Telangana BharatNet : తెలంగాణ గ్రామాలకు గుడ్‌న్యూస్.. 12,769 పంచాయతీలకు హైస్పీడ్ ఇంటర్నెట్..!
Telangana BharatNet : తెలంగాణలోని గ్రామీణ ప్రజలకు త్వరలో డిజిటల్ సేవలు మరింత చేరువ కానున్నాయి. రాష్ట్రంలోని ప్రతి పల్లెకూ హైస్పీడ్ ఇంటర్నెట్ సదుపాయం కల్పించే దిశగా కేంద్ర, రాష్ట్ర ప్రభుత్వాలు కీలక ముందడుగు వేశాయి. సవరించిన భారత్‌నెట్ BharatNet ప్రోగ్రామ్‌లో భాగంగా తెలంగాణ ప్రభుత్వం కేంద్రంతో కీలక ఒప్పందం కుదుర్చుకుంది. ఈ ప్రాజెక్టు అమలు కోసం కేంద్ర ప్రభుత్వం రాష్ట్రానికి ఏకంగా రూ.3,185 కోట్ల ఆర్థిక సాయం అందించనుంది. ఈ నిధులతో తెలంగాణలోని మొత్తం 12,769 గ్రామ పంచాయతీలను రింగ్ నెట్‌వర్క్ కనెక్టివిటీతో అనుసంధానించడమే లక్ష్యంగా పెట్టుకున్నారు. ఈ ప్రాజెక్టు పూర్తయితే గ్రామాల్లోనూ పట్టణాలకు దీటుగా వేగవంతమైన ఇంటర్నెట్ సేవలు అందుబాటులోకి వచ్చే అవకాశం ఉంది. ఇప్పటివరకు డిజిటల్ సేవలకు దూరంగా ఉన్న గ్రామీణ కుటుంబాలకు కూడా బ్రాడ్‌బ్యాండ్ కనెక్షన్లు అందించనున్నారు. ముఖ్యంగా విద్యార్థులు, రైతులు, చిన్న వ్యాపారులు, గ్రామీణ ప్రజలకు ఈ నెట్‌వర్క్ ఎంతో ఉపయోగపడనుంది.
Telangana BharatNet : తెలంగాణ గ్రామాలకు గుడ్‌న్యూస్.. 12,769 పంచాయతీలకు హైస్పీడ్ ఇంటర్నెట్..!
Telangana BharatNet రూ.3,185 కోట్లతో 12,769 గ్రామ పంచాయతీలకు నెట్‌వర్క్
భారత్‌నెట్ ప్రాజెక్టులో భాగంగా తెలంగాణలో ఇప్పటికే 10,787 గ్రామ పంచాయతీల్లో నెట్‌వర్క్ సదుపాయం ఉంది. అయితే ఈ కనెక్టివిటీని మరింత మెరుగుపరిచేందుకు ప్రభుత్వం ప్రత్యేక చర్యలు చేపడుతోంది. ఇందులో భాగంగా మరో 1,946 గ్రామ పంచాయతీల్లో ప్రస్తుతం ఉన్న లీనియర్ నెట్‌వర్క్‌ను రింగ్ టోపాలజీకి అప్‌గ్రేడ్ చేయనున్నారు. అదనంగా 36 గ్రామ పంచాయతీల్లో పూర్తిగా కొత్తగా రింగ్ నెట్‌వర్క్ ఏర్పాటు చేయనున్నారు. ఇదే సమయంలో ఖమ్మం, రంగారెడ్డి, నిజామాబాద్ జిల్లాల్లో కొత్త ఆప్టికల్ ఫైబర్ కేబుల్ నెట్‌వర్క్‌ను విస్తరించనున్నారు. ఈ పనులన్నీ పూర్తయితే రాష్ట్రవ్యాప్తంగా 12,769 గ్రామ పంచాయతీలకు మెరుగైన నెట్‌వర్క్ కనెక్టివిటీ అందుబాటులోకి వస్తుంది. ఈ ప్రాజెక్టు ద్వారా సుమారు 2.93 లక్షల గ్రామీణ కుటుంబాలకు బ్రాడ్‌బ్యాండ్ ఇంటర్నెట్ కనెక్షన్లు కల్పించనున్నారు. ఒక్కో గ్రామీణ కనెక్షన్ కోసం రూ.10 వేల చొప్పున ఆర్థిక సహాయం అందించనుండటం ఈ ప్రాజెక్టులో మరో ముఖ్యమైన అంశం.
Telangana BharatNet టీ ఫైబర్‌కు అమలు బాధ్యతలు.. పదేళ్లపాటు నిర్వహణ
ఈ భారీ డిజిటల్ కనెక్టివిటీ ప్రాజెక్టును టీ ఫైబర్ (T-Fiber) ఆధ్వర్యంలో అమలు చేయనున్నారు. కేవలం ఆప్టికల్ ఫైబర్ నెట్‌వర్క్ ఏర్పాటు చేయడంతోనే బాధ్యతలు ముగియవు. నెట్‌వర్క్ నిర్వహణ, సేవలు నిరంతరాయంగా అందేలా చూడటం వంటి బాధ్యతలను కూడా వచ్చే పదేళ్లపాటు టీ ఫైబర్ చూసుకోనుంది. ముఖ్యమంత్రి రేవంత్ రెడ్డి ప్రత్యేక చొరవతో గ్రామీణ ప్రాంతాల్లో డిజిటల్ కనెక్టివిటీని వేగంగా విస్తరించేందుకు ప్రభుత్వం ప్రణాళికలు రూపొందించింది. ఈ లక్ష్యానికి అనుగుణంగా 2026 జూన్‌లో తెలంగాణ ప్రభుత్వం ట్రైకిల్ సంస్థను ఏర్పాటు చేసింది. గ్రామీణ ప్రాంతాలకు హైస్పీడ్ ఇంటర్నెట్‌ను చేరువ చేయడం ద్వారా డిజిటల్ సేవలను ప్రజలకు మరింత అందుబాటులోకి తీసుకురావాలని ప్రభుత్వం భావిస్తోంది.
విద్య నుంచి వైద్యం వరకు.. గ్రామీణ ప్రజలకు ఎన్నో ప్రయోజనాలు
ఈ హైస్పీడ్ ఇంటర్నెట్ సదుపాయం అందుబాటులోకి వస్తే గ్రామీణ ప్రాంతాల్లో అనేక మార్పులు చోటుచేసుకోనున్నాయి. ముఖ్యంగా విద్యార్థులు ఆన్‌లైన్ తరగతులు, డిజిటల్ లెర్నింగ్ ప్లాట్‌ఫామ్‌లు, ఇతర విద్యా వనరులను సులభంగా ఉపయోగించుకోవచ్చు. పట్టణాలకు వెళ్లకుండానే మెరుగైన విద్యా సమాచారం, ఆన్‌లైన్ శిక్షణ పొందే అవకాశం ఉంటుంది. రైతులకు కూడా ఈ ఇంటర్నెట్ కనెక్టివిటీ ఎంతో ఉపయోగకరంగా మారనుంది. వాతావరణ పరిస్థితులు, పంటల సాగుకు సంబంధించిన సమాచారం, వ్యవసాయ మార్కెట్ ధరలు, ప్రభుత్వ పథకాల వివరాలను ఎప్పటికప్పుడు ఆన్‌లైన్‌లో తెలుసుకోవచ్చు. అలాగే టెలీమెడిసిన్ ద్వారా వైద్య సేవలు పొందడం, ఈ-గవర్నెన్స్ సేవలను వినియోగించుకోవడం మరింత సులభం కానుంది.బ్యాంకింగ్ సేవలు, ఆన్‌లైన్ లావాదేవీలు, ఉపాధి అవకాశాలు కూడా గ్రామీణ ప్రజలకు చేరువవుతాయి. మొత్తంగా డిజిటల్ సేవల విషయంలో గ్రామీణ, పట్టణ ప్రాంతాల మధ్య ఉన్న అంతరాన్ని తగ్గించడంలో ఈ ప్రాజెక్టు కీలక పాత్ర పోషించనుంది.
Also Read : AP MPTC ZPTC Results : పరిషత్ పోరులో కూటమి దూకుడు.. ఇప్పటివరకు గెలిచిన అభ్యర్థులు వీరే..!
భారత్‌నెట్ అనేది దేశవ్యాప్తంగా గ్రామీణ ప్రాంతాలకు ఆప్టికల్ ఫైబర్ కేబుళ్ల ద్వారా బ్రాడ్‌బ్యాండ్ ఇంటర్నెట్ అందించేందుకు కేంద్ర ప్రభుత్వం చేపట్టిన జాతీయ మిషన్. ఈ పథకం తెలంగాణలో మరింత వేగంగా అమలైతే డిజిటల్ ఇండియా లక్ష్యాల దిశగా రాష్ట్రం మరో కీలక అడుగు వేసినట్లవుతుంది. గ్రామాల్లోని ప్రతి కుటుంబానికి ఇంటర్నెట్ సేవలు చేరువ కావడం ద్వారా విద్య, వైద్యం, వ్యవసాయం, ఉపాధి రంగాల్లో కొత్త అవకాశాలు ఏర్పడనున్నాయి.