GST 2.0 : తగ్గిన జీఎస్టీ వసూళ్లు..మధ్యతరగతి ప్రజల్లో సంతోషాలు
GST 2.0 : జీఎస్టీ శ్లాబుల్లో కేంద్ర ప్రభుత్వం తీసుకున్న తాజా సంస్కరణలు దేశవ్యాప్తంగా చర్చనీయాంశంగా మారాయి. ప్రధాని నరేంద్ర మోదీ దీపావళి కానుకగా ఈ మార్పులను ప్రకటించినప్పటికీ, వినియోగదారులు ముందుగానే కొనుగోళ్లు ఆపివేయడం వల్ల ప్రభుత్వం నిర్ణయాన్ని ముందే అమల్లోకి తెచ్చింది. కార్ల వంటి పెద్ద మొత్తంలో కొనుగోళ్లు జరిగే వస్తువులపై జీఎస్టీ తగ్గుతుందనే అంచనాతో వినియోగదారులు వేచి చూశారు. దీంతో మార్కెట్లో డిమాండ్ ఒక్కసారిగా పడిపోవడం, ఆర్థిక వ్యవస్థలో చలనం తగ్గిపోవడం ప్రభుత్వాన్ని ఈ నిర్ణయం త్వరగా తీసుకునేలా చేసింది.
నిత్యావసరాల వస్తువులు, ఆరోగ్య బీమా వంటి ప్రజలకు దగ్గరగా ఉండే అంశాలపై జీఎస్టీ తగ్గించడం వల్ల ప్రతి కుటుంబం కొంతవరకూ ఉపశమనం పొందనుంది. గతంలో ఎంఆర్పీ ధరతో పాటు అదనంగా జీఎస్టీ వసూలు చేయడం వల్ల ప్రజల్లో తీవ్ర అసంతృప్తి నెలకొంది. 18 శాతం వరకు ఆరోగ్య బీమాపై పన్ను విధించడం అన్యాయమని వచ్చిన విమర్శలకు కూడా సమాధానంగా ఈ సంస్కరణలు నిలుస్తాయి. ఈ మార్పుల వల్ల సాధారణ కుటుంబాలకు డబ్బు ఆదా కావడంతో పాటు, అవసరమైన వస్తువులను సులభంగా కొనుగోలు చేసే అవకాశం ఉంటుంది.
ప్రభుత్వానికి ఆదాయం తగ్గిపోతుందా అన్న సందేహం ఉన్నప్పటికీ ఆర్థిక నిపుణుల లెక్కల ప్రకారం వినియోగం పెరగడం వల్ల ఆ లోటు భర్తీ అవుతుంది. ప్రజల వద్ద డబ్బు మిగిలితే తిరిగి ఖర్చు పెరుగుతుంది, దాంతో జీఎస్టీ ఆదాయం కూడా తిరిగి పెరుగుతుంది. ఈ విధంగా ప్రభుత్వం తీసుకున్న కొత్త నిర్ణయం ప్రజలకు ఉపశమనం కలిగిస్తూనే ప్రభుత్వ ఆదాయాన్ని కూడా కాపాడుతుంది. దీని ద్వారా ఆర్థిక వ్యవస్థలో చలనం పెరిగి, మార్కెట్ తిరిగి ఉత్సాహంగా ముందుకు సాగుతుందనే నమ్మకం వ్యక్తమవుతోంది.
Also read
