Hantavirus : హంటా వైరస్ హడలెత్తిస్తోంది.. ఈ లక్షణాలు కనిపిస్తే వెంటనే టెస్ట్ చేయించుకోండి!
Hantavirus : ప్రపంచాన్ని వణికించిన కరోనా మహమ్మారి జ్ఞాపకాలు ఇంకా మర్చిపోకముందే ఇప్పుడు మరో వైరస్ ప్రపంచవ్యాప్తంగా ఆందోళన కలిగిస్తోంది. “హంటా వైరస్” పేరుతో వెలుగులోకి వస్తున్న ఈ ప్రాణాంతక వైరస్‌పై ప్రపంచ ఆరోగ్య సంస్థ (WHO) అప్రమత్తమైంది. తాజాగా దక్షిణ అట్లాంటిక్ ప్రాంతంలో ప్రయాణిస్తున్న ఒక క్రూయిజ్ నౌకలో హంటా వైరస్ కేసులు బయటపడటంతో అంతర్జాతీయంగా కలకలం రేగింది. ఈ ఘటనలో ముగ్గురు ప్రయాణికులు మరణించగా, మరికొందరు చికిత్స పొందుతున్నారు.నివేదికల ప్రకారం.. క్రూయిజ్ నౌకలో మొత్తం ఎనిమిది మందికి హంటా వైరస్ సోకినట్లు గుర్తించారు. వైరస్ సోకిన వారిలో కొందరికి తీవ్రమైన జ్వరం, శ్వాస తీసుకోవడంలో ఇబ్బందులు, కండరాల నొప్పులు వంటి లక్షణాలు కనిపించాయి. పరిస్థితి విషమించడంతో ముగ్గురు ప్రాణాలు కోల్పోయారు. ప్రస్తుతం ఆ నౌకను స్పెయిన్‌కు చెందిన కానరీ దీవుల్లో నిలిపివేసి, బాధితులను ఐసోలేషన్‌లో ఉంచి చికిత్స అందిస్తున్నారు.
Hantavirus : హంటా వైరస్ హడలెత్తిస్తోంది.. ఈ లక్షణాలు కనిపిస్తే వెంటనే టెస్ట్ చేయించుకోండి!
హంటా వైరస్ అంటే ఏమిటి అనే ప్రశ్న ఇప్పుడు చాలామందిలో ఉత్పన్నమవుతోంది. ఆరోగ్య నిపుణుల ప్రకారం.. ఈ వైరస్ ప్రధానంగా ఎలుకలు వంటి రోడెంట్ల ద్వారా వ్యాపిస్తుంది. ఎలుకల మూత్రం, మలం లేదా లాలాజలంతో కలుషితమైన ప్రాంతాల్లో మనుషులు ఉండడం వల్ల వైరస్ సోకే అవకాశం ఉంటుంది. ముఖ్యంగా పరిశుభ్రత లేని ప్రాంతాలు, పాత గోదాములు, మూసివేసిన గదులు, చెత్త ఎక్కువగా ఉండే ప్రదేశాల్లో ప్రమాదం అధికంగా ఉంటుందని వైద్యులు హెచ్చరిస్తున్నారు.
హంటా వైరస్ లక్షణాలు ప్రారంభంలో సాధారణ ఫ్లూ మాదిరిగానే కనిపిస్తాయి. జ్వరం, అలసట, తలనొప్పి, కండరాల నొప్పులు మొదటి దశలో కనిపించే ప్రధాన లక్షణాలు. ఆ తరువాత పరిస్థితి తీవ్రమైతే శ్వాస తీసుకోవడంలో ఇబ్బంది, ఛాతిలో నొప్పి, ఊపిరితిత్తుల సమస్యలు, కడుపు నొప్పి, వాంతులు వంటి సమస్యలు ఎదురవుతాయి. కొంతమందిలో మూత్రపిండాలపై కూడా ప్రభావం పడే అవకాశం ఉందని నిపుణులు చెబుతున్నారు.
వైద్యుల హెచ్చరికల ప్రకారం.. హంటా వైరస్‌ను నిర్లక్ష్యం చేస్తే ప్రాణాపాయం తప్పదని అంటున్నారు. ఈ వైరస్ మరణాల రేటు కూడా ఎక్కువగా ఉండటంతో లక్షణాలు కనిపించిన వెంటనే వైద్యులను సంప్రదించడం అత్యంత అవసరమని సూచిస్తున్నారు. ప్రస్తుతం దీనికి ప్రత్యేకమైన టీకా లేదా ఖచ్చితమైన యాంటీవైరల్ మందులు అందుబాటులో లేవని ప్రపంచ ఆరోగ్య సంస్థ వెల్లడించింది.
అయితే ఈ వైరస్ కరోనా మాదిరిగా ప్రపంచవ్యాప్త మహమ్మారిగా మారే అవకాశం తక్కువేనని WHO స్పష్టం చేసింది. WHO డైరెక్టర్ జనరల్ డాక్టర్ టెడ్రోస్ అధనామ్ ఘెబ్రేయెసస్ మాట్లాడుతూ.. ప్రజలు అనవసర భయాందోళనలకు గురికావాల్సిన అవసరం లేదన్నారు. ప్రస్తుతం సాధారణ ప్రజలకు హంటా వైరస్ ముప్పు చాలా తక్కువగా ఉందని తెలిపారు.
ఇక హంటా వైరస్ వ్యాప్తికి వాతావరణ మార్పులు కూడా కారణమవుతున్నాయని నిపుణులు చెబుతున్నారు. భూతాపం పెరగడం, ఉష్ణోగ్రతలు అధికమవడం వల్ల ఎలుకలు మానవ నివాస ప్రాంతాల వైపు వస్తున్నాయని, దీంతో వైరస్ వ్యాప్తి ప్రమాదం పెరుగుతోందని హెచ్చరిస్తున్నారు.
హంటా వైరస్ నుంచి రక్షణ పొందేందుకు కొన్ని జాగ్రత్తలు తప్పనిసరిగా పాటించాలని ఆరోగ్య నిపుణులు సూచిస్తున్నారు. ఇల్లు, పరిసర ప్రాంతాలను పరిశుభ్రంగా ఉంచడం అత్యంత ముఖ్యం. ఎలుకలు సంచరించే ప్రాంతాల్లో మాస్క్, గ్లౌజ్‌లు ఉపయోగించడం మంచిదని సూచిస్తున్నారు. పాత గదులు లేదా గోదాములు శుభ్రం చేసే సమయంలో జాగ్రత్తలు తీసుకోవాలి. ఎలుకల మలం లేదా మూత్రాన్ని నేరుగా తాకకుండా ఉండాలి.
అలాగే జ్వరం, శ్వాస సమస్యలు, తీవ్రమైన అలసట వంటి లక్షణాలు కనిపిస్తే వెంటనే వైద్య పరీక్షలు చేయించుకోవాలని నిపుణులు చెబుతున్నారు. ప్రారంభ దశలోనే చికిత్స తీసుకుంటే ప్రాణాపాయం తగ్గే అవకాశం ఉందని వైద్యులు సూచిస్తున్నారు.
ప్రస్తుతం ప్రపంచవ్యాప్తంగా హంటా వైరస్‌పై నిఘా పెంచిన ఆరోగ్య సంస్థలు.. ప్రజలు అప్రమత్తంగా ఉండాలని సూచిస్తున్నాయి. కరోనా తరహా పరిస్థితులు లేకపోయినా, పరిశుభ్రత పాటించడం మరియు లక్షణాలపై అవగాహన కలిగి ఉండడం చాలా అవసరమని నిపుణులు చెబుతున్నారు.