Thalliki Vandanam : అర్హులందరికీ ‘తల్లికి వందనం’ అందించడమే మా లక్ష్యం – ఏపీ సర్కార్ క్లారిటీ
Thalliki Vandanam : ఆంధ్రప్రదేశ్ ప్రభుత్వం ప్రతిష్టాత్మకమైన ‘సూపర్ సిక్స్’ హామీలలో ఒకటైన ‘తల్లికి వందనం’ పథకం అమలుపై అసెంబ్లీ వేదికగా కీలక స్పష్టతనిచ్చింది. ఈ పథకం ద్వారా రాష్ట్రంలోని లక్షలాది మంది విద్యార్థుల తల్లులకు అందుతున్న ఆర్థిక సాయంపై విద్యాశాఖ మంత్రి నారా లోకేష్ వివరణ ఇచ్చారు. ఆంధ్రప్రదేశ్ రాష్ట్రంలో విద్యార్థుల తల్లులకు ఆర్థిక భరోసా కల్పించే ‘తల్లికి వందనం’ పథకం అమలుపై ప్రభుత్వం గణాంకాలతో కూడిన వివరణ ఇచ్చింది. రాష్ట్రంలో ఒకటో తరగతి నుండి 12వ తరగతి వరకు యూడైస్ (UDISE) డేటా ప్రకారం మొత్తం 79,51,903 మంది విద్యార్థులు నమోదై ఉండగా, అందులో అర్హులైన 67,01,653 మందికి ఇప్పటికే ప్రభుత్వం రూ. 8,454 కోట్ల మేర సాయం అందజేసింది. గత ప్రభుత్వ హయాంలో లబ్ధిదారుల సంఖ్య కేవలం 52 శాతానికే పరిమితమైందని, తాము అధికారంలోకి వచ్చిన తర్వాత అత్యంత పారదర్శకంగా 84.27 శాతం మందికి ఈ పథకాన్ని వర్తింపజేశామని మంత్రి లోకేష్ స్పష్టం చేశారు. వచ్చే జూన్ నెలలో తదుపరి విడత నిధుల జమకు ప్రభుత్వం కసరత్తు చేస్తోంది.
Thalliki Vandanam : అర్హులందరికీ ‘తల్లికి వందనం’ అందించడమే మా లక్ష్యం – ఏపీ సర్కార్ క్లారిటీ
Thalliki Vandanam ‘తల్లికి వందనం’ పథకంతో ఇప్పటివరకు ఏపీ సర్కార్ చేసిన ఖర్చు రూ. 8,454 కోట్లు
ప్రతిపక్షాల విమర్శలను తిప్పికొడుతూ, గత పాలనలో 83 లక్షల మంది విద్యార్థులు ఉన్నప్పటికీ కేవలం 44 లక్షల మందికే సాయం అందిందని, కానీ తమ ప్రభుత్వం అర్హత ఉన్న ప్రతి ఒక్కరికీ ప్రాధాన్యత ఇస్తోందని మంత్రి పేర్కొన్నారు. సోషల్ వెల్ఫేర్ విభాగంలో కేంద్ర నిధుల విడుదల ప్రక్రియ కారణంగా కొంతమందికి సాయం అందడంలో పాక్షిక జాప్యం జరిగి ఉండవచ్చని, అటువంటి వారు వివరాలు అందజేస్తే వెంటనే సరిచేస్తామని భరోసా ఇచ్చారు. ముఖ్యంగా రాష్ట్రంలోని పారిశుద్ధ్య కార్మికులందరికీ తమ పిల్లల చదువుల కోసం ఈ పథకం వర్తించేలా ప్రత్యేక చర్యలు తీసుకుంటామని ప్రకటించడం గమనార్హం.
ఈ పథకం అమలు ద్వారా రాష్ట్రంలోని పేద, మధ్యతరగతి కుటుంబాలకు విద్యా భారతం తగ్గడమే కాకుండా, బడి మానేసే పిల్లల సంఖ్య (Dropout Rate) గణనీయంగా తగ్గుతుందని ప్రభుత్వం భావిస్తోంది. కొత్తగా అర్హత పొందిన విద్యార్థులను కూడా పథకంలో చేర్చుకునేందుకు వీలుగా నిబంధనలను సరళతరం చేస్తూ, పక్కాగా లబ్ధిదారులను గుర్తిస్తున్నారు. కేవలం రాజకీయాల కోసమే అసత్య ప్రచారాలు చేస్తున్నారన్న మంత్రి, అర్హత ఉండి సాయం అందని విద్యార్థులు ఎవరైనా ఉంటే వారి వివరాలను ప్రభుత్వం దృష్టికి తీసుకురావాలని సూచించారు.