Banana | ఎర్ర అరటిపండు ఆరోగ్య రహస్యం .. గుండె నుంచి జీర్ణవ్యవస్థ వరకు అద్భుత ప్రయోజనాలు

Banana | సాధారణ పసుపు అరటిపండ్లతో పోలిస్తే ఎర్ర అరటిపండ్లు (Red Bananas) ఆరోగ్య పరంగా మరింత శక్తివంతమని పోషకాహార నిపుణులు చెబుతున్నారు. ఇవి కేవలం రుచికే కాకుండా, విటమిన్లు, ఖనిజాలు, ఫైబర్, యాంటీఆక్సిడెంట్లు పుష్కలంగా ఉండటం వల్ల శరీరానికి అనేక లాభాలు అందిస్తాయి.

జీర్ణవ్యవస్థకు మేలు

ఎర్ర అరటిపండ్లలో ఫైబర్ అధికంగా ఉంటుంది. ఇది జీర్ణక్రియను మెరుగుపరుస్తూ, మలబద్ధకం వంటి సమస్యల నుండి ఉపశమనం కలిగిస్తుంది. రోజూ ఒక ఎర్ర అరటిపండు తినడం ద్వారా జీర్ణవ్యవస్థ సమతుల్యంగా ఉంటుంది.

గుండె ఆరోగ్యానికి తోడు

ఈ పండ్లలో లభించే పొటాషియం రక్తపోటును నియంత్రించడంలో కీలక పాత్ర పోషిస్తుంది. ఇది సోడియం స్థాయిలను సమతుల్యం చేసి, గుండె స్పందన రేటును సరిగా ఉంచుతుంది. ఫైబర్ మరియు యాంటీఆక్సిడెంట్లు కలగలిసి కొలెస్ట్రాల్ స్థాయిలను తగ్గించి, గుండెజబ్బులు, స్ట్రోక్ వంటి సమస్యల ప్రమాదాన్ని తగ్గిస్తాయి.

చక్కెర స్థాయిల నియంత్రణ

ఎర్ర అరటిపండు సహజ చక్కెరతో పాటు ఇన్సులిన్ సెన్సిటివిటీని మెరుగుపరుస్తుంది. భోజనం తర్వాత రక్తంలో చక్కెర స్థాయిలను స్థిరంగా ఉంచడంలో ఇది సహాయపడుతుంది. డయాబెటిస్ ఉన్నవారికి ఇది ఆరోగ్యకరమైన ఎంపికగా భావిస్తున్నారు.

బరువు తగ్గాలనుకునే వారికి మంచిది

ఎర్ర అరటిపండ్లలో కేలరీలు తక్కువగా ఉండటంతో బరువు తగ్గాలనుకునే వారికి ఇది ఉత్తమ ఆహారం. ఒక పండు తిన్న వెంటనే కడుపు నిండిన భావన కలిగిస్తుంది. దీంతో అనవసరంగా ఎక్కువగా తినే అలవాటు తగ్గుతుంది.