Cultivation of Capsicum : క్యాప్సికం సాగుతో ఏటా రూ.4 కోట్లు సంపాదిస్తున్న యువతి
Young woman earns Rs. 4 crore annually by Cultivating Capsicum : మహారాష్ట్రలోని పుణే జిల్లా కల్వాడి గ్రామానికి చెందిన ప్రణిత అనే యువతీ, తన విద్యా నైపుణ్యాలను వ్యవసాయానికి జోడించి అద్భుతమైన విజయం సాధించింది. ఎంబీఏ పూర్తి చేసి ఫుడ్ ప్రాసెసింగ్ కంపెనీలో ఇంటర్న్షిప్ చేసిన ఆమె, ఉద్యోగం కంటే స్వయం ఉపాధినే ఎంచుకుంది. తన తండ్రి ప్రోత్సాహంతో 2020లో తమకున్న భూమిలో పాలీ హౌస్ వ్యవసాయాన్ని ప్రారంభించింది. క్యాప్సికం సాగును ఎంచుకున్న ప్రణిత, ఈ పంటతో ఏటా రూ. 4 కోట్ల టర్నోవర్ సాధిస్తూ దేశానికే ఆదర్శంగా నిలిచింది.
Cultivation of Capsicum
ప్రణిత తన వ్యవసాయ ప్రయాణాన్ని రూ.20 లక్షల పెట్టుబడితో ఒక ఎకరం విస్తీర్ణంలో పాలీ హౌస్లో క్యాప్సికం సాగుతో ప్రారంభించింది. కేవలం నాలుగు నెలల్లోనే 40 టన్నుల దిగుబడి సాధించి, పెట్టుబడి ఖర్చులు పోనూ రూ.12 లక్షల నికర లాభాన్ని పొందింది. ఈ విజయం ఆమెకు మరింత ఉత్సాహాన్నిచ్చింది. దీంతో ఆమె సాగును 25 ఎకరాలకు విస్తరించింది. విజ్ఞానంతో కూడిన ప్రణాళిక, ఆధునిక సాంకేతికతను ఉపయోగించి ఆమె ఈ స్థాయికి చేరుకుంది.
ప్రస్తుతం ప్రణిత వ్యవసాయం ద్వారా ఏటా రూ.2.25 కోట్ల నికర లాభం పొందుతోంది. ఇది కేవలం ఆమెకు ఆర్థికంగా లాభం చేకూర్చడమే కాకుండా, గ్రామీణ యువతకు ఒక ప్రేరణగా నిలుస్తోంది. వ్యవసాయంలో సాంప్రదాయ పద్ధతులతో కాకుండా, ఆధునిక పద్ధతులు, ప్రణాళికాబద్ధమైన విధానాలను అనుసరిస్తే ఎంత పెద్ద విజయం సాధించవచ్చో ప్రణిత నిరూపించింది. ఈ యువతి సాధించిన విజయం వ్యవసాయ రంగంలో కొత్త అవకాశాలను అన్వేషించాలనుకునే వారికి గొప్ప ఉదాహరణ.