PM Modi : మోదీ కొత్త సోషల్ మీడియా ఛాలెంజ్.. యువతతో గ్లోబల్ ప్రమోషన్!

PM Modi : జాతీయ చేనేత దినోత్సవం సందర్భంగా ప్రధాని నరేంద్ర మోదీ యువతకు ఒక ప్రత్యేక పిలుపునిచ్చారు. చేతితో నేసిన చేనేత దుస్తులు ధరించి “Get Ready With Me (GRWM)” వీడియోలు రూపొందించి సోషల్ మీడియాలో పంచుకోవాలని ఆయన సూచించారు. ఈ వినూత్న ఆలోచనతో భారతీయ చేనేతకు గ్లోబల్ స్థాయిలో గుర్తింపు తీసుకురావడమే కాకుండా, చేనేత కార్మిక కుటుంబాలకు ఆర్థికంగా బలాన్ని చేకూర్చాలని ప్రధాని ఉద్దేశం.

PM Modi : మోదీ కొత్త సోషల్ మీడియా ఛాలెంజ్.. యువతతో గ్లోబల్ ప్రమోషన్!

PM Modi జాతీయ చేనేత దినోత్సవం – చరిత్ర, ప్రాధాన్యం

ఆగస్టు 7న జరుపుకునే జాతీయ చేనేత దినోత్సవానికి ఉన్న చారిత్రక ప్రాధాన్యాన్ని మోదీ తన తాజా ఇన్‌స్టాగ్రామ్ రీల్‌లో వివరించారు. 1905 ఆగస్టు 7న ప్రారంభమైన స్వదేశీ ఉద్యమం భారత స్వాతంత్ర్య పోరాటంలో కీలక ఘట్టమని గుర్తుచేశారు. బ్రిటిష్ పాలనకు వ్యతిరేకంగా దేశవ్యాప్తంగా ప్రజలు స్వదేశీ ఉత్పత్తులను ప్రోత్సహిస్తూ ఐక్యంగా నిలిచిన రోజు ఇదేనని ఆయన చెప్పారు. ఈ చారిత్రక స్పూర్తినే ముందుకు తీసుకెళ్లాలని ప్రధాని పిలుపునిచ్చారు. జాతీయ చేనేత దినోత్సవం ముందురోజు విడుదల చేసిన ఈ రీల్‌లో మోదీ, చేనేత దుస్తుల ప్రాముఖ్యతను మాత్రమే కాదు, వాటి వెనుక ఉన్న కష్టాన్ని కూడా ప్రస్తావించారు. దేశంలోని లక్షలాది చేనేత కార్మికులు తమ ప్రతిభతో అద్భుతమైన వస్త్రాలను తయారు చేస్తున్నారని కొనియాడారు.

PM Modi GRWM ట్రెండ్‌తో చేనేతకు గ్లోబల్ గుర్తింపు

ఇటీవల సోషల్ మీడియాలో విస్తృతంగా ట్రెండ్ అవుతున్న “GRWM – Get Ready With Me ” కాన్సెప్ట్‌ను చేనేత ప్రచారానికి వినియోగించాలనే ఆలోచనను ప్రధాని ముందుకు తెచ్చారు. యువత చేనేత దుస్తులు ధరించి వీడియోలు రూపొందించి సోషల్ మీడియాలో షేర్ చేస్తే, మరింత మంది ఈ సంప్రదాయ వస్త్రాల వైపు ఆకర్షితులవుతారని ఆయన పేర్కొన్నారు.ఫ్రెండ్‌షిప్ డే సందర్భంగా యువత చూపిన ఉత్సాహాన్ని ప్రస్తావిస్తూ, అదే ఉత్సాహంతో ఆగస్టు 7న చేనేత దినోత్సవాన్ని జరుపుకోవాలని కోరారు. సోషల్ మీడియా శక్తిని సానుకూలంగా ఉపయోగించి భారతీయ సంప్రదాయాలను ప్రపంచానికి పరిచయం చేయాలని ఆయన విజ్ఞప్తి చేశారు.

భారతదేశంలోని వివిధ ప్రాంతాల్లో లభించే చేనేత వస్త్రాల వైవిధ్యం, కళాత్మకత ప్రపంచవ్యాప్తంగా ప్రత్యేక గుర్తింపు పొందాయని మోదీ తెలిపారు. ఈ దినోత్సవం ద్వారా ఆ కళాకారుల కృషిని గుర్తించి, వారికి మద్దతుగా నిలవడం ప్రతి ఒక్కరి బాధ్యత అని అన్నారు.ఇలాంటి కార్యక్రమాలు “ఆత్మనిర్భర్ భారత్” లక్ష్య సాధనలో కీలక పాత్ర పోషిస్తాయని ప్రధాని అభిప్రాయపడ్డారు. చిన్న, పేద చేనేత కుటుంబాలు ఆర్థికంగా బలపడాలంటే ప్రజల భాగస్వామ్యం అత్యవసరం అని చెప్పారు. ప్రతి ఒక్కరూ కనీసం ఒక చేనేత ఉత్పత్తిని కొనుగోలు చేసి, దానికి సంబంధించిన వీడియోను సోషల్ మీడియాలో పంచుకుంటే, దేశవ్యాప్తంగా ఉన్న చేనేత కళాకారుల ప్రతిభ ప్రపంచానికి మరింత చేరువ అవుతుందని పేర్కొన్నారు.

భారతీయ సంప్రదాయం, స్వదేశీ ఉత్పత్తులు, చేనేత కార్మికుల జీవనోపాధిని కాపాడాలనే లక్ష్యంతో ఈ ప్రత్యేక పిలుపునిచ్చిన ప్రధాని, జాతీయ చేనేత దినోత్సవాన్ని ప్రజల భాగస్వామ్యంతో మరింత అర్థవంతంగా మార్చాలని ఆకాంక్షించారు. యువత ముందుకు వచ్చి ఈ ఉద్యమంలో భాగస్వాములు అయితే, భారతీయ చేనేతకు అంతర్జాతీయ స్థాయిలో మరింత గుర్తింపు దక్కుతుందని ఆయన విశ్వాసం వ్యక్తం చేశారు.