Gold Prices 2026 WGC Report : అవునా.. భారత్‌లో తగ్గుతున్న పసిడి డిమాండ్..! కారణం అదేనా ?

Gold Prices 2026 WGC Report : భారతీయ సంస్కృతిలో బంగారం కేవలం ఒక లోహం మాత్రమే కాదు, అది ఒక సెంటిమెంట్. అయితే, మారుతున్న కాలంతో పాటు పసిడి పట్ల భారతీయుల దృక్పథంలో కూడా స్పష్టమైన మార్పు కనిపిస్తోంది. వరల్డ్ గోల్డ్ కౌన్సిల్ (WGC) తాజా నివేదిక ప్రకారం, 2026లో దేశీయంగా బంగారం డిమాండ్ 600-700 టన్నుల మధ్య మాత్రమే ఉండొచ్చని అంచనా. ఇది గత ఐదేళ్ల కాలంలోనే అత్యల్ప స్థాయి కావడం గమనార్హం. 2024లో 802.8 టన్నులుగా ఉన్న డిమాండ్, 2025 నాటికి 710.9 టన్నులకు పడిపోయింది. అంటే ఏడాది కాలంలోనే సుమారు 11 శాతం మేర వినియోగం తగ్గింది. ధరలు ఆకాశాన్నంటుతుండటమే ఇందుకు ప్రధాన కారణంగా విశ్లేషకులు భావిస్తున్నారు. సాధారణంగా పెళ్లిళ్లు, పండుగలకు బంగారాన్ని కొనుగోలు చేసే మధ్యతరగతి ప్రజలు, భారీగా పెరుగుతున్న ధరల కారణంగా తమ కొనుగోలు నిర్ణయాలను వాయిదా వేసుకుంటున్నట్లు తెలుస్తోంది.

Gold Prices 2026 WGC Report: భారత్‌లో తగ్గుతున్న పసిడి డిమాండ్! కారణం అదేనా ?

Gold Prices 2026 WGC Report పడిపోతున్న బంగారం డిమాండ్

ధరలు పెరగడం వల్ల వినియోగం (పరిమాణం) తగ్గినప్పటికీ, ఆర్థిక పరంగా దాని విలువ మాత్రం గణనీయంగా పెరిగింది. 2024లో భారతీయులు కొనుగోలు చేసిన బంగారం విలువ రూ. 5.75 లక్షల కోట్లు కాగా, 2025లో అది ఏకంగా రూ. 7.51 లక్షల కోట్లకు చేరింది. అంటే డిమాండ్ తగ్గినప్పటికీ, ధరల పెరుగుదల వల్ల మార్కెట్ విలువ 30 శాతం మేర పెరిగింది. ముఖ్యంగా ఆభరణాల రంగానికి పెద్ద దెబ్బ తగిలింది. ఆభరణాల గిరాకీ సుమారు 24 శాతం తగ్గి 430.5 టన్నులకు పరిమితమైంది. గతంలో అక్టోబర్-డిసెంబర్ త్రైమాసికం అంటే పండుగలు, వివాహాల సీజన్ కావడంతో భారీగా కొనుగోళ్లు జరిగేవి. కానీ, 2025 చివరి నాటికి ఈ విభాగంలో కూడా 23 శాతం తగ్గుదల నమోదు కావడం మార్కెట్ నిపుణులను ఆశ్చర్యానికి గురిచేస్తోంది.

v 2026లో సామాన్య వినియోగదారులకు పసిడి ధరలు భారం

అయితే, ఒక ఆసక్తికరమైన అంశం ఏమిటంటే.. ఆభరణాల రూపంలో బంగారం కొనడం తగ్గించిన భారతీయులు, పెట్టుబడి సాధనంగా మాత్రం పసిడి వైపు మొగ్గు చూపుతున్నారు. 2025 చివరి త్రైమాసికంలో బంగారంపై పెట్టుబడులు 26 శాతం పెరిగి 96 టన్నులకు చేరడం విశేషం. బంగారు నాణేలు, కడ్డీలు, మరియు గోల్డ్ ఈటీఎఫ్ (ETF)లపై మదుపర్లు ఆసక్తి చూపిస్తున్నారు. అంతర్జాతీయంగా కూడా ఇదే ధోరణి కనిపిస్తోంది. 2025లో ప్రపంచవ్యాప్త పసిడి డిమాండ్ 5002 టన్నుల ఆల్-టైమ్ గరిష్ఠ స్థాయికి చేరింది. సెంట్రల్ బ్యాంకులు తమ నిల్వలను పెంచుకోవడం, పెట్టుబడిదారులు సురక్షితమైన ఆస్తిగా భావించి కొనుగోలు చేయడమే ఇందుకు కారణం. మొత్తంమీద, 2026లో సామాన్య వినియోగదారులకు పసిడి ధరలు భారంగానే మారనున్నాయని, అయితే దీర్ఘకాలిక లాభాల కోసం చూసే పెట్టుబడిదారులకు మాత్రం ఇది ఇప్పటికీ హాట్ ఫేవరెట్ అని స్పష్టమవుతోంది.