Vijay TVK : విజయ్ పార్టీని TVK గెలిపించిన ఏడు హామీలు ఇవే..!

Vijay TVK : తమిళనాడు అసెంబ్లీ ఎన్నికల ఫలితాలు దేశవ్యాప్తంగా చర్చనీయాంశమయ్యాయి. రాజకీయ అరంగేట్రం చేసిన అతి తక్కువ కాలంలోనే నటుడు విజయ్ నేతృత్వంలోని తమిళగ వెట్రి కజగం (TVK) భారీ ఆధిక్యం దిశగా దూసుకుపోతోంది. దశాబ్దాలుగా రాష్ట్రాన్ని ఏలుతున్న ద్రావిడ పార్టీల కోటలను బద్ధలు కొట్టి విజయ్ ఈ స్థాయిలో సత్తా చాటడానికి ఆయన ప్రకటించిన సంక్షేమ పథకాలు మరియు హామీలు ప్రధాన భూమిక పోషించాయని విశ్లేషకులు భావిస్తున్నారు. ముఖ్యంగా మహిళలు, విద్యార్థులు మరియు రైతులను ఆకట్టుకునేలా ఆయన ఇచ్చిన 7 ప్రధాన హామీలు ఓటర్లలో బలమైన నమ్మకాన్ని కలిగించాయి.

Vijay TVK : విజయ్ పార్టీని TVK గెలిపించిన ఏడు హామీలు ఇవే..!

Vijay TVK అవేంటో ఇప్పుడు వివరంగా చూద్దాం

1. మహిళా సాధికారతకు పెద్దపీట – నెలకు రూ. 2,500

మహిళా ఓటర్లే లక్ష్యంగా విజయ్ ప్రకటించిన అత్యంత ఆకర్షణీయమైన హామీ ఇది. రాష్ట్రంలోని ప్రతి అర్హులైన మహిళకు నెలకు రూ. 2,500 ఆర్థిక సాయం అందిస్తామని ఆయన హామీ ఇచ్చారు. ఇది సాధారణ గృహిణులకు ఆర్థికంగా ఎంతో ఊరటనిచ్చే అంశం కావడంతో మహిళా లోకం టీవీకే వైపు మొగ్గు చూపింది.

2. ఉచిత గ్యాస్ సిలిండర్లు
నిత్యావసర ధరల పెరుగుదలతో సతమతమవుతున్న సామాన్యులను ఆకట్టుకోవడానికి విజయ్ ఏడాదికి 6 గ్యాస్ సిలిండర్లను ఉచితంగా అందజేస్తామని ప్రకటించారు. వంటగ్యాస్ ధరలు ఆకాశాన్నంటుతున్న తరుణంలో ఈ హామీ మధ్యతరగతి మరియు పేద వర్గాలకు పెద్ద ఊరటగా మారింది.

3. ఆడబిడ్డల పెళ్లికి ‘బంగారు’ కానుక
పేద కుటుంబాల్లో ఆడబిడ్డల పెళ్లి అనేది పెద్ద ఆర్థిక భారంతో కూడుకున్న పని. దీన్ని గమనించిన విజయ్, ఆడబిడ్డల వివాహ సమయానికి ప్రభుత్వం తరపున 8 గ్రాముల బంగారం బహుమతిగా ఇస్తామని హామీ ఇచ్చారు. ఈ పథకం గ్రామీణ ప్రాంతాల్లోని ఓటర్లను విశేషంగా ఆకర్షించింది.

4. ఉచిత బస్సు ప్రయాణం
కర్ణాటక, తెలంగాణ వంటి రాష్ట్రాల్లో సక్సెస్ అయిన మహిళలకు ఉచిత బస్సు ప్రయాణ పథకాన్ని విజయ్ కూడా తన మేనిఫెస్టోలో చేర్చారు. ఉద్యోగినులు మరియు విద్యార్థినుల ప్రయాణ భారాలను తగ్గించేలా ఈ నిర్ణయం తీసుకోవడంతో వారి మద్దతు టీవీకేకు లభించింది.

5. విద్యార్థులకు ఏటా రూ. 15 వేల సాయం
విద్యకు ప్రాధాన్యత ఇస్తూ, ప్రతి విద్యార్థికి చదువుల కోసం ఏటా రూ. 15,000 ఆర్థిక సాయం అందిస్తామని విజయ్ ప్రకటించారు. పేద విద్యార్థులు ఉన్నత చదువులు చదువుకోవడానికి ఈ మొత్తం ఎంతో దోహదపడుతుందని తల్లిదండ్రులు విశ్వసించారు.

6. నిరుద్యోగ భృతితో యువతకు అండ
యువత ఓట్లను రాబట్టడంలో టీవీకే విజయం సాధించింది. డిగ్రీ పూర్తి చేసిన నిరుద్యోగులకు నెలకు రూ. 4,000, డిప్లొమా చేసిన వారికి రూ. 2,500 చొప్పున నిరుద్యోగ భృతి కల్పిస్తామని హామీ ఇచ్చారు. ఉద్యోగ వేటలో ఉన్న యువతకు ఇది కొండంత అండగా నిలిచింది.

7. రైతులకు రుణమాఫీ వరాలు
వ్యవసాయ రంగాన్ని ఆదుకోవడానికి విజయ్ భారీ రుణమాఫీని ప్రకటించారు.

ఐదెకరాల లోపు భూమి ఉన్న రైతులకు అన్ని రకాల రుణాలు పూర్తిగా మాఫీ చేస్తామని తెలిపారు.

ఐదెకరాల కంటే ఎక్కువ భూమి ఉన్న రైతులకు వారి రుణంలో 50 శాతం మాఫీ చేస్తామని ప్రకటించడం రైతు వర్గాల్లో సంచలనం సృష్టించింది.

సినిమాల్లోనే కాకుండా నిజ జీవితంలోనూ తమ సమస్యలను తీర్చే నాయకుడిగా విజయ్‌ను తమిళ ప్రజలు చూస్తున్నారు. ఆయన ప్రకటించిన ఈ 7 హామీలు కేవలం కాగితాలకే పరిమితం కాకుండా, తమ జీవితాల్లో వెలుగులు నింపుతాయని ఓటర్లు బలంగా నమ్మడమే టీవీకే ఘనవిజయానికి దారితీసింది. మరి అధికారంలోకి వచ్చాక ఈ హామీలను విజయ్ ఏ విధంగా అమలు చేస్తారో వేచి చూడాలి.