Death | ముందస్తు ఆరోగ్య హెచ్చరిక.. చావుని ముందే చెప్పనున్న శరీరంలోని ఈ పార్ట్
Death | మన శరీరంలో జరిగే చిన్న మార్పులు కూడా రాబోయే ఆరోగ్య సమస్యలకు సంకేతాలు కావచ్చు. ముఖ్యంగా వాసన కోల్పోవడం అంత తేలికైన సమస్య కాదని తాజా అధ్యయనాలు సూచిస్తున్నాయి. ఇది కేవలం ముక్కు సమస్య మాత్రమే కాకుండా, మరణాన్ని కూడా అంచనా వేయగల ముఖ్య సూచికగా శాస్త్రవేత్తలు చెబుతున్నారు.
#image_title
PLOS One జర్నల్లో ప్రచురితమైన ఒక అధ్యయనం ప్రకారం, వాసన చూసే శక్తి తగ్గిన వ్యక్తుల్లో ఐదు సంవత్సరాల లోపు మరణించే ప్రమాదం ఎక్కువగా ఉంటుందని తేలింది. 57 నుండి 85 ఏళ్ల మధ్య వయస్సు గల సుమారు 3,000 మంది పురుషులు, మహిళలపై ఈ పరిశోధన జరిగింది. గులాబీ, పుదీనా, తోలు, నారింజ, చేప వాసనలని పరీక్షించారు. ఈ పరీక్ష ద్వారా వారి ఘ్రాణశక్తి బలాన్ని అంచనా వేశారు.
పరిశోధన ఫలితాలలో 5 ఏళ్లలో 12% మంది మరణించారు. వీరిలో 39% మంది వాసన పరీక్షలో పూర్తిగా విఫలమయ్యారు. 19% మందికి పాక్షిక వాసన గ్రహణశక్తి ఉంది. కేవలం 10% మందికి మాత్రమే పూర్తి ఘ్రాణశక్తి నిలిచింది. అధ్యయనం ప్రకారం, వాసన కోల్పోయిన వారికి ఇతరుల కంటే నాలుగు రెట్లు ఎక్కువ మరణ ప్రమాదం ఉన్నట్లు తేలింది.
వాసన కోల్పోవడానికి కారణాలు:
* న్యూరోడీజెనరేటివ్ వ్యాధులు : అల్జీమర్స్, పార్కిన్సన్స్ వంటి వ్యాధులు మెదడులోని ఘ్రాణ భాగాన్ని దెబ్బతీస్తాయి.
* రోగనిరోధక వ్యవస్థ వైఫల్యం : ఇది ఇన్ఫెక్షన్లు, శ్వాసకోశ సమస్యల ప్రమాదాన్ని పెంచుతుంది.
* పోషకాహార లోపం : ఊబకాయం, మధుమేహం, గుండె జబ్బుల అవకాశాలను పెంచుతుంది.
* వృద్ధాప్యం : వయసు పెరుగుతున్న కొద్దీ సహజంగానే వాసన చూసే శక్తి తగ్గిపోతుంది.
నిపుణుల అభిప్రాయం ప్రకారం, సాధారణ ఆరోగ్య పరీక్షల్లో నాసికా వాసన పరీక్ష ను కూడా చేర్చాలి. దీని ద్వారా నాడీ సంబంధిత వ్యాధులు లేదా ఇతర ఆరోగ్య ప్రమాదాలను ముందుగానే గుర్తించి సమయానికి చికిత్స చేయడం సాధ్యమవుతుంది.