Smoking : అప్పుడప్పుడు సిగరెట్ తాగేవారు ఈ విషయం తప్పక తెలుసుకోండి!
Smoking : సిగరెట్ తాగడం వల్ల ఏళ్ల తర్వాత మాత్రమే ఆరోగ్య సమస్యలు వస్తాయని చాలామంది అనుకుంటారు. ‘‘ఇప్పుడే మొదలుపెట్టాను.. రోజుకు ఒకటో రెండో మాత్రమే తాగుతున్నాను.. దాంతో ఏమవుతుందిలే’’ అని తమను తాము సమర్థించుకునేవారు కూడా ఉన్నారు. మరికొందరు పార్టీలు, స్నేహితుల సమావేశాలు వంటి సందర్భాల్లో మాత్రమే సిగరెట్ తాగుతామని, తాము రెగ్యులర్ స్మోకర్లు కాదు కాబట్టి పెద్దగా ప్రమాదం ఉండదని భావిస్తుంటారు. కానీ ఈ ఆలోచన పూర్తిగా సరైనది కాదని వైద్యులు చెబుతున్నారు.సిగరెట్ పొగ శరీరంలోకి వెళ్లిన వెంటనే కొన్ని మార్పులు ప్రారంభమవుతాయని వరంగల్లోని అర్బన్ క్లినిక్ హాస్పిటల్కు చెందిన జనరల్ ఫిజీషియన్ డాక్టర్ సలీం తెలిపారు. ముఖ్యంగా గుండె, రక్తనాళాలు, ఊపిరితిత్తులపై ధూమపానం ప్రభావం చూపుతుందని వివరించారు. మొదట్లో ఈ మార్పులు చాలా స్వల్పంగా ఉండటం వల్ల బయటకు ఎలాంటి లక్షణాలు కనిపించకపోవచ్చని, అందుకే తాము పూర్తిగా ఆరోగ్యంగానే ఉన్నామని చాలామంది భావిస్తారని చెప్పారు.నిజానికి సమస్య బయటకు కనిపించే లక్షణాలతోనే మొదలవుతుందని అనుకోవడం పొరపాటని డాక్టర్ సలీం పేర్కొన్నారు. పొగను పీల్చిన వెంటనే శరీరం దానికి స్పందించడం ప్రారంభిస్తుందని తెలిపారు. ప్రారంభ దశలో దగ్గు, ఆయాసం లేదా ఛాతీలో అసౌకర్యం వంటి లక్షణాలు లేకపోయినా.. ధూమపానం వల్ల శరీరంపై ప్రభావం ఉండదని మాత్రం భావించకూడదని సూచించారు.
Smoking : అప్పుడప్పుడు సిగరెట్ తాగేవారు ఈ విషయం తప్పక తెలుసుకోండి!
Smoking ఒక్క సిగరెట్తోనే శరీరంలో ఏం జరుగుతుంది?
డాక్టర్ సలీం వివరాల ప్రకారం.. కొద్దిపాటి ధూమపానం చేసినా శరీరంలో కొన్ని తక్షణ మార్పులు సంభవించవచ్చు. సిగరెట్లో ఉండే నికోటిన్ కారణంగా గుండె కొట్టుకునే వేగం పెరగడంతో పాటు రక్తపోటు కూడా పెరిగే అవకాశం ఉంటుంది. అదే సమయంలో సిగరెట్ పొగ ఊపిరితిత్తుల్లోకి చేరినప్పుడు అక్కడ చికాకు, వాపు వంటి మార్పులు ప్రారంభమయ్యే అవకాశం ఉందని తెలిపారు.ఒక్కసారి జరిగే ఈ ప్రభావాలు అక్కడితో ముగిసిపోవు. ధూమపానం అలవాటుగా మారి పదేపదే కొనసాగితే గుండె, రక్తనాళాలు, ఊపిరితిత్తులపై పడే భారం క్రమంగా పెరుగుతుందని డాక్టర్ సలీం వివరించారు. కాలం గడిచే కొద్దీ ఈ ప్రభావాలు తీవ్రమైన ఆరోగ్య సమస్యలకు దారితీసే అవకాశం ఉంటుందని హెచ్చరించారు.ఇదే కారణంగా ‘‘నాకు దగ్గు లేదు.. ఆయాసం లేదు.. ఛాతీలో నొప్పి లేదు కాబట్టి నాకు ఏ సమస్యా లేదు’’ అని అనుకోవడం సరికాదని వైద్యులు సూచిస్తున్నారు. ధూమపానం వల్ల కలిగే ప్రభావాలు ప్రారంభంలో బయటకు కనిపించకపోవచ్చని, లక్షణాలు కనిపించే వరకు వేచి చూడటం మంచిది కాదని చెబుతున్నారు.
రోజుకు ఒక్క సిగరెట్ అయినా సేఫ్ కాదా?
‘‘రోజుకు ఒక్క సిగరెట్ మాత్రమే తాగుతాను’’, ‘‘అప్పుడప్పుడు మాత్రమే స్మోక్ చేస్తాను’’ అని చెప్పుకునేవారికి కూడా డాక్టర్ సలీం కీలక హెచ్చరిక చేశారు. ధూమపానంలో పూర్తిగా హాని లేని మోతాదు అంటూ ఏదీ లేదని స్పష్టం చేశారు.సిగరెట్ల సంఖ్య పెరిగే కొద్దీ ఆరోగ్య ప్రమాదం కూడా పెరగడం నిజమే. అయితే తక్కువ సంఖ్యలో సిగరెట్లు తాగడం వల్ల ప్రమాదం పూర్తిగా తొలగిపోదని తెలిపారు. అంటే రోజుకు ఒకటి లేదా అప్పుడప్పుడు ఒక సిగరెట్ మాత్రమే తాగుతున్నామని చెప్పడం వల్ల ధూమపానం పూర్తిగా సురక్షితమైన అలవాటుగా మారదని అర్థం.
అందువల్ల శరీరంలో కనిపించే కొన్ని మార్పులను నిర్లక్ష్యం చేయకూడదని డాక్టర్ సలీం సూచించారు. నిరంతర దగ్గు, మెట్లు ఎక్కేటప్పుడు సాధారణం కంటే ఎక్కువగా ఆయాసం రావడం, త్వరగా అలసిపోవడం, తరచూ ఛాతీ ఇన్ఫెక్షన్లు రావడం, గొంతులో చికాకు వంటి లక్షణాలు కనిపిస్తే జాగ్రత్తగా ఉండాలని చెప్పారు.ముఖ్యంగా ఛాతీలో నొప్పి రావడం లేదా విశ్రాంతిగా ఉన్న సమయంలోనే శ్వాస తీసుకోవడంలో ఇబ్బంది కలగడం వంటి లక్షణాలు ఉంటే తప్పనిసరిగా వైద్యులను సంప్రదించాలని సూచించారు. ఇలాంటి లక్షణాలను కేవలం ధూమపానం వల్లే అని స్వయంగా నిర్ణయించుకోకుండా, వైద్యుల సలహా తీసుకోవడం ముఖ్యమని పేర్కొన్నారు.
సిగరెట్ మానేస్తే శరీరం మళ్లీ కోలుకుంటుందా?
ధూమపానం చేసే వారికి డాక్టర్ సలీం ఒక ముఖ్యమైన మంచి విషయాన్ని కూడా చెప్పారు. సిగరెట్ మానేసిన తర్వాత శరీరం తనను తాను కోలుకునే ప్రక్రియను ప్రారంభిస్తుందని వివరించారు. కాలక్రమేణా ధూమపానం వల్ల గుండె, రక్తనాళాలు, ఊపిరితిత్తులపై ఏర్పడే ఆరోగ్య ప్రమాదాలు తగ్గే అవకాశం ఉంటుందని తెలిపారు.ఎంత త్వరగా సిగరెట్ మానేస్తే అంత ఎక్కువ ప్రయోజనం ఉంటుందని డాక్టర్ సలీం స్పష్టం చేశారు. చిన్న వయసులోనే మానేయలేకపోయినా.. ఏ వయసులో ధూమపానాన్ని వదిలిపెట్టినా ఆరోగ్యానికి ప్రయోజనం ఉంటుందని చెప్పారు. అందుకే ‘‘ఇప్పుడైతే ఏమీ కాలేదు’’ అనే ఆలోచనతో సిగరెట్ అలవాటును కొనసాగించడం కంటే వీలైనంత త్వరగా దూరంగా ఉండటమే భవిష్యత్ ఆరోగ్యానికి మంచిదని సూచించారు.
మొత్తంగా చూస్తే.. సిగరెట్ వల్ల ఆరోగ్యానికి నష్టం రావడానికి తప్పనిసరిగా సంవత్సరాలు పట్టాల్సిన అవసరం లేదని వైద్యుల వివరణ స్పష్టం చేస్తోంది. పొగ శరీరంలోకి వెళ్లిన వెంటనే గుండె, రక్తనాళాలు, ఊపిరితిత్తులు దానికి స్పందించడం ప్రారంభిస్తాయి. లక్షణాలు కనిపించకపోయినా ప్రమాదం లేదని భావించకుండా, వీలైనంత త్వరగా ధూమపానాన్ని మానేయడం ఆరోగ్యానికి మేలు చేస్తుంది.