Konda Surekha : కొండా సురేఖ వివాదంలో బిగ్ ట్విస్ట్.. చర్యల జాప్యం వెనుక అసలు కారణాలివేనా?
Konda Surekha : తెలంగాణ రాజకీయాల్లో మంత్రి కొండా సురేఖ వ్యవహారం ఇంకా చర్చనీయాంశంగానే కొనసాగుతోంది. ఆమెపై కాంగ్రెస్ అధిష్టానం చర్యలు తీసుకుంటుందా? మంత్రి పదవి నుంచి తొలగిస్తుందా? అనే ప్రశ్నలు రాజకీయ వర్గాల్లో వినిపిస్తున్నాయి. అయితే ప్రస్తుత పరిస్థితుల్లో సురేఖపై వెంటనే కఠిన చర్యలు తీసుకోవడం అంత సులభం కాదనే అభిప్రాయాలు వ్యక్తమవుతున్నాయి. ఇందుకు రాజకీయంగా చాలా సున్నితమైన కారణాలు ఉన్నాయని విశ్లేషకులు చెబుతున్నారు. ముఖ్యంగా తెలంగాణలో రానున్న మున్సిపల్ కార్పొరేషన్ ఎన్నికలు ఈ వ్యవహారంలో కీలకంగా మారుతున్నాయి. వరంగల్ ప్రాంతంలో కొండా సురేఖకు స్థానికంగా బలమైన పట్టు ఉందనే అభిప్రాయం ఉంది. ఈ సమయంలో ఆమెను మంత్రి పదవి నుంచి తొలగిస్తే.. బీసీ మహిళా నేతకు కాంగ్రెస్ అన్యాయం చేసిందనే అంశాన్ని ప్రతిపక్షాలు ప్రజల్లోకి బలంగా తీసుకెళ్లే అవకాశం ఉందని రాజకీయ విశ్లేషకులు అంచనా వేస్తున్నారు. అదే సమయంలో ఎన్నికల వేళ ఈ అంశం కాంగ్రెస్కు ప్రతికూలంగా మారే ప్రమాదం కూడా ఉందని చెబుతున్నారు. సురేఖపై కఠిన చర్యలు తీసుకుంటే ఆమె నుంచి వచ్చే ఆరోపణలు, విమర్శలు ప్రతిపక్షాలకు రాజకీయంగా ఉపయోగపడే అవకాశాన్ని కొట్టిపారేయలేమనే చర్చ సాగుతోంది.
Konda Surekha : కొండా సురేఖ వివాదంలో బిగ్ ట్విస్ట్.. చర్యల జాప్యం వెనుక అసలు కారణాలివేనా?
Konda Surekha ఎన్నికల ముందు సురేఖపై వేటు వేస్తే కాంగ్రెస్కు ఇబ్బందేనా?
ఇప్పటికే ముఖ్యమంత్రి రేవంత్ రెడ్డిపై పార్టీలో ఉన్న అసంతృప్తి నివురుగప్పిన నిప్పులా ఉందనే చర్చ రాజకీయ వర్గాల్లో ఉంది. అలాంటి సమయంలో కొండా సురేఖపై చర్యలు తీసుకుంటే.. ఈ వ్యవహారం ద్వారా అంతర్గత అసమ్మతి మరింత బహిర్గతమయ్యే అవకాశం ఉందని విశ్లేషకులు భావిస్తున్నారు.ముఖ్యంగా రేవంత్ రెడ్డిని వ్యతిరేకించే వర్గాలు ఈ పరిణామాన్ని తమకు అనుకూలంగా ఉపయోగించుకుని కాంగ్రెస్లో అంతర్గత విభేదాలను మరింత తీవ్రతరం చేసే అవకాశం ఉందనే అభిప్రాయాలు వ్యక్తమవుతున్నాయి. దీనివల్ల పార్టీపై ప్రతికూల ప్రభావం పడటంతో పాటు, రానున్న మున్సిపల్ కార్పొరేషన్ ఎన్నికల్లో కూడా నష్టం జరిగే అవకాశం ఉందని రాజకీయ వర్గాలు అంచనా వేస్తున్నాయి.అందుకే కొండా సురేఖ అంశాన్ని తొందరపడి తేల్చకుండా కాంగ్రెస్ నాయకత్వం ఆచితూచి వ్యవహరిస్తోందనే టాక్ వినిపిస్తోంది. ఒకవేళ చర్యలు తీసుకున్నా.. అవి పూర్తిస్థాయిలో కాకుండా నామమాత్రంగా ఉండే అవకాశం ఉందని కొందరు విశ్లేషకులు చెబుతున్నారు. అయితే చర్యలు తీసుకోకుండా వ్యవహారాన్ని కొనసాగిస్తే.. సురేఖపై అసమ్మతి వర్గం నుంచి ఒత్తిడి మరింత పెరిగే అవకాశం ఉంది. దీంతో కాంగ్రెస్ అధిష్టానం రెండు వైపులా ఇబ్బందికర పరిస్థితిని ఎదుర్కొంటోందనే చర్చ సాగుతోంది.
రేవంత్ మౌనం వెనుక రాజకీయ లెక్కలు?
ఎన్నికల సమయంలో ఏదైనా తొందరపాటు నిర్ణయం తీసుకుంటే అది చివరకు పార్టీకి ఎదురుదెబ్బగా మారవచ్చన్న ఆందోళన కాంగ్రెస్లో ఉందని రాజకీయ వర్గాలు చెబుతున్నాయి. అందుకే ప్రస్తుతం వేచి చూసే ధోరణిని అవలంబిస్తున్నట్లు విశ్లేషకులు అభిప్రాయపడుతున్నారు. ఈ నేపథ్యంలో కొండా సురేఖ వివాదం ఇంకా కొనసాగుతూనే ఉంది. ముఖ్యమంత్రిగా ఉన్న రేవంత్ రెడ్డిపై సురేఖ కుమార్తె చేసిన ఆరోపణలు రాజకీయంగా తీవ్ర చర్చకు దారితీసినప్పటికీ.. రేవంత్ రెడ్డి కూడా ఈ విషయంలో మౌనం పాటించడం ఆసక్తికరంగా మారింది.సురేఖ వ్యవహారంపై వెంటనే స్పందించి నిర్ణయం తీసుకోవడం కంటే.. ఎన్నికల సమీకరణాలు, వరంగల్లో పార్టీ బలం, అంతర్గత అసమ్మతి వంటి అంశాలను పరిగణనలోకి తీసుకుని ముందుకు వెళ్లడమే మంచిదనే అభిప్రాయం కాంగ్రెస్లో ఉన్నట్లు రాజకీయ విశ్లేషకులు చెబుతున్నారు.అందుకే కొండా సురేఖపై చర్యల జాప్యం వెనుక రాజకీయ లెక్కలు ఉన్నాయా? రేవంత్ మౌనం వ్యూహాత్మకమేనా? అనే చర్చ తెలంగాణ రాజకీయాల్లో కొనసాగుతోంది. చివరకు కాంగ్రెస్ అధిష్టానం ఎలాంటి నిర్ణయం తీసుకుంటుందన్నది ఇప్పుడు ఆసక్తికరంగా మారింది.