Navagraha pradakshina : నవగ్రహ ప్రదక్షిణలు ఎలా చేయాలి? ..తర్వాత కాళ్లు కడుక్కోవాలా? ..శాస్త్రం చెప్పే నియమాలు ఇవే..!

Navagraha pradakshina : జీవితంలో ఎదురయ్యే సుఖదుఃఖాలు, లాభనష్టాలు, కుటుంబ సమస్యలు, జాతక దోషాలు వంటి అనేక అంశాలు గ్రహాల అనుకూలత, ప్రతికూలతతో ముడిపడి ఉంటాయని జ్యోతిష్యశాస్త్రం వివరిస్తుంది. అందుకే గ్రహదోషాల నివారణ కోసం చాలామంది ఆలయాల్లో నవగ్రహ ప్రదక్షిణలు చేస్తుంటారు. అయితే, కేవలం ప్రదక్షిణలు చేయడం మాత్రమే కాకుండా, వాటిని శాస్త్రోక్తంగా, సరైన నియమ నిష్ఠలతో నిర్వహించినప్పుడే పూర్తి ఫలితాలు లభిస్తాయని వేద పండితులు చెబుతున్నారు.

Navagraha pradakshina నవగ్రహ ప్రదక్షిణలు చేసే సరైన విధానం ఏమిటి?

నవగ్రహ ప్రదక్షిణలకు వెళ్లే ముందు ఉదయం స్నానం చేసి, పవిత్రమైన సాంప్రదాయ వస్త్రాలు ధరించి ఆలయానికి చేరుకోవాలి. నవగ్రహ మండపంలోకి వెళ్లే ముందు ముందుగా సూర్యభగవానుడిని దర్శించుకోవడం శుభప్రదంగా భావిస్తారు. ప్రదక్షిణలు చేసే సమయంలో నవగ్రహ విగ్రహాలను చేతులతో తాకకూడదు. ముందుగా సూర్యుడి నుంచి ప్రారంభించి ఎడమవైపు (చంద్రుడి దిశగా) తిరుగుతూ కుడివైపునకు మొత్తం 9 ప్రదక్షిణలు చేయాలి. అనంతరం రాహు, కేతువుల శాంతి కోసం అపసవ్య దిశలో (కుడి నుంచి ఎడమకు) 2 ప్రదక్షిణలు చేయాలని శాస్త్రం సూచిస్తుంది. ఆ తర్వాత ఒక్కో గ్రహాన్ని మనసులో స్మరిస్తూ ఒక్కో ప్రదక్షిణ చేయాలి. ప్రదక్షిణలు పూర్తయ్యాక గ్రహాలకు వీపు చూపకుండా, పక్కకు తిరిగి నెమ్మదిగా బయటకు రావడం సంప్రదాయంగా పాటిస్తారు.

Navagraha pradakshina నవగ్రహ దర్శనం తర్వాత కాళ్లు కడుక్కోవాలా?

నవగ్రహ ప్రదక్షిణలు చేసిన తర్వాత కాళ్లు తప్పనిసరిగా కడుక్కోవాలా అనే సందేహం చాలామందిలో ఉంటుంది. ధర్మశాస్త్ర గ్రంథాల ప్రకారం నవగ్రహ ప్రదక్షిణల అనంతరం కాళ్లు కడుక్కోవాలని ప్రత్యేకంగా పేర్కొన్న నియమం లేదు. అయితే, శనిదేవునికి ప్రత్యేక పూజలు లేదా తైలాభిషేకం చేసిన సందర్భాల్లో మాత్రం కాళ్లు కడుక్కోవడం అవసరమని పండితులు చెబుతున్నారు. కారణం, తైలాభిషేకం వల్ల నవగ్రహ మండపం పరిసరాల్లో నూనె పడే అవకాశం ఉంటుంది. అలాంటి పరిస్థితిలో కాళ్లు కడుక్కోకుండా ప్రధాన ఆలయానికి వెళ్లితే జారిపడే ప్రమాదం ఉంటుంది. అందువల్ల నవగ్రహ దర్శనం అనంతరం కాళ్లు శుభ్రం చేసుకుని శివాలయం లేదా ఇతర దేవతల ఆలయాలకు వెళ్లడం అనేక ప్రాంతాల్లో ఆచారంగా కొనసాగుతోంది. అలాగే ప్రతి ప్రదక్షిణ సమయంలో సంబంధిత గ్రహానికి చెందిన శ్లోకాన్ని భక్తిశ్రద్ధలతో జపించడం వల్ల మరింత ఆధ్యాత్మిక ఫలితం లభిస్తుందని వేద పండితులు సూచిస్తున్నారు.

సమగ్ర నవగ్రహ శ్లోకం

“ఆదిత్యాయ చ సోమాయ మంగళాయ బుధాయ చ ।
గురు శుక్ర శనిభ్యశ్చ రాహవే కేతవే నమః ॥”

నవగ్రహాలకు సంబంధించిన ప్రత్యేక శ్లోకాలు

సూర్యుడు

“జపాకుసుమ సంకాశం కాశ్యపేయం మహాద్యుతిమ్ ।
తమోరిం సర్వపాపఘ్నం ప్రణతోస్మి దివాకరం ॥”

చంద్రుడు

“దధిశంఖ తుషారాభం క్షీరోదార్ణవ సంభవమ్ ।
నమామి శశినం సోమం శంభోర్మకుట భూషణం ॥”

కుజుడు

“ధరణీగర్భ సంభూతం విద్యుత్కాంతి సమప్రభమ్ ।
కుమారం శక్తిహస్తం తం మంగళం ప్రణమామ్యహం ॥”

బుధుడు

“ప్రియంగు కలికాశ్యామం రూపేణాప్రతిమం బుధమ్ ।
సౌమ్యం సత్వగుణోపేతం తం బుధం ప్రణమామ్యహం ॥”

గురువు

“దేవానాంచ ఋషీణాంచ గురుం కాంచన సన్నిభమ్ ।
బుద్ధిమంతం త్రిలోకేశం తం నమామి బృహస్పతిమ్ ॥”

శుక్రుడు

“హిమకుంద మృణాళాభం దైత్యానాం పరమం గురుమ్ ।
సర్వశాస్త్ర ప్రవక్తారం భార్గవం ప్రణమామ్యహం ॥”

శని

“నీలాంజన సమాభాసం రవిపుత్రం యమాగ్రజమ్ ।
ఛాయా మార్తాండ సంభూతం తం నమామి శనైశ్చరమ్ ॥”

రాహువు

“అర్ధకాయం మహావీరం చంద్రాదిత్య విమర్దనమ్ ।
సింహికాగర్భ సంభూతం తం రాహుం ప్రణమామ్యహం ॥”

కేతువు

“పలాశ పుష్ప సంకాశం తారకాగ్రహ మస్తకమ్ ।
రౌద్రం రౌద్రాత్మకం ఘోరం తం కేతుం ప్రణమామ్యహం ॥”

నవగ్రహ ప్రదక్షిణలు పూర్తైన అనంతరం, ఏ గ్రహ దోషం ప్రభావం ఎక్కువగా ఉందో ఆ గ్రహానికి అనుగుణంగా నవధాన్యాలు సమర్పించడం, నువ్వుల నూనెతో దీపం వెలిగించడం, లేదా సంబంధిత ధాన్యాలను దానం చేయడం శుభప్రదంగా భావిస్తారు. ఇలా శాస్త్రోక్తంగా పూజలు నిర్వహిస్తే గ్రహదోషాల ప్రభావం తగ్గి, కుటుంబంలో శాంతి, సౌఖ్యం, ఆర్థిక స్థిరత్వం, మానసిక ప్రశాంతత కలుగుతాయని వేద పండితులు సూచిస్తున్నారు.