Agadha Movie Review : అగధ మూవీ రివ్యూ అండ్ రేటింగ్‌..!

Agadha Movie Review : హారర్‌ కథలకు మిస్టరీ, థ్రిల్‌, దైవిక అంశాలను జోడిస్తే ప్రేక్షకుల్లో ఆసక్తి పెరగడం సహజం. అయితే అలాంటి కథను తెరపై ఆసక్తికరంగా చెప్పడం అంత సులభం కాదు. తాజాగా ప్రముఖ నిర్మాత, దర్శకుడు ఎంఎస్‌ రాజు మరోసారి మెగాఫోన్‌ పట్టుకుని రూపొందించిన చిత్రం ‘అగధ’. కామాక్షి భాస్కర్ల ప్రధాన పాత్రలో నటించిన ఈ సినిమా మిస్టరీ హారర్‌ థ్రిల్లర్‌గా ప్రేక్షకుల ముందుకు వచ్చింది. మరి ఈ సినిమా ఎలా ఉంది? ఎంఎస్‌ రాజు దర్శకుడిగా మరోసారి మెప్పించారా? కామాక్షి భాస్కర్ల తన నటనతో ఆకట్టుకుందా? అనే విషయాలను ఈ రివ్యూలో చూద్దాం.

Agadha Movie Review అగధ మూవీ నేపథ్యం, నటీనటులు

ఒకప్పుడు వరుస విజయవంతమైన చిత్రాలను నిర్మించి తనకంటూ ప్రత్యేక గుర్తింపు తెచ్చుకున్న నిర్మాత ఎంఎస్‌ రాజు.. ఇటీవలి కాలంలో నిర్మాణం కంటే దర్శకత్వంపై ఎక్కువగా దృష్టి పెడుతున్నారు. తనలోని దర్శకుడిని మరోసారి ప్రేక్షకులకు పరిచయం చేసే ప్రయత్నంలో భాగంగా ఇప్పుడు ‘అగధ’ చిత్రాన్ని తెరకెక్కించారు. మిస్టరీ, హారర్‌, థ్రిల్లర్‌ అంశాలతో పాటు దైవిక నేపథ్యాన్ని కూడా కథలో కలిపి ఈ సినిమాను రూపొందించారు. ఇందులో కామాక్షి భాస్కర్ల మహాదేవి అనే కీలక పాత్రలో నటించారు. శ్రావణ్‌ రెడ్డి, షిజ్జు, ఉల్కా గుప్తా, వనితా విజయ్‌ కుమార్‌, భానుచందర్‌, జోవికా విజయ్‌ కుమార్‌, వైవా రఘు, గంగవ్వ తదితరులు ముఖ్య పాత్రల్లో కనిపించారు.శ్రీ ఆదివరాహ ప్రొడక్షన్స్ బ్యానర్‌పై అజయ్ కేఆర్ సమర్పణలో కాశీ విశాలాక్షి బలుసు ఈ చిత్రాన్ని నిర్మించారు. సినిమా ఆగస్ట్‌ 14, శుక్రవారం ప్రేక్షకుల ముందుకు వచ్చింది. మరి ఈ మిస్టరీ హారర్‌ కథ ప్రేక్షకులను ఎంతవరకు భయపెట్టింది? థ్రిల్‌ చేసింది? తెలుసుకుందాం.

Agadha Movie Review అగధ మూవీ కథ ఏంటి?

ఆంధ్రప్రదేశ్‌, ఒడిశా సరిహద్దులో ఉన్న శుక్లా అనే గ్రామంలోని ఓ దేవత ఆలయం వద్దకు మహాదేవి (కామాక్షి భాస్కర్ల) వస్తుంది. చిన్నతనంలోనే అమ్మవారి పిలుపుతో అక్కడికి వచ్చిన ఆమెకు ఆ ప్రాంతంతో, అక్కడి అతీత శక్తులతో ఒక ప్రత్యేకమైన అనుబంధం ఉంటుంది. దెయ్యాలు, భూతాలు, ఆత్మలకు సంబంధించిన అనేక విషయాలను ఎదుర్కొంటూ వాటి నుంచి విముక్తి కల్పించే ప్రయత్నం చేస్తుంటుంది.మహాదేవి గురించి తెలుసుకోవడానికి ఒక రచయిత కూడా అక్కడికి వస్తాడు. మరోవైపు అదే అటవీ ప్రాంతంలో ఉన్న ఓ మిస్టరీ గుహ వెనుక ఉన్న రహస్యాన్ని తెలుసుకోవాలని మహాదేవి బాబాయ్‌ భానుచందర్‌ కుమార్తె మహిమ (ఉల్కా గుప్తా) ప్రయత్నిస్తుంది. తన ప్రియుడు సింహా (శ్రావణ్‌ రెడ్డి), స్నేహితుడు వైవా రఘుతో కలిసి ఆమె ఆ అడవిలోకి వెళ్తుంది.

అక్కడ గుహలోకి వెళ్లిన సింహా అనూహ్యంగా కనిపించకుండా పోతాడు. ఆ తర్వాత గుహ నుంచి బయటకు వచ్చిన వైవా రఘుకు సంబంధించిన భయంకరమైన ఘటన మహిమను తీవ్రంగా కలచివేస్తుంది. అతని తల ఎగిరిపడటాన్ని చూసిన మహిమ షాక్‌కు గురవుతుంది. అప్పటికే గర్భిణిగా ఉన్న ఆమె అక్కడి నుంచి ఎలాగోలా తప్పించుకుని ఇంటికి చేరుకుంటుంది.కానీ ఆ సంఘటన తర్వాత మహిమ పూర్తిగా మారిపోతుంది. కొంతకాలానికి ఆమె ఆత్మహత్య చేసుకుంటుంది. అయితే ఆమె కథ అక్కడితో ముగియదు. మహిమ ఆత్మ అదే ఇంట్లో తిరుగుతూనే ఉంటుంది. ఇంట్లో వరుసగా వింత సంఘటనలు చోటుచేసుకుంటాయి. ఒక్కొక్కరుగా కుటుంబ సభ్యులు మరణించడం మొదలవుతుంది.మహిమ మరణం గురించి తెలుసుకున్న మహాదేవి సాలూరు గ్రామానికి చేరుకుంటుంది. అక్కడ తన బాబాయ్‌ మరో కుమార్తె హరిణి (జోవికా విజయ్‌ కుమార్‌) వింతగా ప్రవర్తించడం ఆమె గమనిస్తుంది. ఈ కుటుంబాన్ని ఏదో తెలియని శక్తి వెంటాడుతోందని మహాదేవికి అర్థమవుతుంది.

Agadha Movie Review ఆ శక్తి పేరు అగధ.

అసలు అగధ ఎవరు? దాని వెనుక ఉన్న రహస్యం ఏమిటి? సింహా ఎలా చనిపోయాడు? గుహలో అసలు ఏం జరిగింది? మరణించిన సింహా తిరిగి అక్కడికి ఎలా వచ్చాడు? మహర్షి ద్వారా గతంలోకి వెళ్లిన మహాదేవికి అగధ గురించి ఎలాంటి నిజాలు తెలుస్తాయి? ఆ అతీత శక్తి నుంచి తన కుటుంబాన్ని మహాదేవి ఎలా కాపాడుకుంది? ఈ క్రమంలో చోటుచేసుకునే భయానక, ఆసక్తికర సంఘటనలే ‘అగధ’ కథ.

అగధ మూవీ ఎలా ఉంది? – విశ్లేషణ

మిస్టరీ, హారర్‌, థ్రిల్లర్‌ కథలతో సినిమాలు తరచూ వస్తుంటాయి. అయితే ఇటీవలి కాలంలో హారర్‌ సినిమాలు ఎక్కువగా కామెడీని ప్రధాన అంశంగా చేసుకుంటున్నాయి. భయపెట్టాల్సిన సన్నివేశాల్లోనూ కామెడీని జోడించి ప్రేక్షకులను ఎంటర్‌టైన్‌ చేయడం సాధారణమైంది. కానీ ‘అగధ’ మాత్రం ఆ దారిలో వెళ్లలేదు. ఎంఎస్‌ రాజు ఈ సినిమాను సీరియస్‌ హారర్‌ థ్రిల్లర్‌గా రూపొందించే ప్రయత్నం చేశారు.ఒక మిస్టరీని కేంద్రంగా తీసుకుని దానికి హారర్‌, థ్రిల్లర్‌ అంశాలను జోడించడంతో పాటు దైవిక నేపథ్యాన్ని కూడా కథలోకి తీసుకొచ్చారు. సినిమాలోని ప్రధాన నెగెటివ్‌ ఫోర్స్‌ చనిపోయిన ఆత్మలను తనలో కలుపుకుంటూ మరింత శక్తిమంతంగా మారుతుంది. తనను పాతాళంలోకి నెట్టిన దేవతలపై ప్రతీకారం తీర్చుకోవడంతో పాటు ఈ విశ్వాన్ని తానే శాసించాలనే ఉద్దేశంతో ముందుకు సాగుతుంది. ఆ ప్రతికూల శక్తే అగధ.దాన్ని మహాదేవి ఎలా ఎదుర్కొంది? ఆ శక్తి నుంచి తన కుటుంబాన్ని ఎలా రక్షించింది? అనేదే కథకు ప్రధాన బలం.సినిమా మొదటి నుంచే ప్రేక్షకుల్లో ఒక రకమైన ఆసక్తిని కలిగించేలా సాగుతుంది. తర్వాత ఏం జరుగుతుందనే ఉత్కంఠను కొనసాగించే ప్రయత్నం కనిపిస్తుంది. కథకు సంబంధించిన పూర్వాపరాలను ఒక్కసారిగా చెప్పకుండా, క్రమంగా వివరించుకుంటూ ప్రేక్షకులను కథలోకి తీసుకెళ్లిన విధానం బాగుంది.మహాదేవి తన ప్రయాణం గురించి చెప్పడం, తాను చిన్నతనంలో అమ్మవారి వద్దకు ఎలా వచ్చిందో వివరించడం, అసలు ఈ లోకంలో దెయ్యాలు, భూతాలు ఉన్నాయా? అనే ఆసక్తికరమైన ప్రశ్నతో కథను ప్రారంభించడం సినిమాకు మంచి ఆరంభాన్ని ఇస్తుంది.అసలు మహాదేవి ఎవరు? ఆమెకు ఆ అతీత శక్తులతో సంబంధం ఏమిటి? అనే ప్రశ్నలు మొదటి భాగంలో ఆసక్తిని పెంచుతాయి. అయితే ఆమె తనను పెంచిన బాబాయ్‌ ఇంటికి వెళ్లిన తర్వాత కథ అసలు మలుపు తీసుకుంటుంది.

అగధ శక్తి రంగప్రవేశం చేసిన తర్వాత సినిమా మరింత ఆసక్తికరంగా మారుతుంది. బాబాయ్‌ ఇంట్లో చోటుచేసుకునే వింత సంఘటనలు, హరిణి ప్రవర్తన వెనుక ఉన్న అసలు కారణం, చనిపోయిన మహిమ ఆత్మ అక్కడే తిరుగుతూ ఉండటం వంటి అంశాలు ప్రేక్షకుల్లో క్యూరియాసిటీని పెంచుతాయి.అదే సమయంలో ఈ విశ్వంలో ఉన్న అతీత శక్తులు, ఆత్మలు, భూతాల గురించి మహాదేవి వివరించే సన్నివేశాలు కూడా కథకు ఒక ప్రత్యేకమైన వాతావరణాన్ని తీసుకొస్తాయి. అగధ శక్తిని మహాదేవి ఎదుర్కొనే దగ్గర ఇంటర్వెల్‌ రావడం ఆసక్తిని పెంచుతుంది.

సెకండాఫ్‌లో అసలు భయానక రహస్యం

రెండో భాగంలో మహాదేవి, అగధ మధ్య పోరాటమే ప్రధానంగా సాగుతుంది. మహిమ అడవిలోకి వెళ్లిన తర్వాత ఏం జరిగింది? ఆమెతో పాటు వెళ్లిన సింహా, వైవా రఘుకు ఏం జరిగింది? అసలు ఆ మిస్టరీ గుహలో ఏ రహస్యం దాగి ఉంది? అనే విషయాలు క్రమంగా బయటకు వస్తాయి. అడవిలో జరిగిన సంఘటనలు, గుహలోని సన్నివేశాలు కొన్ని చోట్ల ఒళ్లు గగుర్పొడిచేలా ఉంటాయి. ముఖ్యంగా హారర్‌ వాతావరణాన్ని క్రియేట్‌ చేయడంలో కొన్ని సన్నివేశాలు బాగా పనిచేశాయి. అగధ శక్తిని మహాదేవి ఎదుర్కొనే సందర్భాల్లో కూడా కొన్ని సీన్లు గూస్‌బంప్స్‌ తెప్పిస్తాయి.క్లైమాక్స్‌ కూడా ఉత్కంఠను కొనసాగిస్తూ థ్రిల్లర్‌ మూడ్‌లోనే ముగుస్తుంది. ముఖ్యంగా అమ్మవారి నుంచి వచ్చే ట్విస్ట్‌ ఆసక్తికరంగా అనిపిస్తుంది.

అగధలో ప్లస్‌ పాయింట్లు, మైనస్‌ పాయింట్లు

ప్లస్‌ పాయింట్ల విషయానికి వస్తే, సినిమాలోని కొన్ని థ్రిల్లింగ్‌ ఎలిమెంట్లు బాగున్నాయి. బ్యాక్‌గ్రౌండ్‌ మ్యూజిక్‌ కొత్తగా అనిపిస్తూ కొన్ని సన్నివేశాలకు మంచి ఇంపాక్ట్‌ ఇచ్చింది. మహాదేవి పాత్రలో కామాక్షి భాస్కర్ల నటన సినిమాకు ప్రధాన ఆకర్షణగా నిలుస్తుంది. శ్రావణ్‌ రెడ్డి పాత్రలో వచ్చే ట్విస్ట్‌ ప్రేక్షకులను ఆశ్చర్యపరిచేలా ఉంటుంది. మిస్టరీ గుహలో జరిగే సన్నివేశాలు థ్రిల్‌ కలిగిస్తాయి. చెరకు తోటలో వచ్చే ఫైట్‌ కూడా ఆకట్టుకునేలా ఉంది. క్లైమాక్స్‌లో అమ్మవారి నుంచి వచ్చే ట్విస్ట్‌ మరో ప్రత్యేకతగా చెప్పొచ్చు. అడవిలో జరిగే పూజలు, బలి ఇచ్చే సన్నివేశాలు ఒకవైపు భయాన్ని కలిగిస్తూనే మరోవైపు థ్రిల్‌ను అందిస్తాయి. విజువల్‌గా సినిమా బాగుంది. ఆర్ట్‌ వర్క్‌ కూడా మెప్పిస్తుంది. సీజీ వర్క్‌ కూడా నాణ్యంగా ఉంది. నటీనటులంతా తమ పాత్రలకు న్యాయం చేశారు. మైనస్‌ పాయింట్ల విషయానికి వస్తే, హారర్‌ థ్రిల్లర్‌ సినిమాల నుంచి ప్రేక్షకులు ఆశించే స్థాయిలో హై మూమెంట్లు ఎక్కువగా లేవు. కొన్ని థ్రిల్లింగ్‌ సన్నివేశాలు ఉన్నప్పటికీ అవి సినిమా మొత్తాన్ని నడిపించేంత బలంగా అనిపించవు.చిన్న కథను ఎక్కువ సమయం తీసుకుని చెప్పిన భావన కొన్ని చోట్ల కలుగుతుంది. సినిమా రన్‌టైమ్‌లో ల్యాగ్‌ కనిపిస్తుంది. కొన్ని సన్నివేశాలు నెమ్మదిగా సాగుతాయి. కథలో వరుసగా ట్విస్టులు, టర్న్‌లు లేకపోవడంతో మధ్యలో కొన్ని చోట్ల సినిమా ఫ్లాట్‌గా అనిపిస్తుంది. కొన్ని సీన్లు వస్తున్నాయి, వెళ్లిపోతున్నాయి అన్న ఫీలింగ్‌ కలుగుతుంది. ఆర్‌ఆర్‌ కూడా కొన్ని సందర్భాల్లో సన్నివేశానికి కావాల్సినంత ఎలివేషన్‌ ఇవ్వలేకపోయింది. యాక్షన్‌ సన్నివేశాలు ఎక్కువగా లేవు. ఉన్నవాటిలో కూడా మరింత ఇంపాక్ట్‌ ఉండాల్సిందనే భావన కలుగుతుంది.ముఖ్యంగా కథకు సంబంధించిన ప్రారంభం, ముగింపు విషయంలో కొంత క్లారిటీ తగ్గినట్లు అనిపిస్తుంది. కొన్ని అంశాలు లాజిక్‌కు దూరంగా అనిపిస్తాయి. అసలు దర్శకుడు ఏం చెప్పాలనుకున్నారు అనే విషయంలో కొన్ని చోట్ల స్పష్టత లోపిస్తుంది.అయితే ఈ లోపాలను పక్కన పెడితే, హారర్‌, మిస్టరీ, థ్రిల్లర్‌ జానర్‌ను ఇష్టపడే వారికి సినిమా కొంతవరకు ఎంగేజ్‌ చేస్తుంది. ముఖ్యంగా సీరియస్‌ హారర్‌ సినిమాలను ఇష్టపడేవారికి ‘అగధ’ కొత్త అనుభూతిని అందించే ప్రయత్నం చేస్తుంది.

అగధలో నటీనటుల పెర్ఫార్మెన్స్ ఎలా ఉంది?

మహాదేవి పాత్రలో కామాక్షి భాస్కర్ల సినిమాకు ప్రధాన బలంగా నిలిచింది. ఆమె పాత్రలో పూర్తిగా లీనమై నటించింది. సినిమాను తన భుజాలపై మోస్తూ చాలా సెటిల్డ్‌ పెర్ఫార్మెన్స్‌ ఇచ్చింది. భయం, ఆందోళన, పోరాటం వంటి భావాలను తన నటనలో బాగా చూపించింది.మహిమ పాత్రలో ఉల్కా గుప్తా కూడా ఆకట్టుకుంది. ప్రమాదకర పరిస్థితుల్లో చిక్కుకున్న అమ్మాయిగా, తర్వాత తన జీవితంలో ఎదురయ్యే సంఘర్షణలను ఎదుర్కొనే ఆత్మగా ఆమె మంచి నటనను కనబరిచింది.సింహా పాత్రలో శ్రావణ్‌ రెడ్డి నెగెటివ్‌ షేడ్‌ ఉన్న పాత్రలో మెప్పించాడు. బోల్డ్‌గా కనిపిస్తూ పాత్రకు అవసరమైన తీవ్రతను తీసుకొచ్చాడు. ముఖ్యంగా అతని పాత్రలో వచ్చే ట్విస్ట్‌ ఆసక్తిని కలిగిస్తుంది.వైవా రఘు కొద్దిసేపే కనిపించినప్పటికీ తన పరిధిలో ఓకే అనిపించాడు. వనితా విజయ్‌ కుమార్‌ కూడా డిఫరెంట్‌ షేడ్‌ ఉన్న పాత్రలో కనిపించి ఆకట్టుకుంది. భానుచందర్‌ తన పాత్ర పరిధిలో మెప్పించారు.గంగవ్వ తనకు అలవాటైన శైలిలో ప్రేక్షకులను అలరిస్తుంది. మిగిలిన నటీనటులు కూడా తమ పాత్రలకు తగ్గట్టుగా నటించారు.

టెక్నికల్‌గా అగధ ఎలా ఉంది?

టెక్నికల్‌ విభాగంలో రాకేష్‌ వెంకటాపురం అందించిన సంగీతం బాగుంది. ముఖ్యంగా బ్యాక్‌గ్రౌండ్‌ స్కోర్‌ కొత్తగా అనిపిస్తుంది. అయితే కొన్ని సన్నివేశాలకు అవసరమైన స్థాయిలో ఆర్‌ఆర్‌ ఇంపాక్ట్‌ ఇవ్వలేకపోయింది. కొన్ని సీన్లు బీజీఎం కారణంగా మరింత ఎలివేట్‌ అయ్యే అవకాశం ఉన్నప్పటికీ అది పూర్తిగా సాధ్యపడలేదు. సౌండ్‌ డిజైన్‌ విషయంలో కూడా ఇంకా మెరుగైన పని చేయాల్సిన అవసరం కనిపిస్తుంది.నాని చమిడిశెట్టి అందించిన విజువల్స్‌ బాగున్నాయి. అడవి, గుహ, పూజా కార్యక్రమాలు, హారర్‌ నేపథ్యాన్ని కొత్తగా చూపించే ప్రయత్నం కనిపిస్తుంది. సినిమా విజువల్‌గా రిచ్‌గా అనిపించడంలో కెమెరా వర్క్‌ కీలక పాత్ర పోషించింది.జునైడ్‌ సిద్ధిఖీ ఎడిటింగ్‌ విషయంలో ఇంకాస్త షార్ప్‌గా పని చేయాల్సింది. కొన్ని సన్నివేశాలను మరింత క్రిస్ప్‌గా కట్‌ చేసి ఉంటే సినిమా వేగం పెరిగేది. ల్యాగ్‌ కూడా కొంతవరకు తగ్గేది.నిర్మాణ విలువలకు మాత్రం ఎలాంటి కొదవ లేదు. సినిమాలో పెట్టిన బడ్జెట్‌, నిర్మాణ నాణ్యత చాలా సన్నివేశాల్లో కనిపిస్తుంది. సినిమా రిచ్‌గా, గ్రాండియర్‌గా కనిపించేలా నిర్మాతలు జాగ్రత్తలు తీసుకున్నారు.దర్శకుడిగా ఎంఎస్‌ రాజు మాత్రం ఒక కొత్త తరహా కథను ఎంచుకున్నారు. కాన్సెప్ట్‌ పరంగా ఆసక్తికరమైన పాయింట్‌ను తీసుకున్నప్పటికీ, దాన్ని మరింత బలంగా రాసుకోవాల్సింది. కథలో కొన్ని చోట్ల హై మూమెంట్లు లేకపోవడం వల్ల సినిమా ఫ్లాట్‌గా అనిపిస్తుంది.అయినప్పటికీ పూర్తిగా బోరింగ్‌గా మాత్రం అనిపించదు. సినిమా ప్రేక్షకులను కథలోకి తీసుకెళ్లే ప్రయత్నం చేస్తుంది. కొన్ని థ్రిల్‌ మూమెంట్లు కూడా వాహ్‌ అనిపించేలా ఉన్నాయి. అయితే ప్రస్తుత ప్రేక్షకుల అంచనాలకు అవి సరిపోతాయా అంటే కొంత సందేహమే. దర్శకుడు ఊహించిన స్థాయిలో ‘అగధ’ పూర్తిస్థాయిలో ప్రభావం చూపలేదనే చెప్పాలి.

ఫైనల్‌గా ఎలా ఉంది?

‘అగధ’ పూర్తిగా కామెడీ హారర్‌ జానర్‌లో కాకుండా సీరియస్‌ మిస్టరీ, డివైన్‌ హారర్‌, థ్రిల్లర్‌ అంశాలతో తెరకెక్కిన సినిమా. కథలో కొన్ని కొత్త ఆలోచనలు ఉన్నాయి. కామాక్షి భాస్కర్ల నటన, కొన్ని గుహ సన్నివేశాలు, అగధ శక్తి, క్లైమాక్స్‌లో వచ్చే ట్విస్ట్‌, విజువల్స్‌ సినిమాకు ప్లస్‌గా నిలుస్తాయి.అదే సమయంలో ల్యాగ్‌, హై మూమెంట్లు తక్కువగా ఉండటం, కొన్ని చోట్ల కథనం ఫ్లాట్‌గా సాగడం, లాజిక్‌కు అందని అంశాలు, ఆర్‌ఆర్‌ ఇంపాక్ట్‌ తగ్గడం వంటి లోపాలు సినిమాను పూర్తిస్థాయిలో మెప్పించకుండా చేస్తాయి.అయితే డివైన్‌ హారర్‌, మిస్టరీ, థ్రిల్లర్‌ జానర్‌ను ఇష్టపడే ప్రేక్షకులకు ‘అగధ’ కొంతవరకు నచ్చే అవకాశం ఉంది. ముఖ్యంగా సీరియస్‌ హారర్‌ కథలను ఇష్టపడేవారికి ఇది ఒక కొత్త అనుభూతిని ఇవ్వొచ్చు. Agadha Movie Review ,అగధ మూవీ రివ్యూ, అగధ సినిమా, కామాక్షి భాస్కర్ల అగధ, ఎంఎస్ రాజు సినిమా, అగధ హారర్ థ్రిల్లర్ , అగధ మూవీ రివ్యూ, అగధ సినిమా రివ్యూ, అగధ మూవీ, కామాక్షి భాస్కర్ల, ఎంఎస్ రాజు అగధ, అగధ రేటింగ్ Agadha Movie Review, Agadha Review, Agadha Movie, Kamakshi Bhaskarla, MS Raju Agadha, Agadha Rating

అగధ రేటింగ్‌: 2.75/5