Credit Card Fraud : క్రెడిట్ కార్డు మోసాలు బారినపడకుండా ఉండాలంటే ఇలా చేయాల్సిందే !!

Credit Card : ఇటీవల కాలంలో క్రెడిట్ కార్డు మోసాలు విపరీతంగా పెరిగిపోయాయి. ముఖ్యంగా ఎస్‌బీఐ క్రెడిట్ కార్డు వినియోగదారులను లక్ష్యంగా చేసుకుని సైబర్ నేరగాళ్లు కోట్ల రూపాయలు కొల్లగొట్టిన సంఘటన వెలుగులోకి వచ్చింది. ఈ మోసగాళ్లు క్రెడిట్ కార్డు వివరాలను సేకరించి వాటితో ఎలక్ట్రానిక్ గిఫ్ట్ కార్డులు కొనుగోలు చేసి, వాటిని ట్రావెల్ ఏజెంట్లకు తిరిగి అమ్మి నగదుగా మార్చుకున్నారు. ఈ డబ్బును ట్రేస్ చేయకుండా ఉండేందుకు క్రిప్టోకరెన్సీల ద్వారా మనీలాండరింగ్ చేశారని తెలిసింది. ఇలాంటి మోసాల బారిన పడకుండా ఉండాలంటే కొన్ని ముఖ్యమైన జాగ్రత్తలు తీసుకోవడం తప్పనిసరి.

Credit Card Fraud : క్రెడిట్ కార్డు మోసాలు బారినపడకుండా ఉండాలంటే ఇలా చేయాల్సిందే !!

ముందుగా మీ క్రెడిట్ కార్డు వివరాలు, ఓటీపీ, సీవీవీ, పాస్‌వర్డ్‌ వంటి వాటిని ఎవరితోనూ పంచుకోకూడదు. బ్యాంకు అధికారులు ఎప్పుడూ ఇలాంటి సున్నితమైన సమాచారాన్ని ఫోన్ లేదా మెసేజ్ ద్వారా అడగరు. ఒకవేళ బ్యాంకు నుంచి అని చెప్పి ఎవరైనా కాల్ చేస్తే, వెంటనే అధికారిక వెబ్‌సైట్ ద్వారా లేదా నేరుగా బ్యాంకును సంప్రదించి సమాచారాన్ని ధృవీకరించుకోవాలి. అలాగే, మీ బ్యాంక్ అకౌంట్, క్రెడిట్ కార్డు ట్రాన్సాక్షన్లను ఎప్పటికప్పుడు గమనిస్తూ ఉండాలి. ఏదైనా అనధికారిక లావాదేవీ జరిగితే వెంటనే బ్యాంకుకు ఫిర్యాదు చేయడం అవసరం.

ఆన్‌లైన్ లావాదేవీలు చేసేటప్పుడు పబ్లిక్ వైఫై ఉపయోగించడం మానుకోవాలి. ఎందుకంటే అవి సురక్షితం కావు. మొబైల్ యాప్‌లను కేవలం గూగుల్ ప్లే స్టోర్ లేదా యాప్ స్టోర్ వంటి అధికారిక ప్లాట్‌ఫారమ్‌ల నుంచి మాత్రమే డౌన్‌లోడ్ చేసుకోవాలి. వాట్సాప్, ఇమెయిల్, లేదా ఎస్‌ఎంఎస్‌ల ద్వారా వచ్చే అనుమానాస్పద లింకులను అస్సలు క్లిక్ చేయకూడదు. ఒకవేళ మీ క్రెడిట్ కార్డులో ఏదైనా మోసం జరిగినట్లు గుర్తిస్తే, ఏమాత్రం ఆలస్యం చేయకుండా కార్డును బ్లాక్ చేయాలి. వెంటనే బ్యాంకుకు, సైబర్ క్రైమ్ పోలీసులకు ఫిర్యాదు చేయాలి. ఈ జాగ్రత్తలన్నీ పాటించడం ద్వారా మీ క్రెడిట్ కార్డు భద్రతను కాపాడుకోవచ్చు.