Ys Jagan : వైసీపీలో కొత్త జోష్: కేడర్‌కు దగ్గరవుతున్న వైఎస్ జగన్!
Authored By Ramu Tandu Ramalingaiah
| The Telugu News |
Updated on: September 16, 2026, 12:48 pm
Ys Jagan మాజీ ముఖ్యమంత్రి, వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డి వ్యవహారశైలిలో గణనీయమైన మార్పు వచ్చిందన్న అంశం ఇప్పుడు పార్టీ వర్గాల్లో హాట్ టాపిక్‌గా మారింది
Ys Jagan : మాజీ ముఖ్యమంత్రి, వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డి వ్యవహారశైలిలో గణనీయమైన మార్పు వచ్చిందన్న అంశం ఇప్పుడు పార్టీ వర్గాల్లో హాట్ టాపిక్‌గా మారింది. ఇటీవలి కాలంలో జగన్ చేపడుతున్న జిల్లా పర్యటనలు, ఆయన నిర్వహిస్తున్న కార్యక్రమాలను నిశితంగా గమనిస్తున్న రాజకీయ విశ్లేషకులు అధినేతలో స్పష్టమైన పరివర్తన కనిపిస్తోందని అభిప్రాయపడుతున్నారు. 2024 సార్వత్రిక ఎన్నికల్లో అధికారం కోల్పోయిన తర్వాత చాలా రోజుల పాటు ఆయన కేవలం తాడేపల్లిలోని తన నివాసానికే, పార్టీ కేంద్ర కార్యాలయంలో నిర్వహించే పరిమిత సమీక్షా సమావేశాలకే పరిమితమయ్యారు. అయితే, క్షేత్రస్థాయిలో పార్టీ శ్రేణుల్లో ఉన్న తీవ్ర అసంతృప్తిని, నైరాశ్యాన్ని పారద్రోలేందుకు ఆయన ఇప్పుడు వ్యూహాత్మకంగా అడుగులు ముందుకు వేస్తున్నారు. తాజాగా జగన్ చేపట్టిన కర్నూలు పర్యటనే ఇందుకు బలమైన నిదర్శనంగా రాజకీయ పరిశీలకులు విశ్లేషిస్తున్నారు.
Ys Jagan : వైసీపీలో కొత్త జోష్: కేడర్‌కు దగ్గరవుతున్న వైఎస్ జగన్!
Ys Jagan ఐదేళ్ల పాలనలో ప్యాలెస్ పరదాలు.. చేదు ఓటమితో మారిన ప్రాధాన్యతలు
జగన్ రెడ్డి ముఖ్యమంత్రిగా ఉన్న ఐదేళ్ల కాలంలో తీవ్రమైన విమర్శలు ఎదుర్కొన్నారు. పార్టీకి చెందిన మంత్రులు, ఎమ్మెల్యేలు, ఎంపీలకు సైతం సీఎం అపాయింట్‌మెంట్ అంత సులభంగా దక్కేది కాదన్న అసంతృప్తి బహిరంగ రహస్యమే. అధినేతను కలిసేందుకు తాడేపల్లి క్యాంప్ ఆఫీసుకు వెళ్లిన ప్రజాప్రతినిధులను, సీనియర్ నాయకులను బయటే గంటల తరబడి నిలబెట్టేవారన్న ఆరోపణలు రాజకీయ వర్గాల్లో విస్తృతంగా ప్రచారంలో ఉన్నాయి. 2024 ఎన్నికల్లో వైఎస్సార్‌సీపీ ఎదుర్కొన్న ఘోర పరాజయానికి ఈ వ్యవహారశైలే ప్రధాన కారణాలలో ఒకటని పార్టీ నాయకులే అంతర్గతంగా చెప్పుకుంటారు. ప్రభుత్వంపై క్షేత్రస్థాయిలో ప్రజల్లో ఉన్న వాస్తవ అభిప్రాయాలను, అసంతృప్తులను అధినేతకు నేరుగా చేరవేసే అవకాశం ప్రజాప్రతినిధులకు లేకుండా పోవడంతో గ్రౌండ్ రియాలిటీ ఆయనకు తెలియకుండా పోయిందని, చివరకు ఎన్నికల ఫలితాల్లో ఆ చేదు అనుభవాన్ని చవిచూడాల్సి వచ్చిందని విశ్లేషకులు చెబుతున్నారు.
ఎన్నికల ఫలితాలు వచ్చిన వెంటనే కూడా పార్టీ శ్రేణులతో అధినేత సంబంధాలు అంత వేగంగా మెరుగుపడలేదు. దీంతో కేడర్‌లో నిరుత్సాహం మరింత పేరుకుపోయింది. అయితే ఈ ప్రమాదాన్ని ఆలస్యంగానైనా గుర్తించిన జగన్ రెడ్డి, తన పంథాను క్రమంగా మార్చుకుంటున్నారు. గతంలో కార్యకర్తలను తాడేపల్లి కేంద్ర కార్యాలయానికి పిలిపించుకుని ముఖాముఖి మాట్లాడిన ఆయన, ఇప్పుడు మరో అడుగు ముందుకేసి నేరుగా నేతల వద్దకే వెళ్లే ప్రయత్నాలు మొదలుపెట్టారు. దెబ్బతిన్న ప్రజా సంబంధాలను, కేడర్‌తో తెగిపోయిన బంధాలను తిరిగి బలోపేతం చేసుకునే లక్ష్యంతోనే ఆయన ఈ కార్యాచరణను ఎంచుకున్నారు.
Ys Jagan నేతల ఇళ్లలో శుభకార్యక్రమాలకు హాజరు.. దూరమైన వారిని దగ్గరకు చేర్చే వ్యూహం!
అధికారంలో ఉన్నప్పుడు సొంత పార్టీ నాయకులను కలవడానికే మొహం చాటేసిన జగన్ రెడ్డి, ఇప్పుడు తానే స్వయంగా వారి ముంగిటకు వెళ్తూ ఒక సరికొత్త సంకేతాన్ని పంపుతున్నారు. పార్టీ నాయకులంతా తన సొంత కుటుంబ సభ్యులతో సమానమన్న భావనను కలిగించేలా వారితో ఆత్మీయ సంబంధాలను నెరపుతున్నారు. ఇటీవల కాలంలో ఆయన వరుసగా పార్టీ నేతల ఇళ్లలో జరిగే వివాహాలు, శుభకార్యక్రమాలకు ప్రత్యేకంగా హాజరవుతుండటం దీనికి స్పష్టమైన నిదర్శనం. కర్నూలు పర్యటనలో భాగంగా మాజీ ఎమ్మెల్యే ఎస్వీ మోహన్ రెడ్డి నివాసంలో జరిగిన శుభకార్యక్రమానికి జగన్ స్వయంగా వెళ్లి దంపతులను ఆశీర్వదించారు.
అంతకుముందు వారం కూడా ఆయన హైదరాబాదుకు వచ్చి, పార్టీకి అత్యంత సన్నిహితుడిగా, సానుభూతిపరుడిగా పేరున్న రిటైర్డ్ ఐపీఎస్ అధికారి పీఎస్ఆర్ ఆంజనేయులు కుటుంబ కార్యక్రమంలో పాల్గొన్నారు. గతంలో ఎన్నడూ లేని విధంగా పార్టీ శ్రేణుల ఇళ్లకు స్వయంగా వెళ్తుండటం వెనుక.. పార్టీ నుంచి క్రమంగా దూరమవుతున్న వారిని తిరిగి అక్కున చేర్చుకునే బలమైన వ్యూహం దాగి ఉందని పరిశీలకులు భావిస్తున్నారు. ఈ మార్పు కేవలం పైపై మెరుగులా లేక శాశ్వత వైఖరా అనేది రాబోయే రోజుల్లో తేలనుంది.
Also read
