Amaravati Capital : ఆంధ్రప్రదేశ్ రాజకీయాల్లో గత దశాబ్ద కాలంగా ‘అమరావతి’ ఒక ప్రధాన అంకంగా నిలిచింది. 2014లో విభజన అనంతరం ఏర్పడిన చంద్రబాబు ప్రభుత్వం, కేంద్రం నియమించిన నిపుణుల కమిటీ సూచనలను పక్కనపెట్టి మరీ, విజయవాడ-గుంటూరు మధ్య ఈ ప్రాంతాన్ని రాజధానిగా ఎంపిక చేయడం మొదటి నుంచీ వివాదాస్పదమైంది. మంత్రి నారాయణ నేతృత్వంలోని కమిటీ ద్వారా భూసేకరణ (ల్యాండ్ పూలింగ్) ప్రక్రియను చేపట్టి, వేల ఎకరాలను సేకరించిన తీరు రాజకీయంగా పెద్ద చర్చకు దారితీసింది. అయితే, 2019లో అధికారంలోకి వచ్చిన జగన్ ప్రభుత్వం ‘మూడు రాజధానుల’ ప్రతిపాదనను తెరపైకి తీసుకురావడంతో అమరావతి భవితవ్యం అంధకారంలో పడిపోయింది. ఈ క్రమంలోనే ఏపీ రాజధాని లేని రాష్ట్రంగా మిగిలిందనే విమర్శలు వెల్లువెత్తగా, రాజకీయ ప్రయోజనాల కోసం రైతుల ప్రయోజనాలను పణంగా పెట్టారనే ఆవేదన భూములిచ్చిన రైతుల్లో వ్యక్తమైంది.

అమరావతికి పార్లమెంటులో చట్టబద్ధత కల్పించే బిల్లు

ప్రస్తుతం కూటమి ప్రభుత్వం అధికారంలోకి వచ్చిన తర్వాత మళ్లీ అమరావతి పనులు వేగవంతం చేసినప్పటికీ, భూములిచ్చిన రైతుల్లో ఒక రకమైన అభద్రతా భావం ఇంకా కొనసాగుతోంది. “మళ్లీ ప్రభుత్వం మారితే మా పరిస్థితి ఏమిటి?” అన్న ప్రశ్న అధికారులకు, నాయకులకు సవాలుగా మారింది. ఈ అనిశ్చితిని తొలగించడానికి రాజధానిగా అమరావతికి పార్లమెంటులో చట్టబద్ధత కల్పించే బిల్లును ప్రవేశపెట్టడం ఒక కీలక పరిణామం. ఈ బిల్లు ఆమోదం పొందితే, ఏ ప్రభుత్వం అధికారంలో ఉన్నా రాజధానిని మార్చడం అంత సులభం కాదు. ఇది రాజధాని ప్రాంత రైతులకు అతిపెద్ద భరోసాగా నిలుస్తుంది. చట్టబద్ధత రావడం వల్ల పెట్టుబడిదారులలో కూడా నమ్మకం పెరిగి, ఈ ప్రాంత అభివృద్ధికి మార్గం సుగమం అవుతుంది.

“జగన్ వస్తే రాజధాని ఉండదు” అనే విమర్శ

రాజకీయంగా విశ్లేషిస్తే.. అమరావతికి చట్టబద్ధత రావడం వల్ల తెలుగుదేశం పార్టీకి ఒక ప్రధాన రాజకీయ అస్త్రం చేజారినట్లవుతుంది. ఎన్నికల సమయంలో “జగన్ వస్తే రాజధాని ఉండదు” అని చేసే విమర్శలకు ఇకపై తావుండదు, ఇది వైసీపీకి ఒక విధంగా రాజకీయ ఊరటనిచ్చే అంశమే. రాజధాని అంశాన్ని అడ్డం పెట్టుకుని ప్రత్యర్థిని ఇరుకున పెట్టే అవకాశం తగ్గినప్పటికీ, రైతుల నుంచి వస్తున్న తీవ్ర ఒత్తిడి నేపథ్యంలో కూటమి ప్రభుత్వం ఈ నిర్ణయం తీసుకోక తప్పలేదు. ఈ బిల్లు ఆమోదంతో పదేళ్ల సుదీర్ఘ రాజధాని వివాదానికి తెరపడటమే కాకుండా, ఏపీ భవిష్యత్తుకు ఒక స్పష్టమైన దిశానిర్దేశం లభించినట్లవుతుందని భావించవచ్చు.