Vishwanath And Sons Movie Review : విశ్వనాథ్ అండ్ సన్స్ మూవీ రివ్యూ అండ్ రేటింగ్..!
Authored By Ramu Tandu Ramalingaiah
| The Telugu News | Updated on :
14 August 2026,
1:02 pm 
Vishwanath And Sons Movie Review సూర్య, మమితా బైజు ప్రధాన పాత్రల్లో వెంకీ అట్లూరి తెరకెక్కించిన ‘విశ్వనాథ్ అండ్ సన్స్’ ఎలా ఉంది? కథ, ఎమోషన్స్, నటన, ఫస్టాఫ్, సెకండాఫ్
Vishwanath And Sons Movie Review : కుటుంబ కథలు, భావోద్వేగాలు, ప్రేమ, వినోదం కలగలిసిన సినిమాలు ప్రేక్షకులకు ఎప్పుడూ ప్రత్యేక అనుభూతిని ఇస్తుంటాయి. ఈ నేపథ్యంలో దర్శకుడు వెంకీ అట్లూరి తెరకెక్కించిన ‘విశ్వనాథ్ అండ్ సన్స్’ సినిమా ప్రేక్షకుల ముందుకు వచ్చింది. సూర్య ప్రధాన పాత్రలో నటించిన ఈ చిత్రంలో మమితా బైజు, రాధిక శరత్ కుమార్, రవీనా టాండన్, నాజర్ తదితరులు కీలక పాత్రల్లో కనిపించారు. సినిమా కథ విషయానికి వస్తే.. సంజయ్ విశ్వనాథ్ (సూర్య) ఒలింపిక్స్లో షూటింగ్ విభాగంలో గోల్డ్ మెడల్ సాధించిన వ్యక్తి. అంతేకాదు, ఎంతో సంపన్నమైన కుటుంబానికి చెందిన పారిశ్రామికవేత్త. 40 ఏళ్లు దాటినా పెళ్లి చేసుకోకుండా ఒంటరిగానే జీవిస్తుంటాడు. అయితే తమ కుటుంబానికి వారసుడు లేడనే బాధతో తల్లి నిర్మలమ్మ (రాధిక శరత్ కుమార్) పడుతున్న వేదనను అర్థం చేసుకున్న సంజయ్.. సరోగసీ ద్వారా ఒక కొడుకును పొందాలని నిర్ణయించుకుంటాడు. అలా సరోగసీ ద్వారా జన్మించిన అతని కొడుకు అభయ్ జీవితంలో ఊహించని సమస్య ఎదురవుతుంది. అభయ్కు బోన్ మ్యారో రిప్లేస్మెంట్ సర్జరీ అవసరం అవుతుంది. దీంతో సరోగసీ తల్లి మ్యాడీ (మమితా బైజు) తో సంజయ్కు మరోసారి పరిచయం ఏర్పడుతుంది. అభయ్కు బోన్ మ్యారో డోనర్గా మ్యాడీ ఇండియాకు వస్తుంది.ఈ క్రమంలో సంజయ్ ప్రవర్తన, అతని వ్యక్తిత్వం, మంచితనం మ్యాడీని ఆకట్టుకుంటాయి. అతనిపై ప్రేమ పెంచుకుంటుంది. చివరకు సంజయ్కు తన ప్రేమను వ్యక్తపరుస్తుంది. కానీ సంజయ్ మాత్రం వారి మధ్య ఉన్న వయసు వ్యత్యాసాన్ని కారణంగా చూపిస్తూ మ్యాడీ ప్రేమను తిరస్కరిస్తాడు.
Vishwanath And Sons Movie Review : విశ్వనాథ్ అండ్ సన్స్ మూవీ రివ్యూ అండ్ రేటింగ్..!
Vishwanath And Sons Movie Review సంజయ్ ఎందుకు పెళ్లి చేసుకోలేదు? అసలు కథ ఏంటి?
సంజయ్ 40 ఏళ్లు దాటినా పెళ్లి చేసుకోకుండా బ్రహ్మచారిగానే ఎందుకు మిగిలిపోయాడు? అతని జీవితంపై తండ్రి విశ్వనాథ్ తీసుకున్న నిర్ణయం ఎలాంటి ప్రభావం చూపింది? తన తల్లి నిర్మలమ్మ కోసం సంజయ్ తన వ్యక్తిగత జీవితాన్ని ఎలా త్యాగం చేశాడు? సరోగసీ ద్వారా వారసుడిని పొందిన సంజయ్కు ఆ తర్వాత ఎదురైన సమస్య ఏంటి? సరోగసీ మదర్ మ్యాడీతో అతని అనుబంధం ఎలా కొనసాగింది? సంజయ్ తన ప్రేమను తిరస్కరించిన తర్వాత మ్యాడీ ఏ నిర్ణయం తీసుకుంది? ఇదే సమయంలో సంజయ్ కుటుంబంలో తన చెల్లెలి పెళ్లికి సంబంధించిన సమస్య ఎలా ఎదురైంది? ఆ సమస్యను అతను ఎలా పరిష్కరించాడు? కుటుంబంలో ఉన్న విభేదాలను ఎలా చక్కదిద్దాడు? చివరికి సంజయ్, మ్యాడీ పెళ్లి చేసుకున్నారా? మ్యాడీ చేసిన ప్రేమ, పెళ్లి ప్రతిపాదనను సంజయ్ అంగీకరించాడా? అనే ప్రశ్నలకు సమాధానమే ‘విశ్వనాథ్ అండ్ సన్స్’ కథ.
Vishwanath And Sons Movie Review హై నోట్తో మొదలైన కథ.. ఫస్టాఫ్లో ఫుల్ ఎంటర్టైన్మెంట్
దర్శకుడు వెంకీ అట్లూరి సినిమాను ఒలింపిక్స్లో షూటింగ్లో సంజయ్ గోల్డ్ మెడల్ సాధించే సన్నివేశంతో హై నోట్లో ప్రారంభించాడు. కథ మొదలైన తర్వాత మళ్లీ ఎక్కడా వేగం తగ్గకుండా ముందుకు తీసుకెళ్లాడు. ఒక్కసారి కథ టేకాఫ్ తీసుకున్న తర్వాత ప్రేక్షకులకు ల్యాండింగ్ అయ్యే అవకాశం ఇవ్వకుండా ఎంగేజింగ్గా నడిపించాడు. ఫస్టాఫ్లో దర్శకుడు ప్రధానంగా వినోదం, భావోద్వేగాలు, ఫ్యామిలీ ఎలిమెంట్స్పై దృష్టి పెట్టాడు. ఫలితంగా సినిమా అవుట్ అండ్ అవుట్ ఎంటర్టైనర్గా మారింది. సంజయ్, నిర్మలమ్మ, మ్యాడీ పాత్రల మధ్య వచ్చే సన్నివేశాలు హిలేరియస్గా ఉంటాయి. ఈ మూడు పాత్రల మధ్య కెమిస్ట్రీ అద్భుతంగా కుదరడంతో తెరపై అనేక ఫీల్గుడ్ మూమెంట్స్ కనిపిస్తాయి. ఒకవైపు కామెడీ, మరోవైపు కుటుంబ అనుబంధాలు, ఇంకోవైపు ప్రేమ భావనలను కలిపి ఫస్టాఫ్ను ఆసక్తికరంగా ముందుకు తీసుకెళ్లారు. ఫస్టాఫ్ మొత్తం ఎమోషన్స్, ఎంటర్టైన్మెంట్తో ప్రేక్షకులను కట్టిపడేసేలా సాగుతుంది. ముఖ్యంగా మ్యాడీ సంజయ్కు ఇచ్చే చిన్న స్ట్రోక్ సెకండాఫ్పై ఆసక్తిని మరింత పెంచుతుంది. అక్కడి నుంచి కథ ఏ మలుపు తీసుకుంటుందనే క్యూరియాసిటీని దర్శకుడు విజయవంతంగా క్రియేట్ చేశాడు.
Vishwanath And Sons Movie Review సెకండాఫ్లో ఎమోషన్స్ పీక్స్.. ఫ్యామిలీ డ్రామా హైలైట్
ఇక సెకండాఫ్ విషయానికి వస్తే.. దర్శకుడు పూర్తిగా భావోద్వేగాలనే నమ్ముకున్నాడు. ఒక్కో ఎమోషనల్ సీన్ను జాగ్రత్తగా పేర్చుకుంటూ కథను ముందుకు తీసుకెళ్లాడు. ఫస్టాఫ్లో ఉన్న వినోదానికి భిన్నంగా సెకండాఫ్లో కుటుంబ సంబంధాలు, ప్రేమ, త్యాగం, అనుబంధాలపై ఎక్కువ ఫోకస్ చేశాడు. సెకండాఫ్లో రాధిక శరత్ కుమార్, రవీనా టాండన్, మమితా బైజు, సూర్య, నాజర్ తదితరులు తమ నటనతో సినిమాను మరో స్థాయికి తీసుకెళ్లారు. ముఖ్యంగా భావోద్వేగ సన్నివేశాల్లో నటీనటుల పెర్ఫార్మెన్స్ ప్రేక్షకులను కదిలిస్తుంది. ప్రీ క్లైమాక్స్ నుంచి చివరి సన్నివేశం వరకు నడిచే ఫ్యామిలీ డ్రామా సినిమాకు ప్రధాన బలంగా నిలుస్తుంది. కుటుంబ సభ్యుల మధ్య ఉన్న భావోద్వేగాలు, విభేదాలు, వాటిని పరిష్కరించుకునే విధానం ప్రేక్షకులను ఎమోషనల్గా కనెక్ట్ చేస్తాయి.సినిమా ముగిసే సమయానికి ఇటీవల కాలంలో ఒక చక్కటి ఫ్యామిలీ ఎంటర్టైనర్ను చూసిన అనుభూతి కలుగుతుంది. వినోదం మాత్రమే కాకుండా కుటుంబ బంధాలకు ప్రాధాన్యం ఇవ్వడం ఈ చిత్రానికి మరో ప్రత్యేకతగా నిలుస్తుంది.
సూర్య నటనకు మరోసారి ఫిదా కావాల్సిందే
నటీనటుల విషయానికి వస్తే.. సూర్య గురించి ప్రత్యేకంగా పరిచయం అవసరం లేదు. అయితే సంజయ్ విశ్వనాథ్ పాత్రలో ఆయన మరోసారి తన నటనా సామర్థ్యాన్ని చూపించాడు. ఈ పాత్రలో సూర్య ఒదిగిపోయిన తీరు ఆకట్టుకుంటుంది. గతంలో ‘గజిని’లోని సంజయ్ రామస్వామి పాత్రతో ప్రేక్షకులపై ముద్ర వేసిన సూర్య.. ఈ సినిమాలో సంజయ్ విశ్వనాథ్గా అంతకంటే భిన్నమైన, బలమైన పాత్రలో కనిపించాడు. ముఖ్యంగా ఎమోషనల్ సీన్లలో ఆయన నటన అద్భుతంగా ఉంటుంది. అదే సమయంలో రొమాంటిక్ సన్నివేశాల్లోనూ, యాక్షన్ సన్నివేశాల్లోనూ సూర్య ఇరగదీశాడు. పాత్రకు అవసరమైన మెచ్యూరిటీ, భావోద్వేగం, స్టైలిష్ యాక్టింగ్ను సమపాళ్లలో చూపించాడు. ఈ సినిమాను పూర్తిగా తనవైపు తిప్పుకున్న నటీనటుల్లో మమితా బైజుకు ప్రత్యేక స్థానం దక్కుతుంది. సూర్యకు పోటీగా నటిస్తూ సినిమాకు ఆమె ఒకరకంగా బ్యాక్బోన్గా మారింది. చిలిపితనం, భావోద్వేగం, రొమాన్స్.. ఇలా ప్రతి షేడ్లోనూ మమితా బైజు తన నటనతో ఆకట్టుకుంది. సూర్య, మమితా మధ్య కెమిస్ట్రీ కూడా సినిమాకు మంచి బలంగా నిలుస్తుంది. వారి మధ్య వచ్చే సన్నివేశాలు కథలో సహజమైన ఫీల్ను తీసుకొస్తాయి. రాధిక శరత్ కుమార్, రవీనా టాండన్ కూడా తమ టాప్ పెర్ఫార్మెన్స్తో సినిమాకు మరింత బలాన్ని అందించారు. కుటుంబ భావోద్వేగాలను పండించడంలో వారి పాత్ర కీలకంగా ఉంటుంది. నాజర్ కూడా తన అనుభవంతో పాత్రకు న్యాయం చేశారు. మొత్తంగా ఈ చిత్రంలో నటించిన ప్రతి ఒక్కరూ గుర్తుండిపోయేలా తమ పాత్రలను పోషించారు. చిన్న పాత్రల్లో కనిపించిన వారు కూడా కథకు అవసరమైన స్థాయిలో తమ వంతు ప్రభావాన్ని చూపించారు.
టెక్నికల్ విభాగం ఎలా ఉంది?
సాంకేతికంగా చూస్తే ‘విశ్వనాథ్ అండ్ సన్స్’లోని బ్యాక్గ్రౌండ్ మ్యూజిక్, సినిమాటోగ్రఫీ, ఆర్ట్ డైరెక్షన్, ఎడిటింగ్ విభాగాలు చక్కటి సమన్వయంతో పనిచేశాయి. ప్రతి విభాగం నుంచి దర్శకుడు కావాల్సిన అవుట్పుట్ను సమర్థవంతంగా రాబట్టుకున్నాడు. ముఖ్యంగా కొన్ని కీలక సన్నివేశాల్లోని డైలాగ్స్ నేరుగా హృదయాన్ని తాకేలా ఉంటాయి. అవే సన్నివేశాలను మరింత ఎమోషనల్గా మార్చడంలో డైలాగ్స్ కీలక పాత్ర పోషించాయి.సినిమా నిర్మాణ విలువలు కూడా హై రేంజ్లో ఉన్నాయి. నిర్మాతలు నాగవంశీ, సౌజన్య అనుసరించిన నిర్మాణ ప్రమాణాలు సినిమాలో స్పష్టంగా కనిపిస్తాయి. లావిష్గా, రిచ్గా రూపొందించిన సెట్స్ సినిమాకు గ్రాండియర్ లుక్ను తీసుకొచ్చాయి. కథకు తగ్గట్టుగా విజువల్స్, ఆర్ట్ వర్క్, ఎడిటింగ్, బ్యాక్గ్రౌండ్ స్కోర్ అన్నీ కలిసి సినిమాను మరింత రిచ్గా చూపించాయి. ముఖ్యంగా ఎమోషనల్ సన్నివేశాల్లో టెక్నికల్ టీమ్ పనితీరు కథకు సరైన మద్దతు ఇచ్చింది.
ఫైనల్గా.. ‘విశ్వనాథ్ అండ్ సన్స్’ ఎలా ఉంది?
మొత్తంగా చూస్తే ‘విశ్వనాథ్ అండ్ సన్స్’ కుటుంబ అనుబంధాలు, ప్రేమ, త్యాగం, భావోద్వేగాలతో కూడిన ఫీల్గుడ్ ఫ్యామిలీ ఎంటర్టైనర్గా నిలిచేలా తెరకెక్కింది. ఫస్టాఫ్లో కామెడీ, ఎంటర్టైన్మెంట్తో ఆకట్టుకుని.. సెకండాఫ్లో ఎమోషనల్ కంటెంట్తో ప్రేక్షకులను కట్టిపడేసే ప్రయత్నం చేసింది. సూర్య, మమితా బైజు, రాధిక శరత్ కుమార్, రవీనా టాండన్ల పెర్ఫార్మెన్స్, వెంకీ అట్లూరి టేకింగ్, కథను నడిపించిన విధానం సినిమాకు ప్రధాన బలాలుగా కనిపిస్తాయి. ముఖ్యంగా కుటుంబంతో కలిసి చూడదగిన ఎమోషనల్ ఎంటర్టైనర్ కోరుకునే వారికి ఈ సినిమా మంచి అనుభూతిని అందించే అవకాశం ఉంది.
