Gold, Silver Rate Today, 6 February 2026 : దేశీయ మార్కెట్‌లో బంగారం, వెండి ధరలు ఒక్కసారిగా భారీగా దిగిరావడంతో వినియోగదారులకు పెద్ద ఊరట లభించింది. ఫిబ్రవరి 6వ తేదీ నాటికి హైదరాబాద్ నగరంలో 22 క్యారెట్ల బంగారం ధర తులం (10 గ్రాములు)పై రూ. 4,600 తగ్గి రూ. 1,41,550కి చేరింది. అదేవిధంగా, అత్యంత స్వచ్ఛమైన 24 క్యారెట్ల బంగారం ధర కూడా రూ. 5,020 మేర పతనమై రూ. 1,54,420 వద్ద ట్రేడవుతోంది. గత రెండు రోజులుగా స్వల్పంగా పెరుగుతూ వచ్చిన పసిడి ధరలు, అంతర్జాతీయ పరిణామాల నేపథ్యంలో ఒక్కరోజే ఇంత భారీగా పడిపోవడం విశేషం.

బంగారం కంటే వెండి ధరలో భారీ పతనం నమోదైంది. కేవలం ఒకే రోజులో కేజీ వెండి ధర ఏకంగా రూ. 20,000 తగ్గి రూ. 3,00,000 మార్కుకు చేరుకుంది. కిందటి రోజున ఇది రూ. 3.20 లక్షల వద్ద ఉండగా, గడిచిన వారం రోజుల్లో మొత్తంగా వెండి ధర లక్షన్నర రూపాయలకు పైగా తగ్గడం గమనార్హం. అంతర్జాతీయ మార్కెట్‌లో స్పాట్ గోల్డ్ మరియు సిల్వర్ రేట్లు భారీగా పడిపోవడంతో పాటు, డాలర్ విలువ పుంజుకోవడం వల్ల దేశీయ మార్కెట్‌లో ఈ స్థాయిలో ధరలు దిగొచ్చాయని విశ్లేషకులు చెబుతున్నారు.

ఈ ధరల పతనానికి ప్రధానంగా అమెరికా-ఇరాన్ మధ్య జరుగుతున్న దౌత్యపరమైన చర్చలు, అంతర్జాతీయ స్థాయిలో కొనసాగుతున్న ప్రాఫిట్ బుకింగ్ ప్రధాన కారణాలుగా కనిపిస్తున్నాయి. అల్-టైమ్ హై మార్కును తాకిన తర్వాత ఇన్వెస్టర్లు ఒక్కసారిగా అమ్మకాలకు మొగ్గు చూపడంతో బులియన్ మార్కెట్‌లో ధరలు కుప్పకూలాయి. 2026 కేంద్ర బడ్జెట్ ప్రభావం మరియు డాలర్ ఇండెక్స్ బలపడటం కూడా ఈ కరెక్షన్‌కు తోడయ్యాయి. రాబోయే రోజుల్లో ధరలు మరింత తగ్గే అవకాశం ఉన్నట్లు మార్కెట్ వర్గాల అంచనా.