Donald Trump 10% Global Tariff : తగ్గేదేలే.. సుప్రీంకోర్టు ఆదేశాలు లెక్కచేయని ట్రంప్.. మరో 10% టారిఫ్ పెంపు…!

Donald Trump 10% Global Tariff : అమెరికా అధ్యక్షుడు డొనాల్డ్ ట్రంప్ మరోసారి తనదైన శైలిలో సంచలన నిర్ణయం తీసుకున్నారు. న్యాయవ్యవస్థ ఆదేశాలను సైతం లెక్కచేయకుండా, సుప్రీంకోర్టు తీర్పు వెలువడిన కొద్ది గంటల్లోనే అదనపు టారిఫ్ విధిస్తూ ఎగ్జిక్యూటివ్ ఆర్డర్‌పై సంతకం చేయడం అంతర్జాతీయ స్థాయిలో పెను సంచలనంగా మారింది. అమెరికా సుప్రీంకోర్టు ట్రంప్ గతంలో విధించిన టారిఫ్‌లను అక్రమమని తేల్చిచెప్పినప్పటికీ, ఆయన ఆ ఆదేశాలను ఏమాత్రం బేఖాతర్ చేయడమే కాకుండా న్యాయవ్యవస్థపై బహిరంగంగానే విరుచుకుపడ్డారు. కోర్టు తీర్పును “భయంకరమైనది మరియు లోపభూయిష్టమైనది” అని అభివర్ణిస్తూ, ఈ నిర్ణయం తీసుకున్న న్యాయమూర్తుల పట్ల తాను సిగ్గుపడుతున్నానని ఘాటు వ్యాఖ్యలు చేశారు. టారిఫ్‌లను రద్దు చేయడం పక్కన పెడితే, దానికి ప్రతిగా మరో 10 శాతం అదనపు ‘గ్లోబల్ టారిఫ్’ విధిస్తున్నట్లు ప్రకటించి తన పంతాన్ని నెగ్గించుకున్నారు. వైట్ హౌస్ ఓవల్ ఆఫీస్‌లో తక్షణమే ఈ ఉత్తర్వులపై సంతకం చేసి, న్యాయవ్యవస్థతో పూర్తి స్థాయి పోరాటానికి సిద్ధమని సంకేతాలిచ్చారు.

Donald Trump 10% Global Tariff : తగ్గేదేలే.. సుప్రీంకోర్టు ఆదేశాలు లెక్కచేయని ట్రంప్.. మరో 10% టారిఫ్ పెంపు…!

Donald Trump 10% Global Tariff : భారత్ సహా ప్రపంచ దేశాలపై టారిఫ్ ప్రభావం

ట్రంప్ ప్రకటించిన ఈ 10 శాతం అదనపు టారిఫ్ ఏ ఒక్క దేశానికో పరిమితం కాకుండా, ప్రపంచంలోని అన్ని దేశాల దిగుమతులపై వర్తిస్తుందని ఆయన స్పష్టం చేశారు. దీనివల్ల భారత్ సహా దాదాపు అన్ని వాణిజ్య భాగస్వామ్య దేశాలపై ఆర్థిక భారం పడనుంది. అయితే, భారత్‌తో ఉన్న ఒప్పందాలను ఆయన “న్యాయమైనవి” గా అభివర్ణించడం గమనార్హం. ప్రస్తుతం ఈ అదనపు టారిఫ్ భారత్‌కు కూడా వర్తిస్తుందని వైట్‌హౌస్ వర్గాలు చెబుతున్నప్పటికీ, భవిష్యత్తులో భారత్‌కు మినహాయింపు ఇస్తూ మరో ప్రత్యేక ఉత్తర్వు వెలువడే అవకాశం ఉందని సమాచారం. అప్పటివరకు భారతీయ ఎగుమతులపై కూడా ఈ 10 శాతం అదనపు టారిఫ్ ప్రభావం కొనసాగుతుంది.

ట్రూత్ సోషల్ వేదికగా సంచలన ప్రకటన

తన నిర్ణయాలను ఎప్పుడూ సోషల్ మీడియా వేదికగా పంచుకునే ట్రంప్, ఈసారి కూడా ‘ట్రూత్ సోషల్’ వేదికగానే ఈ విషయాన్ని వెల్లడించారు. అమెరికా ఆర్థిక ప్రయోజనాలను కాపాడటమే తన ప్రాధాన్యతని, అందుకే ఈ కఠిన నిర్ణయం తీసుకున్నానని ఆయన చెప్పుకొచ్చారు. “మేము భారత్‌కు టారిఫ్ కట్టట్లేదు, అందుకే పరిస్థితిని ఫ్లిప్ చేశాం” అని వ్యాఖ్యానించడం ద్వారా తన వాణిజ్య వ్యూహాన్ని తేటతెల్లం చేశారు. ఒక పక్క న్యాయపరమైన సవాళ్లు ఎదురవుతున్నా, ఏమాత్రం వెనక్కి తగ్గకుండా ఆయన తీసుకున్న ఈ నిర్ణయం ప్రపంచ మార్కెట్లలో ఎలాంటి కుదుపులకు దారితీస్తుందో వేచి చూడాలి.