Aadarsha Kutumbam Movie Review : ఆదర్శ కుటుంబం మూవీ రివ్యూ అండ్ రేటింగ్‌..!

Aadarsha Kutumbam Movie Review  : విక్టరీ వెంకటేష్, మాటల మాంత్రికుడు త్రివిక్రమ్ శ్రీనివాస్ కాంబినేషన్‌లో వచ్చిన ‘ఆదర్శ కుటుంబం – AK47’ సినిమాపై ప్రేక్షకుల్లో మొదటి నుంచీ మంచి అంచనాలు ఉన్నాయి. చాలా కాలం తర్వాత ఈ ఇద్దరూ కలిసి పనిచేయడంతో సినిమా ఎలా ఉండబోతోందన్న ఆసక్తి అభిమానుల్లో నెలకొంది. ఫ్యామిలీ ఎంటర్‌టైనర్‌గా రూపొందిన ఈ చిత్రం అక్టోబర్ 30న థియేటర్లలో విడుదలైంది. సినిమా చూసిన కొందరు ప్రేక్షకులు సోషల్ మీడియా వేదికగా తమ అభిప్రాయాలను పంచుకుంటున్నారు. వారి పోస్టుల్లో వెంకటేష్ కామెడీ టైమింగ్, సత్య నటన, థమన్ సంగీతంపై ప్రశంసలు కనిపిస్తుండగా.. సెకండాఫ్‌లో కథనం నెమ్మదించిందనే అభిప్రాయాలూ వ్యక్తమవుతున్నాయి. మరి ఈ సినిమా గురించి ప్రేక్షకులు ఏమంటున్నారు? పూర్తి వివరాలు చూద్దాం. ‘ఆదర్శ కుటుంబం’లో వెంకటేష్‌కు జోడీగా శ్రీనిధి శెట్టి నటించారు. నారా రోహిత్, నివేదా పేతురాజ్, యువినా, రాజ్ ప్రజ్వల్, రావు రమేష్, సత్య, బ్రహ్మాజీ, ఉదయ్‌బీర్ సంధు, వెన్నెల కిషోర్, రఘుబాబు తదితరులు కీలక పాత్రల్లో కనిపించారు. హారికా అండ్ హాసిని క్రియేషన్స్ బ్యానర్‌పై ఎస్. రాధాకృష్ణ (చినబాబు) ఈ చిత్రాన్ని నిర్మించగా, శ్రీమతి మమత సమర్పకులుగా వ్యవహరించారు. త్రివిక్రమ్ శ్రీనివాస్ కథ, రచన అందించడం సినిమాపై ఆసక్తిని మరింత పెంచింది. తమన్ ఎస్ సంగీతం అందించగా, రవి కే చంద్రన్ సినిమాటోగ్రఫీ, నవీన్ నూలి ఎడిటింగ్, ఏఎస్ ప్రకాశ్ ఆర్ట్ వర్క్ బాధ్యతలు నిర్వహించారు.

Aadarsha Kutumbam Movie Review : ఆదర్శ కుటుంబం మూవీ రివ్యూ అండ్ రేటింగ్‌..!

సినిమా కథలోకి వెళ్తే.. చిట్టిబాబు తొట్టి (వెంకటేష్), స్వర్ణ (శ్రీనిధి శెట్టి), సంపూర్ణ (యువిక), శర్వా (రాజా ప్రజ్వల్) ఓ సాధారణ మధ్యతరగతి కుటుంబానికి చెందినవారు. అప్పులు, ఆర్థిక ఇబ్బందుల మధ్య ప్రతి రోజూ జీవితాన్ని నెట్టుకొస్తుంటారు. అవసరాలు ఎక్కువ.. ఆదాయం తక్కువ అన్నట్టుగా సాగుతున్న వారి జీవితంలో ఊహించని మలుపు వస్తుంది. అంతవరకు డబ్బు కోసం ఇబ్బందులు పడిన ఈ కుటుంబం ఉన్నట్టుండి కోటీశ్వరులుగా మారిపోతుంది.

సాధారణ మధ్యతరగతి జీవితం నుంచి ఒక్కసారిగా గేటెడ్ కమ్యూనిటీలోకి అడుగుపెట్టిన చిట్టిబాబు కుటుంబం విలాసవంతమైన జీవితాన్ని ఆస్వాదించడం మొదలుపెడుతుంది. అయితే ఈ ఆనందం ఎక్కువ రోజులు ప్రశాంతంగా కొనసాగదు. బీహార్‌కు చెందిన దండుపాళ్యం తరహా దోపిడీ ముఠా చిట్టిబాబు కుటుంబాన్ని టార్గెట్ చేస్తుంది. వారి ఇంట్లోకి చొరబడి ఏకంగా రూ.100 కోట్లు దోచుకెళ్లేందుకు భారీ ప్లాన్ సిద్ధం చేస్తుంది. అక్కడి నుంచే కథ క్రైమ్, కామెడీ, యాక్షన్ వైపు మలుపు తీసుకుంటుంది.

రూ.100 కోట్ల వెనుక అసలు కథేంటి?

అప్పుల ఊబిలో ఉన్న చిట్టిబాబు కుటుంబానికి ఒక్కసారిగా కోట్ల రూపాయలు ఎక్కడి నుంచి వచ్చాయి? సాధారణ స్థాయి నుంచి విలాసవంతమైన జీవితం గడిపే స్థాయికి వారు ఎలా చేరుకున్నారు? గేటెడ్ కమ్యూనిటీలో ఉంటున్న ఈ కుటుంబాన్నే బీహార్ దోపిడీ ముఠా ఎందుకు టార్గెట్ చేసింది? రూ.100 కోట్లను కొట్టేయాలన్న వారి ప్లాన్ వెనుక అసలు కారణం ఏంటి? అనే ప్రశ్నలు కథపై ఆసక్తిని పెంచుతాయి.

దోపిడీ కోసం ఇంట్లోకి ప్రవేశించిన బీహార్ గ్యాంగ్ నుంచి చిట్టిబాబు కుటుంబం తమను తాము ఎలా రక్షించుకుంది? ఆ ముఠాను ఎదుర్కొన్న తర్వాత పోలీసులు చిట్టిబాబు కుటుంబాన్నే ఎందుకు వెంటాడాల్సి వచ్చింది? తమ అనుచరులను చావుదెబ్బ కొట్టిన చిట్టిబాబు కుటుంబంపై ప్రతీకారం తీర్చుకునేందుకు బీహార్ గ్యాంగ్ ఎలాంటి వ్యూహం రచించింది? దానికి చిట్టిబాబు కుటుంబం ఎలా చెక్ పెట్టింది? అన్నది కథలో కీలకంగా మారుతుంది.

అన్నింటికంటే ముఖ్యంగా చిట్టిబాబు కుటుంబం అసలు బ్యాక్‌గ్రౌండ్ ఏంటి? వారు కనిపిస్తున్నంత సాధారణమైన వారేనా? చివరకు ఒకవైపు పోలీసులు, మరోవైపు బీహార్ గ్యాంగ్ వెంటాడుతున్న పరిస్థితుల్లో ఆ కుటుంబం ఎలా తప్పించుకుంది? చివరికి సేఫ్‌గా బయటపడిందా? అనే ప్రశ్నలకు తెరపై ఇచ్చిన సమాధానాల సమాహారమే ‘ఆదర్శ కుటుంబం’ కథ.

మాటల మాంత్రికుడు త్రివిక్రమ్ శ్రీనివాస్ సినిమా అనగానే పదునైన డైలాగ్స్, సందర్భానుసారంగా వచ్చే కామెడీ, కుటుంబ విలువలు, బంధాలు, అనుబంధాలు గుర్తుకొస్తాయి. ‘ఆదర్శ కుటుంబం’ కూడా అలాంటి ఫ్యామిలీ నేపథ్యంతోనే మొదలవుతుంది. మధ్యతరగతి కుటుంబాల కష్టాలు, ఆర్థిక సమస్యలు, మరోవైపు సంపన్నుల విలాసవంతమైన జీవనశైలి మధ్య ఉన్న వ్యత్యాసాన్ని తనదైన డైలాగ్స్‌తో చూపించే ప్రయత్నం చేశారు.

ఫస్టాఫ్‌లో త్రివిక్రమ్ తన మార్క్ మాటలు, టైమ్‌పాస్ మూమెంట్స్‌తో కథను ముందుకు తీసుకెళ్లే ప్రయత్నం కనిపిస్తుంది. అయితే సాధారణంగా ఆయన సినిమాల్లో కనిపించే కంటెంట్‌కు భిన్నంగా ఈసారి క్రైమ్, యాక్షన్ అంశాలకు కూడా ఎక్కువ ప్రాధాన్యం దక్కింది. ముఖ్యంగా హింస, రక్తపాతం కాస్త ఎక్కువగానే కనిపిస్తాయి. కామెడీ, ఫ్యామిలీ ఎమోషన్స్ మధ్య మాస్ యాక్షన్ ఎపిసోడ్స్‌ను మిక్స్ చేస్తూ మొదటి భాగాన్ని ముగించారు.

ఫస్టాఫ్ ముగిసే సమయానికి కథ ఒకరకంగా క్లైమాక్స్‌కు చేరుకున్నట్టే అనిపిస్తుంది. దీంతో ‘ఇంత జరిగిపోయాక సెకండాఫ్‌లో ఇంకేం చూపిస్తారు?’ అనే క్యూరియాసిటీ ప్రేక్షకుల్లో కలిగేలా త్రివిక్రమ్ కథనాన్ని తీర్చిదిద్దారు. అదే సమయంలో రెండో భాగంపై అంచనాలు కూడా పెరుగుతాయి.

సెకండాఫ్‌లో తడబాటు.. చివర్లో ఫ్యామిలీ ఎమోషన్స్

సెకండాఫ్‌కు వచ్చేసరికి మాత్రం సినిమా త్రివిక్రమ్ మార్క్‌కు కొంత దూరంగా వెళ్లిన భావన కలుగుతుంది. మొదటి భాగంలో ఏర్పడిన ఆసక్తిని అదే స్థాయిలో కొనసాగించడంలో కథ, కథనం తడబడినట్టుగా అనిపిస్తుంది. కొన్ని సందర్భాల్లో అసలు కథ ఏ దిశగా వెళ్తోంది? తర్వాత ఏం జరగబోతోంది? అనే విషయంలో స్పష్టత తగ్గుతుంది.

ముఖ్యంగా రెండో భాగం ఒకే తరహా ట్రాక్‌లో ఎక్కువసేపు సాగడం కొంత అసంతృప్తిని కలిగించే అంశం. ఫస్టాఫ్‌లో క్రియేట్ చేసిన క్యూరియాసిటీకి తగ్గట్టుగా సెకండాఫ్ మరింత బలంగా ఉంటుందని ఆశించే వారికి ఈ భాగం పూర్తి స్థాయిలో సంతృప్తి ఇవ్వకపోవచ్చు. అయితే సినిమా చివరి భాగానికి వచ్చేసరికి కథ మళ్లీ కొంత గాడిలో పడుతుంది. మంచి ఫ్యామిలీ ఎమోషన్స్‌ను తెరపైకి తీసుకొచ్చి ప్రేక్షకుడికి ఓ మంచి ఫీల్ ఇచ్చేలా ముగించడం ఊరటనిచ్చే అంశంగా నిలుస్తుంది.

నటీనటుల విషయానికి వస్తే వెంకటేష్ గురించి ప్రత్యేకంగా చెప్పాల్సిన అవసరం లేదు. ఫ్యామిలీ ఎమోషన్స్‌తో పాటు యాక్షన్ మోడ్‌లో సాగే చిట్టిబాబు పాత్రలో ఆయన సహజంగా ఒదిగిపోయారు. ఇలాంటి కుటుంబ కథా పాత్రలను తనదైన టైమింగ్, బాడీ లాంగ్వేజ్‌తో ఎలివేట్ చేయడం వెంకటేష్‌కు కొట్టిన పిండే. ఫ్యామిలీ హీరోగా తనకున్న బలాన్ని మరోసారి ఉపయోగించుకున్నారు.

స్వర్ణ పాత్రలో శ్రీనిధి శెట్టి కొత్తగా కనిపిస్తుంది. గృహిణిగా ఆమె పాత్రకు తగ్గట్టుగా నటించడంతో పాటు గ్లామర్ పరంగానూ ఆకట్టుకునే ప్రయత్నం చేసింది. ముఖ్యంగా ఎమోషనల్ సన్నివేశాల్లో పాత్రలో ఒదిగిపోయింది. యాక్టింగ్, గ్లామర్‌తో పాటు కుటుంబ భావోద్వేగాలను చూపించాల్సిన సన్నివేశాల్లోనూ తన పాత్రకు న్యాయం చేసింది.

సంపూర్ణ, శర్వా పాత్రల్లో కనిపించిన బాల నటులు యువిక, రాజా ప్రజ్వల్ కూడా బాగా నటించారు. కుటుంబ సన్నివేశాల్లో వారి పాత్రలు సహజంగా కనిపిస్తాయి. నారా రోహిత్, రావు రమేష్ తమకు ఇచ్చిన పాత్రలకు న్యాయం చేశారు. సత్య కామెడీ విషయానికి వస్తే మాత్రం ఎక్కువగా ఒకే తరహాలో సాగిన భావన కలుగుతుంది.

సాంకేతిక విభాగాల్లో సినిమాటోగ్రఫీ ప్రధాన ఆకర్షణగా నిలుస్తుంది. ప్రతి ఫ్రేమ్‌ను రిచ్‌గా, క్లాస్‌గా చూపించే ప్రయత్నం కనిపిస్తుంది. ముఖ్యంగా గేటెడ్ కమ్యూనిటీ, విలాసవంతమైన జీవితం నేపథ్యంగా వచ్చే సన్నివేశాలకు విజువల్ ట్రీట్ ఇచ్చారు. ఆర్ట్ వర్క్ కూడా సినిమా క్వాలిటీని మరో స్థాయికి తీసుకెళ్లడంలో ఉపయోగపడింది. నిర్మాణ విలువలు హై రేంజ్‌లో కనిపిస్తాయి.

అయితే తమన్ అందించిన సంగీతం మాత్రం కథను, కీలక సన్నివేశాలను ఆశించిన స్థాయిలో ఎలివేట్ చేయలేకపోయిందనే భావన కలుగుతుంది. కథలో యాక్షన్, క్రైమ్, ఫ్యామిలీ ఎమోషన్స్‌కు అవకాశం ఉన్నప్పటికీ మ్యూజిక్ ద్వారా వాటి ప్రభావాన్ని మరింత పెంచే అవకాశం పూర్తిగా ఉపయోగపడలేదు.

మొత్తంగా ‘ఆదర్శ కుటుంబం’ త్రివిక్రమ్ మార్క్ ఫ్యామిలీ ఎమోషన్స్‌కు క్రైమ్ కామెడీ, మాస్ యాక్షన్ అంశాలను జోడించిన ప్రయత్నంగా కనిపిస్తుంది. ఫస్టాఫ్‌లో టైమ్‌పాస్ మూమెంట్స్, క్రైమ్, యాక్షన్‌తో కథ వేగంగా సాగినా సెకండాఫ్‌లో కథనం తడబడటం మైనస్‌గా మారుతుంది. అయితే వెంకటేష్ పెర్ఫార్మెన్స్, శ్రీనిధి శెట్టి పాత్ర, రిచ్ సినిమాటోగ్రఫీ, నిర్మాణ విలువలు, చివర్లో వచ్చే ఫ్యామిలీ ఎమోషన్స్ కొంత బలాన్నిస్తాయి. క్రైమ్ కామెడీతో పాటు త్రివిక్రమ్ డైలాగ్స్‌ను ఇష్టపడే ప్రేక్షకులకు ఈ సినిమా ఓ మోస్తారుగా నచ్చే అవకాశం ఉంది.

Aadarsha Kutumbam Movie Review  ఫస్ట్ హాఫ్, కామెడీ, వెంకీ నటనపై ప్రశంసలు.. సత్యకు మంచి మార్కులు!

సినిమా చూసిన ఓ ప్రేక్షకుడు సోషల్ మీడియాలో స్పందిస్తూ తమన్ సంగీతాన్ని ప్రత్యేకంగా ప్రశంసించారు. ఫ్యామిలీ సినిమాలకు సంగీతం అందించడంలో థమన్ టాలీవుడ్‌లో కీలకమైన బలంగా నిలుస్తున్నారని, ఈ చిత్రంలోనూ ఆయన వర్క్ చాలా బాగుందని పేర్కొన్నారు. సినిమాలోని కామెడీ సన్నివేశాలు కూడా బాగా నవ్వించాయని, వెంకటేష్ తనదైన స్క్రీన్ ప్రెజెన్స్, కామెడీ టైమింగ్‌తో మరోసారి ఆకట్టుకున్నారని అభిప్రాయపడ్డారు. మొత్తంగా వెంకటేష్–థమన్ కాంబినేషన్ సినిమాకు ప్రధాన ఆకర్షణగా నిలిచిందని ఆ ప్రేక్షకుడు తన పోస్టులో వెల్లడించారు. మరో ప్రేక్షకుడు వెంకటేష్, శ్రీనిధి శెట్టి జోడీ తెరపై బాగుందని పేర్కొన్నారు. సత్య కామెడీ, ఆయన నటన కూడా సినిమాకు అదనపు బలంగా నిలిచాయని ప్రశంసించారు. అయితే నారా రోహిత్, నివేదా పేతురాజ్ పాత్రలకు ఆశించిన స్థాయిలో ప్రాధాన్యత లభించలేదని అభిప్రాయపడ్డారు. సాంకేతిక అంశాల విషయానికి వస్తే బ్యాక్‌గ్రౌండ్ స్కోర్, ఎడిటింగ్, విజువల్స్ సినిమాకు చక్కగా సహకరించాయని, పాటలు మాత్రం అంతగా ఆకట్టుకోలేదని తెలిపారు.

ఈ ప్రేక్షకుడి అభిప్రాయం ప్రకారం సినిమా ఫస్ట్ హాఫ్ చాలా ఎంటర్‌టైనింగ్‌గా సాగుతుంది. విలన్ గ్యాంగ్‌కు సంబంధించిన సన్నివేశాలు, కామెడీ ట్రాక్ ప్రేక్షకులను అలరిస్తాయి. ముఖ్యంగా ఇంటర్వెల్ బ్లాక్ బాగా ఎలివేట్ అయిందని ప్రశంసించారు. అయితే ద్వితీయార్థంలో కథనం కొంత రొటీన్‌గా అనిపించిందని, మాల్ సీక్వెన్స్ పెద్దగా ప్రభావం చూపలేదని పేర్కొన్నారు. ట్రైన్ ఫైట్ సన్నివేశాలు కూడా అవసరానికి మించి సాగినట్లు అనిపించాయని తెలిపారు. సెకండాఫ్‌లో వచ్చే ఎమోషనల్ సీన్స్ ఆశించిన స్థాయిలో ప్రేక్షకులను కనెక్ట్ చేయలేకపోయాయని అభిప్రాయపడ్డారు. మొత్తంగా ‘ఆదర్శ కుటుంబం’ను ఒక అబోవ్ యావరేజ్ వైలెంట్ ఫ్యామిలీ యాక్షన్ ఎంటర్‌టైనర్‌గా అభివర్ణించారు.

Aadarsha Kutumbam Movie Review  త్రివిక్రమ్ మార్క్ ఉందా? సెకండాఫ్‌పై మాత్రం మిశ్రమ స్పందన

మరో ప్రేక్షకుడు తన సోషల్ మీడియా రివ్యూలో ఫస్ట్ హాఫ్‌లో త్రివిక్రమ్ శ్రీనివాస్ శైలి కనిపించిందని పేర్కొన్నారు. ముఖ్యంగా హీరో పరిచయ సన్నివేశాలు గురూజీ మార్క్‌లో ఉన్నాయని అభిప్రాయపడ్డారు. ప్రారంభ భాగంలోని కొన్ని సన్నివేశాలు ఆకట్టుకున్నాయని, ప్రీ-ఇంటర్వెల్ ట్విస్ట్‌తో పాటు ఆ తర్వాత వచ్చే ఫైట్ సీక్వెన్స్ సినిమాకు మంచి హైప్ తీసుకొచ్చాయని తెలిపారు. అయితే సెకండాఫ్‌లో కథకు సంబంధించిన బ్యాక్‌స్టోరీ అంత బలంగా అనిపించలేదని, ఆ దశ నుంచి సినిమా వేగం తగ్గిందని పేర్కొన్నారు. సత్య కామెడీ మాత్రం బాగా వర్కౌట్ అయిందని ప్రశంసించిన ఆ ప్రేక్షకుడు, చివరి భాగంలో అవసరానికి మించిన పంచ్‌లు, కథనంలో కనిపించిన ల్యాగ్ సినిమాకు మైనస్‌గా మారాయని అభిప్రాయపడ్డారు. వెంకటేష్–త్రివిక్రమ్ కాంబినేషన్ నుంచి ఆశించే స్థాయిలో సినిమా లేదని పేర్కొన్నారు. ఈ ఇద్దరి అభిమానులు సినిమాను ఒకసారి చూడవచ్చని, అయితే వారి కాంబినేషన్‌పై భారీ అంచనాలు పెట్టుకున్నవారికి కొంత నిరాశ కలిగే అవకాశం ఉందని తన అభిప్రాయాన్ని వెల్లడించారు.

ఇదిలా ఉంటే, ప్రీమియర్ షో చూసిన మరో ప్రేక్షకుడు మాత్రం సినిమాపై చాలా పాజిటివ్‌గా స్పందించారు. త్రివిక్రమ్ శ్రీనివాస్ మరోసారి తనదైన శైలిని చూపించారని, ‘త్రివిక్రమ్ ఈజ్ బ్యాక్’ అంటూ ప్రశంసించారు. వెంకటేష్ కూడా పూర్తి ఫామ్‌లో కనిపించారని, తనదైన కామెడీ టైమింగ్, నటనతో ప్రేక్షకులను ఆకట్టుకున్నారని పేర్కొన్నారు. ముఖ్యంగా ప్రీ-ఇంటర్వెల్ నుంచి సినిమాపై ఆసక్తి, ఉత్కంఠ మరింత పెరుగుతాయని, ఆ సమయంలో వచ్చే సన్నివేశాలు బాగా ఎగ్జైట్ చేశాయని తన పోస్టులో వివరించారు. మరో ప్రేక్షకుడి స్పందన మాత్రం సినిమా మొదటి భాగం, రెండో భాగం మధ్య ఉన్న తేడాను స్పష్టం చేసింది. ఫస్ట్ హాఫ్ చాలా బాగుందని, సెకండాఫ్ కూడా ఓ మోస్తరుగా ఆకట్టుకుందని ఆయన పేర్కొన్నారు. అయితే చివరి 30 నిమిషాల్లో సినిమా గ్రాఫ్ కొంత తగ్గిందని అభిప్రాయపడ్డారు. సత్య కనిపించే ప్రతి సన్నివేశం మంచి కామెడీని పంచిందని, మొత్తంగా సినిమా చూసిన తర్వాత ఒక మంచి ఫ్యామిలీ ఎంటర్‌టైనర్ చూసిన అనుభూతి కలిగిందని తెలిపారు.

Also Read :  Sai Pallavi : కాబోయే భర్తలో ఆ ఒక్క లక్షణం ఉండాల్సిందే.. జీవిత భాగస్వామిపై సాయిపల్లవి ఆసక్తికర కామెంట్స్..!

త్రివిక్రమ్‌ను ‘గురూజీ’గా సంబోధిస్తూ, ఆయన ఈ సినిమాను ఒక డీసెంట్ వెజ్ బిర్యానీలా అందించారని సరదాగా కామెంట్ చేశారు. అయితే చివరి భాగంలో మాత్రం సినిమా పవర్ కొంత తగ్గిందని పేర్కొన్నారు. అంతేకాకుండా ‘అజ్ఞాతవాసి’, ‘గుంటూరు కారం’ సినిమాలతో పోలిస్తే ‘ఆదర్శ కుటుంబం’ మెరుగ్గా ఉందని తన అభిప్రాయాన్ని పంచుకున్నారు. ఈ ప్రేక్షకుడు సినిమాకు 3.25/5 రేటింగ్ ఇచ్చారు. మొత్తంగా చూస్తే.. ‘ఆదర్శ కుటుంబం’పై సోషల్ మీడియాలో ఇప్పటివరకు వినిపిస్తున్న స్పందన మిశ్రమంగా ఉంది. వెంకటేష్ నటన, కామెడీ టైమింగ్, సత్య పెర్ఫార్మెన్స్, ఫస్ట్ హాఫ్, ఇంటర్వెల్ బ్లాక్, థమన్ బ్యాక్‌గ్రౌండ్ స్కోర్‌కు ప్రశంసలు దక్కుతున్నాయి. మరోవైపు సెకండాఫ్‌లోని కొన్ని సన్నివేశాలు, బ్యాక్‌స్టోరీ, చివరి భాగంలో కనిపించిన ల్యాగ్‌పై ప్రేక్షకులు అసంతృప్తి వ్యక్తం చేస్తున్నారు. ఇవన్నీ కొందరు ప్రేక్షకులు సోషల్ మీడియాలో పంచుకున్న అభిప్రాయాలు మాత్రమే. పూర్తి స్థాయి ప్రేక్షకుల స్పందన, సినిమా వసూళ్లను బట్టి ‘ఆదర్శ కుటుంబం’ థియేటర్లలో ఎలాంటి ఫలితాన్ని అందుకుంటుందో చూడాలి. Aadarsha Kutumbam Movie First Review , Aadarsha Kutumbam Movie Review , Aadarsha Kutumbam Review , ఆదర్శ కుటుంబం మూవీ రివ్యూ , ఆదర్శ కుటుంబం రివ్యూ , Venkatesh AK47 Movie, Trivikram Srinivas, Aadarsha Kutumbam , Aadarsha Kutumbam Review, Venkatesh Movie Review, Trivikram Srinivas, Aadarsha Kutumbam Twitter Review, Thaman Music