Sajjala Ramakrishna Reddy : లిక్కర్ కేసులో సాయిరెడ్డి అరెస్ట్ కాకపోవడంపై సజ్జల సంచలన వ్యాఖ్యలు..!

Sajjala Ramakrishna Reddy  : వైసీపీ ప్రధాన కార్యదర్శి సజ్జల రామకృష్ణారెడ్డి, ఆ పార్టీకి చెందిన మాజీ ఎంపీ విజయసాయిరెడ్డి చేసిన ఆరోపణలపై తీవ్రంగా స్పందించారు. విజయసాయిరెడ్డి ఇటీవల రాసిన బహిరంగ లేఖలో చేసిన వ్యాఖ్యలతో పార్టీ శ్రేణుల్లో, ప్రజల్లో అపోహలు ఏర్పడే అవకాశం ఉందని భావించినందుకే తాను వివరణ ఇస్తున్నట్లు సజ్జల తెలిపారు. ముఖ్యంగా జగన్‌పై, వైసీపీలోని అంతర్గత వ్యవహారాలపై విజయసాయిరెడ్డి చేసిన వ్యాఖ్యలను ఆయన ఖండించారు. విజయసాయిరెడ్డి ప్రచారం కోసం ఆరాటపడుతున్నారని సజ్జల విమర్శించారు. తనపై ఎలాంటి కేసులు లేవని విజయసాయిరెడ్డి ఆందోళన చెందుతున్నారని, అందుకే వైసీపీపై ఈ తరహా వ్యాఖ్యలు చేస్తున్నారని అన్నారు. తాను పార్టీలో కేవలం ఒక కార్యకర్త మాత్రమేనని, తనకు ఎలాంటి ప్రత్యేక కోటరీ లేదని సజ్జల స్పష్టం చేశారు.

Sajjala Ramakrishna Reddy : లిక్కర్ కేసులో సాయిరెడ్డి అరెస్ట్ కాకపోవడంపై సజ్జల సంచలన వ్యాఖ్యలు..!

Sajjala Ramakrishna Reddy  జగన్ తర్వాత పార్టీలో నెంబర్ 2 స్థానం సాయిరెడ్డికే ఇచ్చారు: సజ్జల

వైసీపీలో విజయసాయిరెడ్డికి జగన్ అత్యంత ప్రాధాన్యత ఇచ్చారని సజ్జల గుర్తు చేశారు. జగన్ తర్వాత పార్టీలో నెంబర్ 2 స్థానాన్ని విజయసాయిరెడ్డికి కల్పించారని పేర్కొన్నారు. తాను ఎలాంటి రాజకీయ నేపథ్యం లేకుండా పార్టీలోకి వచ్చిన వ్యక్తినని, చార్టెడ్ అకౌంటెంట్‌గా ఉన్న విజయసాయిరెడ్డి కూడా జగన్ కారణంగానే రాజకీయంగా గుర్తింపు పొందారని సజ్జల వ్యాఖ్యానించారు.టీటీడీ బోర్డు సభ్యుడిగా, రాజ్యసభ సభ్యుడిగా, పార్లమెంటరీ పార్టీ నేతగా, ఢిల్లీలో ఆంధ్రప్రదేశ్ ప్రభుత్వ అధికార ప్రతినిధిగా విజయసాయిరెడ్డికి జగన్ అనేక కీలక పదవులు అప్పగించారని సజ్జల వివరించారు. పార్టీలో కూడా ఆయనకు ఎన్నో ముఖ్యమైన బాధ్యతలు ఇచ్చారని గుర్తు చేశారు. ఇంతటి ప్రాధాన్యత ఇచ్చిన జగన్‌పైనే ఇప్పుడు విజయసాయిరెడ్డి ఆరోపణలు చేయడం సరికాదని ఆయన అభిప్రాయపడ్డారు.జగన్ లేకుండా వైసీపీ లేదని సజ్జల స్పష్టం చేశారు. పార్టీలో జగన్‌నే నెంబర్ వన్ అని, పార్టీకి కర్త, కర్మ, క్రియ అంతా ఆయనేనని పేర్కొన్నారు. వైసీపీలో ఒక ప్రత్యేక కోటరీ ఉందనే ప్రచారాన్ని ప్రజల్లోకి తీసుకెళ్లేందుకు కొందరు ప్రయత్నిస్తున్నారని ఆయన విమర్శించారు.

2022లో విస్మరించారన్న ఆరోపణలపైనా సజ్జల వివరణ

2022లో తనను పార్టీ విస్మరించిందని విజయసాయిరెడ్డి చెబుతున్నారని సజ్జల ప్రస్తావించారు. అయితే అదే సమయంలో విజయసాయిరెడ్డికి రాజ్యసభ సీటు కేటాయించిన విషయాన్ని గుర్తు చేశారు. గతంలో తనతో పాటు విజయసాయిరెడ్డి కూడా తప్పుడు కేసుల కారణంగా జైలుకు వెళ్లారని, ఈ కారణంతోనే జగన్ ఆయనకు ప్రత్యేక ప్రాధాన్యత ఇచ్చారని సజ్జల పేర్కొన్నారు. జగన్‌పై విజయసాయిరెడ్డి చేసిన మత మార్పిడి ఆరోపణలపైనా సజ్జల స్పందించారు. వైఎస్సార్, జగన్ ఇద్దరూ అన్ని మతాలను గౌరవించే వ్యక్తులని చెప్పారు. ఈ అంశంపై తామంతా ఇంతకాలం సంయమనం పాటించామని, అయితే విజయసాయిరెడ్డి వ్యాఖ్యలతో అపోహలు ఏర్పడే అవకాశం ఉండటంతో ఇప్పుడు వివరణ ఇవ్వాల్సి వచ్చిందని తెలిపారు.విజయసాయిరెడ్డి పార్టీ ఏర్పాటు చేయడం తప్పు కాదని సజ్జల అన్నారు. అయితే ప్రచారం పొందాలనే ఉద్దేశంతో వైసీపీపై ఈ విధంగా వ్యాఖ్యలు చేయడం మాత్రం సరికాదని వ్యాఖ్యానించారు. తనకు, తన పార్టీకి ప్రచారం రావాలనే ఉద్దేశంతోనే విజయసాయిరెడ్డి ఈ తరహా వ్యాఖ్యలు చేస్తున్నారని ఆరోపించారు. తనను తాను ఎక్కువగా ఊహించుకోవడం వల్లే ఆయన ఈ విధంగా వ్యవహరిస్తున్నారని విమర్శించారు.

లిక్కర్ కేసులో అందరూ అరెస్ట్ అయితే.. సాయిరెడ్డి ఎందుకు కాలేదు?

ఇక లిక్కర్ కేసును కూడా సజ్జల ప్రస్తావించారు. ఈ కేసులో పలువురు అరెస్ట్ అయినప్పటికీ విజయసాయిరెడ్డి ఎందుకు అరెస్ట్ కాలేదని ఆయన ప్రశ్నించారు. ఇదే అంశాన్ని విజయసాయిరెడ్డి ప్రచారం కోసం ఉపయోగించుకుంటున్నారని సజ్జల వ్యాఖ్యానించారు. ఇకపై విజయసాయిరెడ్డి వ్యాఖ్యలను తాము సీరియస్‌గా తీసుకోబోమని స్పష్టం చేశారు.తనపై ఎలాంటి కేసులు లేవని విజయసాయిరెడ్డి ఆందోళన చెందుతున్నారని సజ్జల అన్నారు. అంతేకాకుండా తాను భౌతిక దాడికి పాల్పడ్డానంటూ విజయసాయిరెడ్డి ఆరోపిస్తున్నారని, నిజంగా అలాంటి ఘటన జరిగి ఉంటే ఫిర్యాదు చేయాలని సూచించారు.విజయసాయిరెడ్డి ఫిర్యాదు చేస్తే, ముఖ్యమంత్రి చంద్రబాబు నాయుడు ప్రభుత్వం తనపై అటెంప్ట్ టు మర్డర్ కింద కేసు పెట్టేందుకు సిద్ధంగా ఉందని సజ్జల సంచలన వ్యాఖ్యలు చేశారు. దీంతో వైసీపీలో తాజా పరిణామాలపై రాజకీయంగా మరోసారి చర్చ మొదలైంది.