HIV : ప్రపంచవ్యాప్తంగా మానవాళిని వేధిస్తున్న హెచ్‌ఐవీ (HIV) వైరస్‌ను నివారించడంలో మరో ముఖ్యమైన ముందడుగు పడింది. అమెరికా ఫుడ్ అండ్ డ్రగ్ అడ్మినిస్ట్రేషన్ (FDA) తాజాగా యెజ్టుగో (Sunlenca – Lenacapavir) అనే కొత్త ఔషధాన్ని ఆమోదించింది. గిలియడ్ సైన్సెస్ రూపొందించిన ఈ ఔషధం ప్రత్యేకత ఏమిటంటే.. ఏడాదిలో కేవలం రెండు సార్లు మాత్రమే ఇవ్వాల్సిన ఇంజెక్షన్. ఇది హెచ్‌ఐవీ నుంచి రక్షణ కల్పించడంలో అత్యంత ప్రభావవంతమైనదిగా క్లినికల్ ట్రయల్స్ ద్వారా నిరూపితమైంది. ప్రతి ఆరు నెలలకు ఒకసారి ఇచ్చే ఈ టీకా పొందిన 99.9% మంది వ్యక్తులు HIV నెగటివ్‌గానే ఉన్నారని అధ్యయనాలు పేర్కొంటున్నాయి.

HIV హెచ్‌ఐవీ బారినుండి రక్షించే ఇంజెక్షన్ వచ్చింది..కాకపోతే

ఈ ఔషధాన్ని లైంగిక సంబంధం ద్వారా హెచ్‌ఐవీ సంక్రమించే ప్రమాదం ఉన్న 35 కిలోల బరువుతో ఉన్న పెద్దలు, యువతకు వాడేందుకు అనుమతి లభించింది. ఇది గత రెండు దశాబ్దాలుగా పరిశోధనలో ఉన్న మెడికేషన్ కావడం విశేషం. ఇతర హెచ్‌ఐవీ నివారణ ఔషధాలతో పోలిస్తే ఇది చాలా రకాల దశల్లో వైరస్‌కి అడ్డుకట్ట వేస్తుంది. రోజూ మందులు తీసుకునే బాధ లేకుండా సంవత్సరం మొత్తానికి కేవలం రెండు డోసులతో సరిపోతుండటం వల్ల, ప్రజలు ముఖ్యంగా మహిళలు, అణగారిన వర్గాలు, సామాన్యుల మధ్య ఇది విస్తృతంగా ఉపయోగపడనుంది.

యెజ్టుగో లో ఉండే ప్రధాన సమ్మేళనం లెనాకాపావిర్ అనే యాంటీరెట్రోవైరల్, హెచ్‌ఐవీ జీవిత చక్రంలో పలు దశల్లో వైరస్‌ను అడ్డుకుంటుంది. దీని ప్రభావం దాదాపు 12 నెలలపాటు శరీరంలో ఉంటుంది. ఇది కేవలం అమెరికాలోనే కాకుండా, ఇతర దేశాలనూ దీర్ఘకాలంలో ఆశాజనక మార్గం వైపు నడిపించే ఔషధంగా మారనుంది. దీనిని గుర్తించిన రోజు హెచ్‌ఐవీ చరిత్రలో మైలురాయిగా నిలుస్తుందని పరిశోధకులు భావిస్తున్నారు.