Double Bedroom Houses : డబుల్ బెడ్‌రూమ్ ఇళ్ల కేటాయింపులో ప్రభుత్వం కొత్త విధానం .. వారికి కేటాయించిన ఇళ్లు వెనక్కి ..!

Double Bedroom Houses : ప్రభుత్వం ప్రతిష్ఠాత్మకంగా అమలు చేస్తున్న డబుల్ బెడ్‌రూమ్ గృహాల పథకంపై కీలక మార్పులు చేపట్టింది. లబ్ధిదారులకు పారదర్శకంగా ఇళ్ల కేటాయింపులు చేయడం లక్ష్యంగా తీసుకున్న ఈ నిర్ణయం నిబంధనలను ఉల్లంఘించిన వారిపై కఠిన చర్యలకు దారితీస్తోంది. తాజాగా ప్రభుత్వం దాదాపు 19 వేల మంది లబ్ధిదారులకు నోటీసులు జారీ చేసి వారికి కేటాయించిన ఇళ్లను వెనక్కు తీసుకునే ప్రక్రియను ప్రారంభించింది.

Allotment of double bedroom houses.. empty houses to new beneficiaries ..!

Double Bedroom Houses : పారదర్శక కేటాయింపులపై దృష్టి

డబుల్ బెడ్‌రూమ్ ఇళ్ల పథకం పేదలకు గౌరవప్రదమైన నివాసాన్ని అందించడమే లక్ష్యంగా రూపొందించబడింది. ఈ క్రమంలో ప్రభుత్వం కేటాయింపుల్లో ఎలాంటి అవకతవకలు లేకుండా ఉండేందుకు కొత్త మార్గదర్శకాలను అమలు చేస్తోంది. గతంలో కేటాయించిన ఇళ్లలో నిజంగా నివసిస్తున్నారా లేదా అనే అంశంపై ప్రత్యేకంగా దృష్టి పెట్టింది. ఖాళీగా ఉంచిన ఇళ్లను గుర్తించి అర్హులైన ఇతర లబ్ధిదారులకు అందించాలనే ఉద్దేశంతో అధికారులు సమగ్ర సర్వే నిర్వహించారు.

Double Bedroom Houses : నిబంధనలు ఉల్లంఘించిన వారికి నోటీసులు

గత ప్రభుత్వ కాలంలో గ్రేటర్ హైదరాబాద్ పరిధిలో ఇళ్లు పొందిన పలువురు లబ్ధిదారులు వాటిలో నివసించడం లేదని అధికారులు గుర్తించారు. ముఖ్యంగా హైదరాబాద్, రంగారెడ్డి, మేడ్చల్ జిల్లాల్లో సుమారు 19 వేల ఇళ్లు ఖాళీగా ఉన్నట్లు వెల్లడైంది. ఈ నేపథ్యంలో ఇప్పటికే రెండు సార్లు నోటీసులు పంపినా స్పందన లేకపోవడంతో తాజాగా మూడోసారి హెచ్చరికలు జారీ చేశారు. ఈసారి కూడా స్పందించని లబ్ధిదారుల పేర్లను జాబితా నుంచి తొలగించి ఇళ్లను తిరిగి స్వాధీనం చేసుకోవాలని ప్రభుత్వం నిర్ణయించింది.

Double Bedroom Houses : ఖాళీ ఇళ్లను కొత్త లబ్ధిదారులకు కేటాయింపు

నగర శివారు ప్రాంతాల్లో నిర్మించిన సుమారు 90 వేల ఇళ్లను 2023 ఆగస్టులో ప్రభుత్వం కేటాయించింది. అయితే ప్రాథమిక సౌకర్యాల లేమి కారణంగా కొంతమంది లబ్ధిదారులు వాటిలో చేరలేదు. దీంతో ఆ ఇళ్లు ఖాళీగా ఉండిపోయాయి. ఇదే సమయంలో ఇందిరమ్మ ఇళ్ల కోసం భారీగా దరఖాస్తులు వస్తున్నాయి. ఈ పరిస్థితుల్లో ఖాళీగా ఉన్న డబుల్ బెడ్‌రూమ్ ఇళ్లను కొత్త అర్హులైన వారికి కేటాయించాలనే యోచనలో ప్రభుత్వం ఉంది. కాగా ప్రభుత్వం తీసుకున్న ఈ నిర్ణయం గృహాల సరైన వినియోగాన్ని నిర్ధారించడమే కాకుండా నిజంగా అవసరమైన వారికి ఇళ్లు అందేలా చేయడంలో కీలకంగా మారనుంది.