Hyper Aadi : మళ్లీ జనసేన కోసం హైపర్ ఆది.. ఇంటింటి ప్రచారంలో జబర్దస్త్ కమెడియన్లు!

Hyper Aadi  : ఆంధ్రప్రదేశ్‌లో స్థానిక సంస్థల ఎన్నికల వేళ రాజకీయ సందడి మరింత పెరుగుతోంది. కొన్ని ప్రాంతాల్లో అభ్యర్థుల మధ్య హోరాహోరీ పోటీ నెలకొనడంతో ప్రధాన రాజకీయ పార్టీలు ఈ ఎన్నికలను ప్రతిష్ఠాత్మకంగా తీసుకున్నాయి. నవంబర్ 1న జరగనున్న మున్సిపల్ ఎన్నికల కోసం ప్రచారం జోరందుకోగా, మరోవైపు జిల్లా పరిషత్ స్థానాల పంపకాలపై కూటమి పార్టీల మధ్య కసరత్తు కొనసాగుతోంది. ఇలాంటి సమయంలో జనసేన అభ్యర్థులకు మద్దతుగా జబర్దస్త్ నటులు ఎన్నికల ప్రచారంలోకి దిగడం ఆసక్తికరంగా మారింది. బుల్లితెరపై కామెడీతో ప్రేక్షకులను అలరించిన పలువురు కళాకారులు ఇప్పుడు కూటమి అభ్యర్థుల తరఫున ఓట్లు అభ్యర్థిస్తున్నారు. ఇంటింటికీ వెళ్లి ప్రజలను కలుస్తూ జనసేన అభ్యర్థులకు మద్దతు ఇవ్వాలని కోరుతున్నారు.ముఖ్యంగా జబర్దస్త్ ఫేం హైపర్ ఆది, హీరో తనిష్క్‌తో పాటు పలువురు కమెడియన్లు ప్రచార కార్యక్రమాల్లో పాల్గొంటున్నట్లు సమాచారం. దీంతో స్థానిక ఎన్నికల ప్రచారంలో సినీ, బుల్లితెర నటుల సందడి ప్రత్యేక ఆకర్షణగా నిలుస్తోంది.

Hyper Aadi : మళ్లీ జనసేన కోసం హైపర్ ఆది.. ఇంటింటి ప్రచారంలో జబర్దస్త్ కమెడియన్లు!

Hyper Aadi  జనసేన కోసం జబర్దస్త్ నటుల ఇంటింటి ప్రచారం.. అనకాపల్లిలో సందడి!

జనసేనకు మద్దతుగా జబర్దస్త్ నటులు ప్రచారంలో పాల్గొనడం ఇదే తొలిసారి కాదు. 2024 అసెంబ్లీ ఎన్నికల సమయంలోనూ పలువురు జబర్దస్త్ కళాకారులు జనసేన అభ్యర్థుల తరఫున విస్తృతంగా ప్రచారం నిర్వహించారు. ముఖ్యంగా పవన్ కల్యాణ్‌కు మద్దతుగా జబర్దస్త్ టీంలోని అనేకమంది నటులు తమ అభిమానాన్ని బహిరంగంగానే చాటుకున్నారు. ఇప్పుడు స్థానిక ఎన్నికల నేపథ్యంలో మరోసారి అదే తరహాలో ప్రచార కార్యక్రమాలు నిర్వహిస్తున్నారు. మున్సిపల్, జిల్లా పరిషత్ ఎన్నికల్లో పోటీ చేస్తున్న జనసేన అభ్యర్థులకు మద్దతుగా వివిధ ప్రాంతాల్లో పర్యటిస్తున్నారు. అనకాపల్లి ప్రాంతంలో కూటమి అభ్యర్థుల తరఫున జబర్దస్త్ కమెడియన్లు రాజు, అప్పారావు, దొరబాబు సహా పలువురు నటీనటులు ప్రచారంలో పాల్గొన్నారు. ముఖ్యంగా 112వ వార్డులో కూటమి తరఫున జనసేన అభ్యర్థిగా పోటీ చేస్తున్న ఆళ్ల వైష్ణవికి మద్దతుగా ఇంటింటి ప్రచారం చేపట్టారు. ఈ సందర్భంగా స్థానిక ఓటర్లను కలిసిన కళాకారులు జనసేన అభ్యర్థిని గెలిపించాలని కోరారు. కూటమి అభ్యర్థులకు ఓటు వేసి స్థానిక అభివృద్ధికి సహకరించాలని విజ్ఞప్తి చేశారు.సాధారణంగా టీవీ కార్యక్రమాల్లో కనిపించే నటులు తమ ప్రాంతానికి వచ్చి నేరుగా ఓట్లు అభ్యర్థించడంతో ప్రచార కార్యక్రమాలు స్థానికంగా ఆసక్తిని రేకెత్తిస్తున్నాయి.

Hyper Aadi  హైపర్ ఆది, హీరో తనిష్క్ రోడ్ షోలు.. సామర్లకోటలోనూ జనసేనకు మద్దతు!

మెగా కుటుంబంపై, ముఖ్యంగా పవన్ కల్యాణ్‌పై తన అభిమానాన్ని పలు సందర్భాల్లో వ్యక్తం చేసిన హైపర్ ఆది మరోసారి జనసేనకు మద్దతుగా ప్రచారంలో పాల్గొంటున్నారు. 2024 ఎన్నికల సమయంలో పిఠాపురంలో పవన్ కల్యాణ్ తరఫున హైపర్ ఆది ప్రచారం నిర్వహించిన విషయం తెలిసిందే. అప్పట్లో పవన్‌కు మద్దతుగా ప్రచార కార్యక్రమాల్లో పాల్గొన్న ఆయన, ఇప్పుడు స్థానిక ఎన్నికల్లోనూ జనసేన అభ్యర్థుల కోసం రంగంలోకి దిగారు. ఈసారి హీరో తనిష్క్‌తో కలిసి అనకాపల్లి పరిధిలోని కూటమి అభ్యర్థుల తరఫున రోడ్ షోలు నిర్వహించినట్లు సమాచారం. తన టీంతో కలిసి పలు ప్రాంతాల్లో పర్యటిస్తూ అభ్యర్థులకు మద్దతు కూడగట్టే ప్రయత్నం చేస్తున్నారు. అనకాపల్లితోపాటు కాకినాడ జిల్లా పరిధిలోని సామర్లకోటలోనూ జనసేన అభ్యర్థుల తరఫున జబర్దస్త్ టీం ప్రచార కార్యక్రమాల్లో పాల్గొంటోంది. స్థానిక ఓటర్లను ఆకట్టుకునేందుకు కళాకారులు తమదైన శైలిలో ప్రచారం నిర్వహిస్తున్నారు.

Also Read :  Pithapuram Elections : పిఠాపురంలో జనసేనకు టెన్షన్.. టీడీపీ కొత్త బాధ్యతల్లో వర్మ!

ఈ ప్రచారంలో కూటమి ప్రభుత్వం అధికారంలోకి వచ్చిన తర్వాత చేపట్టిన సంక్షేమ, అభివృద్ధి కార్యక్రమాలను ప్రజలకు వివరిస్తున్నారు. గత రెండేళ్ల కాలంలో ప్రభుత్వం చేసిన పనులను ఓటర్లకు తెలియజేస్తూ జనసేన గాజు గ్లాసు గుర్తుకు, ఇతర కూటమి అభ్యర్థులకు మద్దతు ఇవ్వాలని కోరుతున్నారు. మరోవైపు స్థానిక సంస్థల ఎన్నికలను కూటమి పార్టీలు ప్రతిష్ఠాత్మకంగా తీసుకోవడంతో సినీ, బుల్లితెర నటుల ప్రచారానికి ప్రాధాన్యం ఏర్పడింది. ముఖ్యంగా యువతలో గుర్తింపు ఉన్న హైపర్ ఆది వంటి కళాకారులు ప్రచారంలో పాల్గొనడం అభ్యర్థులకు ఎంతవరకు ఉపయోగపడుతుందనేది ఆసక్తికరంగా మారింది. అయితే నటుల ప్రచారానికి వచ్చిన స్పందన ఓట్లుగా మారుతుందా లేదా అనేది ఎన్నికల ఫలితాలతోనే తేలనుంది. జబర్దస్త్ టీం ప్రచారం నిర్వహించిన అనకాపల్లి, సామర్లకోట తదితర ప్రాంతాల్లో కూటమి అభ్యర్థులు ఎలాంటి ఫలితాలు సాధిస్తారన్నది ఇప్పుడు రాజకీయ వర్గాల్లో చర్చనీయాంశమవుతోంది. Hyper Aadi, Janasena Party, Jabardasth Team, AP Local Elections, Pawan Kalyan