Adipurush Trailer : జై శ్రీరాం నినాదాలతో దద్దరిల్లిన థియేటర్ లు !

Adipurush Trailer ; పాన్ ఇండియా హీరోగా మారిన ప్రభాస్ త్వరలోనే ‘ ఆదిపురుష్ ‘ మూవీతో ప్రేక్షకుల ముందుకు రాబోతున్నాడు. ఈ సినిమా ఎనౌన్స్ చేసినప్పటి నుంచి అభిమానుల్లో భారీ అంచనాలు నెలకొన్నాయి. ఆల్ ఇండియా మొత్తం ఈ సినిమా ఎప్పుడు రిలీజ్ అవుతుందా అని ఎంతో ఆసక్తిగా ఎదురు చూస్తున్నారు. ఓం రౌత్ దర్శకత్వం వహిస్తున్న ఈ సినిమా అత్యంత భారీ బడ్జెట్ తో తెరకెక్కింది. ఇక ఆదిపురుష్ ట్రైలర్ ని ప్రపంచ వ్యాప్తంగా ఏకంగా 75 దేశాలలో డిజిటల్ మాధ్యమాలతో పాటు బిగ్ స్క్రీన్ పై రిలీజ్ చేయబోతున్నారు. ఇక తెలుగు రాష్ట్రాలలో అయితే ఒక రోజు ముందుగానే ట్రైలర్ ని నేరుగా 100 కి పైగా స్క్రీన్ లలో ప్రదర్శించారు.

ఇది అరుదైన రికార్డ్ అని చెప్పాలి. ట్రైలర్ రిలీజ్ ద్వారా ఆదిపురుష్ సినిమాపై హైప్ క్రియేట్ చేయాలని సినిమా యూనిట్ గట్టిగా ఫిక్స్ అయింది. దానికి తగ్గట్టుగా ట్రైలర్ లాంచ్ ఈవెంట్ ని ప్లాన్ చేశారు. తాజాగా హైద్రాబాద్ లో ఏఎంబి మాల్ లో ఆదిపురుష్ మూవీ ట్రైలర్ రిలీజ్ ఈవెంట్ కి రెబల్ స్టార్ ప్రభాస్ బాలీవుడ్ బ్యూటీ కృతి సనన్, దర్శకుడు ఓం రౌత్ పాల్గొన్నారు. దీంతో అభిమానులు భారీ ఎత్తున మాల్ కు చేరుకున్నారు. ప్రభాస్ ప్రభాస్ అంటూ థియేటర్ లోకి వెళ్లి ఆదిపురుష్ ట్రైలర్ ని వీక్షించారు. ట్రైలర్ ని చూసిన అభిమానులు ట్విట్టర్ లో జై శ్రీరామ్ అంటూ ట్వీట్స్ చేస్తున్నారు.

అలాగే ట్రైలర్ లో స్క్రీన్ షాట్స్ తీస్తూ ట్విట్టర్ లో షేర్ చేస్తూ సూపర్ గా ఉందనికామెంట్స్ చేస్తున్నారు. ట్రైలర్ చూస్తుంటే గూస్ బంప్స్ అంటూ కామెంట్స్ చేస్తున్నారు. డైరెక్టర్ ఓం రౌత్ అంచనాలకి మించి ట్రైలర్ ని అద్భుతంగా ఆవిష్కరించారు అని ప్రశంసలు కురిపిస్తున్నారు. ఇక ప్రభాస్ రాకతో ఏఏంబి మాల్ అభిమానులతో కిక్కిరిసింది. ఇక థియేటర్ అయితే జై శ్రీరామ్ నినాదాలతో మారుమ్రోగిపోయింది. దేశ వ్యాప్తంగా ఇప్పుడు ట్విట్టర్ లో ఆదిపురుష్ ట్రైలర్ టాప్ ట్రెండింగ్ లో ఉంది. ఈ ట్రైలర్ ని బట్టి చూస్తే ఈ సినిమాపై అంచనాలు పెరుగుతున్నాయి. ఈ సినిమాతో ప్రభాస్ మరోసారి పాన్ ఇండియా స్థాయిలో తన సత్తా చాటనున్నాడు.