వేసవి కాలం మొదలైతే శరీరాన్ని చల్లగా ఉంచే ఆహారాలు, పానీయాలపై అందరి దృష్టి పడుతుంది. అధిక ఉష్ణోగ్రతల వల్ల డీహైడ్రేషన్‌, అలసట, నీరసం వంటి సమస్యలు ఎక్కువగా ఎదురవుతుంటాయి. అలాంటి సమయంలో సహజంగా శరీరానికి కూలింగ్ ఇచ్చే పానీయాలు తీసుకోవడం చాలా అవసరం. ప్రస్తుతం సోషల్ మీడియాలో వైరల్ అవుతున్న వాటర్‌మెలన్ సబ్జా జ్యూస్ కూడా అలాంటి హెల్తీ సమ్మర్ డ్రింక్‌లలో ఒకటి. పుచ్చకాయలోని నీటి శాతం, సబ్జా గింజల కూలింగ్ గుణాలు కలిసి ఈ డ్రింక్‌ను వేసవిలో బెస్ట్ నేచురల్ ఎనర్జీ డ్రింక్‌గా మార్చాయి.పుచ్చకాయలో 90 శాతం కంటే ఎక్కువ నీరు ఉంటుంది. అందువల్ల ఇది శరీరాన్ని హైడ్రేట్‌గా ఉంచడంలో కీలక పాత్ర పోషిస్తుంది. ఇందులో విటమిన్ A, విటమిన్ C, పొటాషియం, లైకోపీన్ వంటి పోషకాలు సమృద్ధిగా ఉంటాయి. ఇవి శరీరానికి తక్షణ శక్తిని అందించడమే కాకుండా చర్మాన్ని ఆరోగ్యంగా ఉంచడంలో కూడా సహాయపడతాయి. వేసవిలో శరీరంలో నీటి కొరత రాకుండా కాపాడటానికి పుచ్చకాయతో చేసిన జ్యూస్‌లు చాలా మంచివని నిపుణులు సూచిస్తున్నారు.

అలాగే సబ్జా గింజలు లేదా బేసిల్ సీడ్స్ కూడా వేసవిలో శరీరానికి సహజ కూలింగ్ అందించే ఆహారాల్లో ముఖ్యమైనవి. నీటిలో నానబెట్టిన తర్వాత ఇవి జెల్లీలా మారి శరీర వేడిని తగ్గించడంలో సహాయపడతాయి. జీర్ణక్రియను మెరుగుపరచడం, కడుపులో మంట తగ్గించడం, ఆకలి నియంత్రణ వంటి ప్రయోజనాలు కూడా సబ్జా గింజల్లో ఉన్నాయి. అందుకే ఇప్పుడు చాలామంది లెమన్ జ్యూస్‌, ఫలూదా, ఫ్రూట్ డ్రింక్స్‌లో సబ్జా గింజలను ఉపయోగిస్తున్నారు.

Sabja Juice Recipe  వాటర్‌మెలన్ సబ్జా జ్యూస్ తయారీకి కావాల్సిన పదార్థాలు

పుచ్చకాయ ముక్కలు – 2 కప్పులు
సబ్జా గింజలు – 1 టేబుల్ స్పూన్
పుదీనా ఆకులు – కొద్దిగా
నిమ్మరసం – 1 టీస్పూన్
తేనె లేదా చక్కెర – తగినంత
ఐస్ క్యూబ్స్ – అవసరమైనంత

ముందుగా సబ్జా గింజలను అరగంట పాటు నీటిలో నానబెట్టాలి. అవి ఉబ్బి జెల్లీ తరహాలో మారిన తర్వాత ఉపయోగించాలి. తర్వాత పుచ్చకాయ ముక్కలను మిక్సీలో వేసి పుదీనా ఆకులు, నిమ్మరసం, తేనె లేదా చక్కెర కలిపి బ్లెండ్ చేయాలి. అవసరమైతే కొద్దిగా చల్లని నీరు కూడా కలుపుకోవచ్చు.ఇప్పుడు ఒక గ్లాస్‌లో ముందుగా నానబెట్టిన సబ్జా గింజలు వేసి పైగా తయారుచేసుకున్న వాటర్‌మెలన్ జ్యూస్ పోయాలి. చివరగా ఐస్ క్యూబ్స్‌, పుదీనా ఆకులతో గార్నిష్ చేసి చల్లగా సర్వ్ చేయాలి. కొందరు ఇందులో బ్లాక్ సాల్ట్ లేదా జీలకర్ర పొడి కూడా కలుపుతారు. దీంతో రుచి మరింత పెరుగుతుంది. ఈ డ్రింక్ చిన్నారుల నుంచి పెద్దల వరకు అందరికీ ఎంతో ఉపయోగకరంగా ఉంటుంది. వేసవిలో బయట తిరిగే వారు, వర్కౌట్స్ చేసే వారు, డీహైడ్రేషన్ సమస్యతో బాధపడేవారు ఈ జ్యూస్‌ను రెగ్యులర్‌గా తీసుకుంటే శరీరానికి తక్షణ ఉపశమనం లభిస్తుంది. ముఖ్యంగా కూల్‌డ్రింక్స్‌కు బదులుగా ఇలాంటి నేచురల్ జ్యూస్‌లు తీసుకోవడం ఆరోగ్యానికి ఎంతో మంచిదని ఆరోగ్య నిపుణులు చెబుతున్నారు.