Jaggery Tea | శీతాకాలంలో ఆరోగ్యానికి మేలు చేసే బెల్లం టీ .. ఇలా చేస్తే ఎప్పుడూ విరగదు!

Jaggery Tea | చల్లని వాతావరణం మొదలయ్యాక వేడి వేడి టీ కోసం మనసు తహతహలాడుతుంటుంది. అయితే ఈ సీజన్‌లో సాధారణ టీ కంటే బెల్లం టీ (Jaggery Tea) తాగడం ఆరోగ్యానికి మరింత మేలు చేస్తుందని నిపుణులు సూచిస్తున్నారు. బెల్లం శరీరానికి వేడినిచ్చే గుణాలతో పాటు జీర్ణశక్తిని మెరుగుపరచే లక్షణాలు కలిగి ఉంటుంది.

అయితే చాలా మంది తయారీ సమయంలో ఎదుర్కొనే పెద్ద సమస్య టీ విరిగిపోవడం (curdling) . పాలలో బెల్లం కలపగానే టీ విడిపోవడం వల్ల రుచి, రూపం రెండూ దెబ్బతింటాయి. దీనికి కారణం బెల్లం, పాల మధ్య ఉన్న ఉష్ణోగ్రత తేడా మరియు ఆమ్ల-క్షార ప్రతిచర్య అని నిపుణులు చెబుతున్నారు.

టీ విరగకుండా తయారుచేసే సరైన పద్ధతి

1. ముందుగా రెండు కప్పుల నీరు ఒక గిన్నెలో వేడి చేయాలి.
2. నీరు మరుగుతున్నప్పుడు మూడు చిన్న బెల్లం ముక్కలు  వేసి కరిగించాలి. (గమనిక: బెల్లాన్ని ఎప్పుడూ వేడి నీటిలోనే కరిగించాలి).
3. బెల్లం కరుగుతుండగా కొద్దిగా అల్లం, యాలకులు, ఒక లవంగం వేసి మరగనివ్వాలి.
4. రుచి కోసం కొద్దిగా నల్లమిరియాలు లేదా సోంపు కూడా కలపవచ్చు.
5. తరువాత రెండు టీ స్పూన్ల టీపొడి వేసి బాగా మరగనివ్వాలి.
6. మరో గిన్నెలో ఒకటిన్నర కప్పు పాలను వేడి చేయాలి.
7. చివరగా వేడి పాలను టీ మిశ్రమంలో కలిపి రెండు నిమిషాలు మరగనివ్వాలి.

ఇలా తయారుచేసిన బెల్లం టీ రుచికరంగా, సువాసనభరితంగా ఉండటమే కాకుండా ఎప్పటికీ విరిగిపోదు .

బెల్లం టీ ఆరోగ్య ప్రయోజనాలు

* శరీరాన్ని వెచ్చగా ఉంచి చలి ప్రభావాన్ని తగ్గిస్తుంది.
* జీర్ణక్రియను మెరుగుపరుస్తుంది.
* రక్త ప్రసరణను సక్రమంగా ఉంచి శక్తిని అందిస్తుంది.
* అల్లం, యాలకుల కలయికతో రోగనిరోధక శక్తి పెరుగుతుంది.

శీతాకాలంలో రోజుకు ఒకసారి బెల్లం టీ తాగడం ఆరోగ్యానికి మంచిదిగా, శరీరానికి సహజ వేడి అందించే పద్ధతిగా వైద్య నిపుణులు సూచిస్తున్నారు.