Rohit Sharma : ఐపీఎల్‌-2025 లో సీఎస్కేతో తాజాగా జరిగిన మ్యాచులో ముంబై ఇండియన్స్ అద్భుత ప్ర‌ద‌ర్శ‌న క‌న‌బ‌రిచి ఘ‌న విజ‌యం సాధించింది. ఏకంగా 9 వికెట్ల తేడాతో గెలుపొందింది. 177 పరుగుల లక్ష్యంతో బరిలోకి దిగిన ముంబై ఇండియన్స్ 15.4 ఓవర్లలోనే వికెట్ కోల్పోయి లక్ష్యాన్ని ఛేదించింది. విజయంలో రోహిత్ శర్మ (45 బంతుల్లో 76; 4 ఫోర్లు, 6 సిక్సులు), 226 స్ట్రైక్ రేటుతో సూర్య కుమార్ యాదవ్ (30 బంతుల్లో 68; 6 ఫోర్లు, 5 సిక్సులు) ఊచ‌కోత కోయడంతో సునాయాసంగా విజ‌యం సాధించింది.

Rohit Sharma అద‌ర‌గొట్టిన ముంబై..

గ‌త కొద్ది రోజులుగా ఫామ్ లేమితో బాధ‌ప‌డుతున్న రోహిత్ శ‌ర్మ ఇప్పుడు ఫామ్‌లోకి వ‌చ్చిన‌ట్టు క‌నిపిస్తుంది. ఇదే ఫామ్ మిగ‌తా మ్యాచ్‌ల‌లో కూడా కొన‌సాగిస్తే ప్ర‌త్య‌ర్ధుల‌కి చుక్కలు క‌న‌ప‌డ‌డం ఖాయం. అంతకుముందు టాస్‌ ఓడి తొలుత బ్యాటింగ్‌ చేసిన చెన్నై సూపర్ కింగ్స్ నిర్ణీత 20 ఓవర్లలో 5 వికెట్లు కోల్పోయి 176 పరుగులు చేసింది. రవీంద్ర జడేజా (53*), శివమ్‌ దూబే (50) అర్ధ శతకాలతో రాణించారు. ఆయుష్‌ మాత్రే (32), షేక్‌ రషీద్‌ (19), ఓవర్టన్‌ (4*) పరుగులు చేశారు. కెప్టెన్‌ ధోనీ (4), రచిన్‌ రవీంద్ర (5) నిరాశపరిచారు.

గాయం కారణంగా రుతురాజ్ గైక్వాడ్ మ్యాచ్‌కు దూరమైన సంగతి తెలిసిందే. అతడి స్థానంలో బరిలోకి దిగిన 17 ఏళ్ల ఆయూష్‌ మాత్రే.. తన అరంగేట్ర మ్యాచులోనే భారీ షాట్లతో అలరించాడు. రెండు సిక్సులు, నాలుగు ఫోర్లు బాది 32 పరుగుల చేశాడు. ఈ క్రమంలోనే చాహర్‌ బౌలింగ్‌లో శాంట్నర్‌ చేతికి చిక్కి పెవిలియన్ చేరాడు.