హైదరాబాద్‌లోని ప్రముఖ పరిశోధనా సంస్థ అయిన సీఎస్ఐఆర్ – నేషనల్ జియోఫిజికల్ రీసెర్చ్ ఇన్స్టిట్యూట్ (NGRI) నిరుద్యోగులకు మంచి అవకాశాన్ని కల్పిస్తోంది. ఎలాంటి రాత పరీక్ష లేకుండా కేవలం ఇంటర్వ్యూ ఆధారంగానే వివిధ ప్రాజెక్ట్ పోస్టుల భర్తీకి నోటిఫికేషన్ విడుదల చేసింది. ఈ నోటిఫికేషన్ ద్వారా మొత్తం 07 ఖాళీలను భర్తీ చేయనున్నారు. ఇందులో ప్రాజెక్ట్ అసోసియేట్–I (03), ప్రాజెక్ట్ అసోసియేట్–II (02), సీనియర్ ప్రాజెక్ట్ అసోసియేట్ (01) మరియు రీసెర్చ్ అసోసియేట్-I (01) పోస్టులు ఉన్నాయి.

సంబంధిత విభాగాల్లో ఎంఎస్సీ, ఎంఈ లేదా ఎంటెక్ పూర్తి చేసిన అభ్యర్థులు ఈ పోస్టులకు దరఖాస్తు చేసుకోవచ్చు. ముఖ్యంగా రీసెర్చ్ అసోసియేట్ పోస్టులకు జియాలజీ లేదా జియోకెమిస్ట్రీలో పీహెచ్డీ ఉండాలని సంస్థ పేర్కొంది. ఈ పోస్టులకు దరఖాస్తు ప్రక్రియ ఇప్పటికే మార్చి 4న ప్రారంభమైంది. ఆసక్తి ఉన్న అభ్యర్థులు మార్చి 9వ తేదీలోపు ఆన్‌లైన్ ద్వారా తమ దరఖాస్తులను సమర్పించాల్సి ఉంటుంది. దరఖాస్తు చేసుకున్న అభ్యర్థులకు మార్చి 11న నేరుగా ‘వాక్-ఇన్ ఇంటర్వ్యూ’ నిర్వహిస్తారు.

ఎంపికైన అభ్యర్థులు NGRIలోని వివిధ పరిశోధనా ప్రాజెక్టులలో పనిచేసే అవకాశం పొందుతారు. ప్రభుత్వ నిబంధనల ప్రకారం అర్హులైన అభ్యర్థులకు మంచి వేతనంతో పాటు పరిశోధనా రంగంలో అనుభవం లభిస్తుంది. పూర్తి వివరాల కోసం అభ్యర్థులు అధికారిక వెబ్‌సైట్ www.ngri.res.in ను సందర్శించి, నోటిఫికేషన్‌ను క్షుణ్ణంగా చదవాలని అధికారులు సూచిస్తున్నారు.