Pallaburusu Movie First Review : పళ్లబురుసు మూవీ ఫస్ట్ రివ్యూ..!

Pallaburusu Movie First Review : టాలీవుడ్‌లో కథకు, నేటివిటీకి ప్రాధాన్యత ఇచ్చే సినిమాలకు ప్రేక్షకుల నుంచి మంచి స్పందన లభిస్తోంది. ముఖ్యంగా తెలంగాణ పల్లె వాతావరణం, స్థానిక యాస, కుటుంబ బంధాలు, సహజమైన భావోద్వేగాలను తెరపై చూపించే చిత్రాలపై ఆసక్తి పెరుగుతోంది. ఈ నేపథ్యంలో అన్నపూర్ణ స్టూడియోస్‌తో కలిసి నిర్మాతలు ఆదిత్య పిట్టి, వివేక్ కృష్ణాణి నిర్మించిన సినిమా ‘పళ్లబురుసు’. అన్నపూర్ణ స్టూడియోస్, ఎపిక్ స్టూడియోస్ సమర్పిస్తున్న ఈ చిత్రానికి ఉదయ్ చౌహాన్ దర్శకత్వం వహించారు. ఈ సినిమాలో సుధాకర్ రెడ్డి, మురళీధర్ గౌడ్, గోమతి రెడ్డి, ప్రజ్వల్ యాద్మ, కిరణ్ మచా, వీ6 చంద్రవ్వ, ఆర్కే తదితరులు కీలక పాత్రల్లో నటించారు. వినోద్ బంగారి సినిమాటోగ్రఫీ అందించగా.. పవన్ సీహెచ్ సంగీతం సమకూర్చారు. సంజన అడుసుమిళ్లి ఎడిటర్‌గా, క్షితిజ్ జీవన్ రణధీర్ ప్రొడక్షన్ డిజైనర్‌గా, విష్ణు ప్రిజర్వర్ కొరియోగ్రాఫర్‌గా పనిచేశారు. సురేష్ గంగుల పాటలకు సాహిత్యం అందించారు.ఆగస్టు 14న ఈ సినిమా ప్రేక్షకుల ముందుకు రాబోతోంది. విడుదలకు ముందు సెన్సార్ ప్రక్రియను పూర్తి చేసుకున్న ఈ మూవీకి ఎలాంటి సర్టిఫికెట్ లభించింది? సినిమా నిడివి ఎంత? అసలు కథ ఎలా ఉండబోతోంది? అనే విషయాలపై ఆసక్తి నెలకొంది.

Pallaburusu Movie First Review : పళ్లబురుసు మూవీ ఫస్ట్ రివ్యూ..!

Pallaburusu Movie First Review తండ్రీకొడుకుల మధ్య మొదలైన చిన్న గొడవ.. కథను ఎటు తీసుకెళ్లింది?

‘పళ్లబురుసు’ కథ విషయానికి వస్తే.. స్టేషన్ మాస్టర్ పాత్రలో మురళీధర్ గౌడ్ కనిపిస్తారు. ఆయన తండ్రి పాత్రను సుధాకర్ రెడ్డి పోషించారు. తండ్రీకొడుకుల మధ్య ఓ చిన్న విషయంపై గొడవ మొదలవుతుంది. డెంటల్ డాక్టర్ సలహా మేరకు తనకు ఓ పళ్ల బురుసు అంటే టూత్ బ్రష్ కొనివ్వాలని తండ్రి తన కొడుకును అడుగుతాడు. అయితే కొడుకు ఆ విషయాన్ని పెద్దగా పట్టించుకోడు. చిన్నదిగా మొదలైన ఈ వ్యవహారం చివరకు అనూహ్య మలుపు తీసుకుంటుంది. కొడుకు తన మాట వినలేదనే కోపంతో తండ్రి ఏకంగా అతడిపైనే పోలీస్ స్టేషన్‌లో కేసు పెట్టే పరిస్థితి వస్తుంది. దీంతో తండ్రీకొడుకుల మధ్య విభేదాలు మరింత పెరుగుతాయి. కుటుంబంలో పరిస్థితులు మారడంతో ఆస్తుల పంపకాలు కూడా జరిగిపోతాయి.ఇంతలో కొడుకు, కూతురు వ్యవహరించే తీరుతో తీవ్రంగా మనస్తాపానికి గురైన తండ్రి తన సమాధిని తానే తవ్వుకునేంత స్థితికి చేరుకుంటాడు. అసలు తండ్రి, కొడుకుల మధ్య ఈ ప్రయాణం ఎలాంటి మలుపులు తిరిగింది? వారి మధ్య ఏర్పడిన దూరం చివరకు ఎలా తగ్గింది? ఈ భావోద్వేగ కథకు ఎలాంటి ముగింపు ఉంటుంది? అనేవి సినిమాలో ఆసక్తిని కలిగించే అంశాలుగా కనిపిస్తున్నాయి.ఇదే సమయంలో గోమతిరెడ్డి, ప్రజ్వల్ మధ్య సాగే క్యూట్ లవ్ స్టోరీకి ఈ కుటుంబ కథతో ఏమైనా సంబంధం ఉందా? వారి ప్రేమకథ ప్రధాన కథలో ఎలాంటి పాత్ర పోషిస్తుంది? అనే ప్రశ్నలకు కూడా సినిమా సమాధానం చెప్పనుంది.తెలంగాణ యాస, భాష, సంస్కృతిని ప్రధానంగా తీసుకుని తండ్రీకొడుకుల మధ్య సాగే భావోద్వేగ ప్రయాణంగా ‘పళ్లబురుసు’ను తెరకెక్కించినట్టు తెలుస్తోంది. పక్కా గ్రామీణ నేపథ్యం, సహజమైన పాత్రలు, కుటుంబ సంబంధాల చుట్టూ తిరిగే కథతో ఈ సినిమా రూపొందింది.

Pallaburusu Movie First Review ‘పళ్లబురుసు’కు సెన్సార్ సర్టిఫికెట్ ఏంటి? రన్‌టైమ్ ఎంత?

విడుదలకు ముందు సెంట్రల్ బోర్డ్ ఆఫ్ ఫిలిం సర్టిఫికేషన్ (CBFC) సభ్యులు, ప్రతినిధులు, అధికారులు ‘పళ్లబురుసు’ చిత్రాన్ని వీక్షించారు. సినిమా కథను, దర్శకుడు ఎంచుకున్న ట్రీట్‌మెంట్‌ను సెన్సార్ బృందం పరిశీలించింది. ముఖ్యంగా కమర్షియల్ హంగుల కోసం కథను పక్కదారి పట్టించకుండా, అసభ్యత లేదా అశ్లీలతకు తావు లేకుండా పూర్తిగా భావోద్వేగ అంశాల ఆధారంగా సినిమాను రూపొందించిన తీరును దర్శక, నిర్మాతలను అభినందించినట్టు సమాచారం.సెన్సార్ ప్రక్రియలో భాగంగా కొన్ని సన్నివేశాలు, డైలాగ్స్‌లో స్వల్ప మార్పులు, చేర్పులు సూచించినట్టు తెలుస్తోంది. ఆ చిన్న మార్పులతో సెన్సార్ ప్రక్రియ పూర్తయింది. దీంతో సినిమా విడుదలకు పెద్దగా ఎలాంటి అభ్యంతరాలు లేకుండా క్లియరెన్స్ లభించింది.

ఈ చిత్రానికి UA 13+ సర్టిఫికెట్ జారీ చేశారు. అంటే 13 ఏళ్లు పైబడిన ప్రేక్షకులు ఈ సినిమాను చూడవచ్చు. అంతకంటే తక్కువ వయసు ఉన్న పిల్లలు తల్లిదండ్రుల అనుమతి, మార్గదర్శకత్వంలో సినిమాను వీక్షించాల్సి ఉంటుందని సెన్సార్ సర్టిఫికేషన్‌లో పేర్కొన్నారు.మరో ఆసక్తికరమైన విషయం సినిమా రన్‌టైమ్. ‘పళ్లబురుసు’ మొత్తం నిడివి 2 గంటల 20 నిమిషాలు, అంటే 140 నిమిషాలుగా సెన్సార్ సర్టిఫికెట్ ద్వారా వెల్లడైంది. కథను కుటుంబ భావోద్వేగాలు, గ్రామీణ నేటివిటీ, కామెడీ అంశాలతో ముందుకు తీసుకెళ్లేలా ఈ నిడివిని ఫిక్స్ చేసినట్టు తెలుస్తోంది.ప్రమోషనల్ కంటెంట్‌ను పరిశీలిస్తే ‘పళ్లబురుసు’ పూర్తిగా గ్రామీణ నేపథ్యంలోని కామెడీతో కూడిన ఎమోషనల్ డ్రామాగా కనిపిస్తోంది. తెలంగాణ బ్యాక్‌డ్రాప్‌లో తెరకెక్కిన సినిమాలకు ఇటీవల ప్రేక్షకుల నుంచి మంచి ఆదరణ కనిపిస్తున్న నేపథ్యంలో ఈ మూవీపై కూడా విడుదలకు ముందే ఆసక్తి ఏర్పడింది.

ముఖ్యంగా హీరో నాగార్జున అక్కినేని ఈ సినిమాకు అండగా నిలవడంతో చిత్రంపై కొంత బజ్ క్రియేట్ అయింది. అన్నపూర్ణ స్టూడియోస్ వంటి ప్రముఖ నిర్మాణ సంస్థ భాగస్వామ్యం కావడం కూడా సినిమాపై అంచనాలు పెరగడానికి మరో కారణంగా నిలిచింది.అయితే సినిమా ఎంతవరకు ప్రేక్షకులను ఆకట్టుకుంటుందనేది మాత్రం విడుదల తర్వాత వచ్చే పబ్లిక్ టాక్‌పై ఆధారపడి ఉంటుంది. కథలోని తండ్రీకొడుకుల భావోద్వేగం, తెలంగాణ నేటివిటీ, కామెడీ, ప్రేమకథ ప్రేక్షకులకు ఎంతవరకు కనెక్ట్ అవుతాయో చూడాలి. మొత్తంగా చూస్తే ‘పళ్లబురుసు’ ఒక చిన్న విషయాన్ని కేంద్రంగా చేసుకుని కుటుంబ బంధాలు, తండ్రీకొడుకుల మధ్య అనుబంధం, మనస్పర్థలు, భావోద్వేగాలను తెరపై చూపించే ప్రయత్నంగా కనిపిస్తోంది.