IND vs ZIM : టీ20 వరల్డ్ కప్ 2026 సూపర్-8 దశలో టీమిండియా పరిస్థితి సంక్లిష్టంగా మారింది. ఇకపై కేవలం మ్యాచ్ గెలవడం సరిపోదు. నెట్ రన్ రేట్ (NRR) కూడా కీలకంగా మారింది. దక్షిణాఫ్రికా జట్టులో ఎదురైన 76 పరుగుల భారీ పరాజయం భారత్‌కు తీవ్ర దెబ్బతీసింది. ఆ మ్యాచ్ తర్వాత భారత్ నెట్ రన్ రేట్ -3.800కి పడిపోయింది. సూపర్-8 గ్రూప్-1లో భారత్‌కు ఇంకా రెండు కీలక పోరాటాలు మిగిలి ఉన్నాయి. జింబాబ్వే జట్టు, వెస్టిండీస్ జట్ల తో జరగనున్న ఈ మ్యాచ్‌లు సెమీఫైనల్ ఆశలను నిర్ణయించనున్నాయి. సెమీఫైనల్‌కు అర్హత సాధించాలంటే భారత్ ఈ రెండు మ్యాచ్‌లలో తప్పనిసరిగా విజయం సాధించాలి. అయితే పాయింట్లు సమానంగా ఉన్న పరిస్థితుల్లో అర్హతను నిర్ణయించేది నెట్ రన్ రేట్ మాత్రమే. అందువల్ల ఇకపై ప్రతి ఓవర్, ప్రతి పరుగూ కీలకంగా మారింది. ముఖ్యంగా తదుపరి మ్యాచ్ జింబాబ్వేతో ఉండటంతో ఈ పోరులో భారత్ వ్యూహం మొత్తం NRR మెరుగుదలపై ఆధారపడనుంది.

IND vs ZIM : జింబాబ్వేపై భారీ విజయం తప్పనిసరి

భారత్ ముందున్న ప్రధాన సవాల్ జింబాబ్వేపై భారీ తేడాతో గెలవడం. ఒకవేళ భారత్ ముందుగా బౌలింగ్ చేస్తే ప్రత్యర్థిని తక్కువ స్కోర్‌కే కట్టడి చేయడం అత్యంత కీలకం. ఉదాహరణకు జింబాబ్వే 90 పరుగులకే పరిమితమైతే ఆ లక్ష్యాన్ని భారత్ 9 ఓవర్లలో చేధించాలి. అలా చేస్తే నెట్ రన్ రేట్ గణనీయంగా మెరుగుపడుతుంది. లక్ష్యం 150 పరుగులైతే భారత్ గరిష్టంగా 11 ఓవర్లలోనే మ్యాచ్ ముగించాలి. టాప్ ఆర్డర్ దూకుడుగా ఆడితే ఇది సాధ్యమే. అదే జింబాబ్వే 180 నుంచి 200 పరుగుల మధ్య స్కోర్ చేస్తే భారత్ 12 నుంచి 15 ఓవర్లలో గెలవాల్సి ఉంటుంది. ఈ పరిస్థితిలో NRR మెరుగుపడినా పూర్తిగా పాజిటివ్‌లోకి రావడం కష్టసాధ్యమే. కాబట్టి లక్ష్యం ఎంత తక్కువగా ఉంటే అంత మంచిది.

IND vs ZIM : ముందుగా బ్యాటింగ్ చేస్తే వ్యూహం ఎలా?

భారత్ ముందుగా బ్యాటింగ్ చేయాల్సి వస్తే పరిస్థితి మరింత సవాలుగా మారుతుంది. నెట్ రన్ రేట్‌ను నెగటివ్ నుంచి పాజిటివ్‌గా మార్చాలంటే భారీ స్కోర్ చేయడం తప్పనిసరి. కనీసం 220 నుంచి 250 పరుగుల మధ్య స్కోర్ నమోదు చేయాలి. ఆ తర్వాత ప్రత్యర్థిని 100 నుంచి 120 పరుగులకే కట్టడి చేయాలి. ప్రత్యర్థిని ఆలౌట్ చేయడం ద్వారా ఓవర్లు ఆదా అవుతాయి. ఇది NRRకు అదనపు లాభం ఇస్తుంది. మొదటి మ్యాచ్‌లో భారత్ ఆలౌట్ కావడం వల్లే నెట్ రన్ రేట్ తీవ్రంగా దెబ్బతింది. అందుకే ఇకపై బ్యాటర్లు జాగ్రత్తగా ఆడుతూ అదే సమయంలో దూకుడును కూడా కొనసాగించాలి. బౌలర్లు కచ్చితమైన లైన్లు, లెంగ్త్‌లతో ప్రత్యర్థిపై ఒత్తిడి పెంచాలి.

IND vs ZIM : ప్రతి ఓవర్ కీలకం

ఇక పై టీమిండియాకు ప్రతి ఓవర్ ఫైనల్‌లాంటిదే. కేవలం గెలవడం కాదు, ఎంత తేడాతో గెలుస్తున్నామన్నదే ప్రధాన అంశం. సెమీఫైనల్ అవకాశాలు పూర్తిగా భారత్ చేతుల్లోనే ఉన్నప్పటికీ అది సాధ్యమవ్వాలంటే సమష్టి ప్రదర్శన అవసరం. జింబాబ్వేపై భారీ విజయం సాధిస్తే మాత్రమే వెస్టిండీస్ మ్యాచ్‌కు ఆత్మవిశ్వాసంతో వెళ్లగలుగుతుంది. సూపర్-8 దశలో భారత్‌కు గెలుపుతో పాటు గణాంకాల పోరాటం కూడా మొదలైంది. నెట్ రన్ రేట్‌ను పాజిటివ్‌లోకి తీసుకురావడం ద్వారా మాత్రమే సెమీఫైనల్ ద్వారం తెరుచుకోనుంది.