TVK Vijay Statement : నటుడు విజయ్ స్థాపించిన తమిళగ వెట్రి కజగం (TVK) పార్టీ రాబోయే తమిళనాడు అసెంబ్లీ ఎన్నికలలో సంచలనం సృష్టించడానికి సిద్ధమవుతోంది. మధురైలో జరిగిన బహిరంగ సభలో పార్టీ చీఫ్ విజయ్ మాట్లాడుతూ, తమ పార్టీ రాష్ట్రంలోని మొత్తం 234 నియోజకవర్గాల్లో పోటీ చేస్తుందని, తమిళనాడులో విప్లవం తీసుకువస్తుందని ధీమా వ్యక్తం చేశారు. రాబోయే ఎన్నికలను తమ పార్టీ ప్రతిష్ఠాత్మకంగా తీసుకుందని, ప్రజల మద్దతుతో విజయం సాధిస్తామని ఆయన పేర్కొన్నారు.

విజయ్ తన ప్రసంగంలో తన పార్టీ యొక్క రాజకీయ, భావజాల శత్రువుల గురించి స్పష్టంగా చెప్పారు. ద్రవిడ మున్నేట్ర కజగం (DMK) తమ రాజకీయ ప్రత్యర్థి అని, భారతీయ జనతా పార్టీ (BJP) తమ భావజాల శత్రువని ఆయన తెలిపారు. ఫాసిస్ట్ శక్తులుగా బీజేపీని అభివర్ణించిన విజయ్, ఆ పార్టీతో తమకు ఎలాంటి పొత్తు ఉండదని తేల్చి చెప్పారు. “సింహం వేట మొదలైంది, ప్రతి ఇంటి తలుపు కొడతాం” అంటూ తన ప్రచార వ్యూహాన్ని వివరించారు. ఈ వ్యాఖ్యలు తమిళనాడు రాజకీయాల్లో కొత్త చర్చకు దారితీశాయి.

విజయ్ తన ప్రసంగంలో తాను కులం, మతం ఆధారంగా కాకుండా, తమిళుడిగా ప్రజలకు ప్రాధాన్యత ఇస్తానని స్పష్టం చేశారు. “ఎంత విమర్శిస్తే అంత ఎదుగుతాం. మనల్ని ఎవరూ ఆపలేరు” అంటూ తనపై వస్తున్న విమర్శలను తిప్పికొట్టారు. ఈ ప్రకటనలు తమిళనాడులోని యువత, అభిమానుల మధ్య ఆయనకు ఉన్న ప్రజాదరణను మరింత పెంచే అవకాశం ఉంది. ఈ ఎన్నికలు TVK పార్టీకి ఒక పరీక్షగా నిలవనున్నాయి. ఈ కొత్త పార్టీ రాజకీయాల్లో ఏ స్థాయిలో ప్రభావితం చేస్తుందో వేచి చూడాలి.