నేరం చేసే సమయంలో తన మిత్రులైన ప్రహ్లాద్, కాళీప్రసాద్ వంటి వారిని పావులుగా వాడుకుంటూ, తాను తెరవెనుక ఉండి కథ నడిపించాడు. 2019 నుంచి 2023 మధ్య కాలంలో సినిమాలను పైరసీ చేస్తూ ప్రకటనల ద్వారా భారీగా సంపాదించిన రవి, ఆదాయం తగ్గడంతో పోలీసులనే తప్పుదోవ పట్టించేలా ‘రివర్స్ అటాక్’ కి దిగడం అతని క్రిమినల్ తెలివితేటలకు అద్దం పడుతోంది.

Ibomma Ravi : ఐ బొమ్మ రవి కేసులో దిమ్మతిరిగే ట్విస్ట్

పోలీసుల దర్యాప్తు

సినీ పరిశ్రమ పెద్దలు ఫిర్యాదు చేసినప్పుడు, రవి ఏకంగా డూప్లికేట్ పోర్టల్‌ను వేదికగా చేసుకుని పోలీసులకు సవాల్ విసిరాడు. ఈ పైరసీ వెనుక సినీ ప్రముఖుల ప్రమేయం ఉందంటూ ఆరోపణలు చేసి దర్యాప్తును పక్కదారి పట్టించాలని చూశాడు. వీఆర్ ఇన్ఫోటెక్ పేరుతో వెబ్‌సైట్లను రిజిస్టర్ చేసిన రవి, పోలీసుల మెయిల్స్‌కు ఏమాత్రం బెదరకుండా ‘సాక్ష్యాధారాలు ఉంటే పంపండి’ అంటూ ఎదురుదాడికి దిగాడు. అయితే, సైబర్ క్రైమ్ పోలీసులు ఫోన్ నంబర్ల ఆధారంగా అతడు విదేశాల్లో ఉన్నట్లు గుర్తించారు. చివరకు రవి కోసం పని చేసే ఒక పోస్టర్ డిజైనర్ ఫోన్‌కు వచ్చిన మెసేజ్ ద్వారా అతడు ఫ్రాన్స్ నుంచి హైదరాబాద్ చేరుకున్నట్లు తెలుసుకున్న పోలీసులు, కూకట్‌పల్లిలోని అతని నివాసంలో మాటువేసి అరెస్ట్ చేశారు.

విచారణలో బుకాయింపులు – విస్తుపోయే నిజాలు

పోలీసు కస్టడీలో 12 రోజుల పాటు విచారించినా, రవి ఎక్కడా తడబడకుండా సమాధానాలు చెప్పడం అధికారులను ఆశ్చర్యపరిచింది. తన పాత మిత్రులను ఎదురుగా నిలబెట్టినా, వారిని తాను ఎప్పుడూ చూడలేదని నాటకమాడాడు. “నేను నడిపేది అసలు ఐబొమ్మ అని రుజువు ఉందా?” అంటూ పోలీసులనే ప్రశ్నించే స్థాయికి వెళ్లాడు. సైబర్ క్రైమ్ డీసీపీ అరవింద్‌ బాబు పర్యవేక్షణలో జరిగిన ఈ విచారణలో, పైరసీ నెట్‌వర్క్‌లో మరో ఇద్దరు కీలక వ్యక్తుల ప్రమేయం ఉన్నట్లు సమాచారం లభించింది. టెక్నాలజీని వాడుకుని సినిమా రంగాన్ని దెబ్బతీస్తున్న ఇటువంటి వ్యక్తుల వెనుక ఉన్న పూర్తి ముఠాను పట్టుకునేందుకు పోలీసులు ప్రస్తుతం ప్రయత్నిస్తున్నారు.