India vs West Indies T20 World Cup 2026 ఐసీసీ పురుషుల టీ20 వరల్డ్ కప్ 2026 ICC Men’s T20 World Cup 2026లో భాగంగా కోల్‌కతాలోని ప్రఖ్యాత ఈడెన్ గార్డెన్స్ Eden Gardens మైదానంలో ఆదివారం మార్చి 1 న జరిగిన ఉత్కంఠభరిత పోరులో భారత జట్టు అద్భుత విజయాన్ని నమోదు చేసింది. గ్రూప్-1 సూపర్-8 Super Eights చివరి మ్యాచ్‌లో వెస్టిండీస్‌ను 5 వికెట్ల తేడాతో చిత్తు చేసి, దర్జాగా సెమీ-ఫైనల్‌కు అర్హత సాధించింది. వర్చువల్ క్వార్టర్ ఫైనల్‌ను తలపించిన ఈ డూ-ఆర్-డై Do-or-Die మ్యాచ్‌లో ఓపెనర్ సంజూ శాంసన్ Sanju Samson ఆకాశమే హద్దుగా చెలరేగిపోయాడు. 50 బంతుల్లోనే అజేయంగా 97 పరుగులు సాధించి జట్టుకు చిరస్మరణీయమైన విజయాన్ని అందించాడు.

India vs West Indies T20 World Cup 2026 టాస్ గెలిచి బౌలింగ్ ఎంచుకున్న సూర్యకుమార్

ఈ అత్యంత కీలకమైన మ్యాచ్‌లో టాస్ గెలిచిన భారత కెప్టెన్ సూర్యకుమార్ యాదవ్ Suryakumar Yadav ముందుగా బౌలింగ్ చేయాలని నిర్ణయించుకున్నాడు. మొదట బ్యాటింగ్‌కు దిగిన వెస్టిండీస్ జట్టుకు ఓపెనర్లు షాయ్ హోప్, రోస్టన్ చేజ్ మంచి ఆరంభాన్ని ఇచ్చారు. మొదటి వికెట్‌కు 68 పరుగులు జోడించిన తర్వాత వరుణ్ చక్రవర్తి బౌలింగ్‌లో హోప్ వెనుదిరిగాడు. ఆ తర్వాత భారత పేసర్ జస్ప్రీత్ బుమ్రా ఒకే ఓవర్లో రెండు వికెట్లు తీయగా, హార్దిక్ పాండ్యా ఒక వికెట్ తీసి విండీస్‌ను ఒత్తిడిలోకి నెట్టారు.

ఒక దశలో 119 పరుగులకే 4 వికెట్లు కోల్పోయి కష్టాల్లో పడిన వెస్టిండీస్‌ను.. జాసన్ హోల్డర్, రోవ్‌మన్ పావెల్ అద్భుతంగా ఆదుకున్నారు. వీరిద్దరూ కలిసి ఐదో వికెట్‌కు కేవలం 35 బంతుల్లోనే 76 పరుగుల అజేయ భాగస్వామ్యాన్ని నెలకొల్పారు. ఫలితంగా నిర్ణీత 20 ఓవర్లు ముగిసే సరికి వెస్టిండీస్ 4 వికెట్ల నష్టానికి 195 పరుగుల భారీ స్కోరును నమోదు చేసింది.

India vs West Indies T20 World Cup 2026 లక్ష్య ఛేదనలో ఆరంభంలోనే ఎదురుదెబ్బలు

196 పరుగుల భారీ లక్ష్య ఛేదనకు బరిలోకి దిగిన భారత జట్టుకు ఆశించిన స్థాయిలో శుభారంభం దక్కలేదు. ఈ టోర్నీలో నిలకడగా రాణిస్తున్న యువ ఓపెనర్ అభిషేక్ శర్మ కేవలం 10 పరుగులకే అవుటవ్వగా, వన్ డౌన్‌లో వచ్చిన కీపర్-బ్యాటర్ ఇషాన్ కిషన్ సైతం 10 పరుగులు మాత్రమే చేసి పెవిలియన్ చేరాడు. 53 పరుగులకే 2 వికెట్లు కోల్పోయి జట్టు కష్టాల్లో ఉన్న దశలో క్రీజులోకి వచ్చిన కెప్టెన్ సూర్యకుమార్ యాదవ్, సంజూ శాంసన్‌తో కలిసి ఇన్నింగ్స్ ను చక్కదిద్దే బాధ్యతను భుజానికెత్తుకున్నాడు. వీరిద్దరూ కలిసి మూడో వికెట్‌కు 50 పరుగుల కీలక భాగస్వామ్యాన్ని నిర్మించారు. సూర్యకుమార్ యాదవ్ 16 బంతుల్లో 18 పరుగులు చేసి షమర్ జోసెఫ్ బౌలింగ్‌లో అవుటయ్యాడు.

సంజూ శాంసన్ విధ్వంసం.. కోహ్లీ రికార్డు బ్రేక్

ఒకవైపు వికెట్లు పడుతున్నా.. మరోవైపు సంజూ శాంసన్ మాత్రం విండీస్ బౌలర్లపై విరుచుకుపడ్డాడు. కేవలం 26 బంతుల్లోనే తన హాఫ్ సెంచరీని పూర్తి చేసుకున్నాడు. సూర్యకుమార్ ఔటైన తర్వాత వచ్చిన యువ ఆటగాడు తిలక్ వర్మ (15 బంతుల్లో 27 పరుగులు; 4 ఫోర్లు, 1 సిక్స్)తో కలిసి శాంసన్ ఎదురుదాడికి దిగాడు. తిలక్ వర్మ జాసన్ హోల్డర్ బౌలింగ్‌లో అవుటైన తర్వాత క్రీజులోకి వచ్చిన ఆల్ రౌండర్ హార్దిక్ పాండ్యా (14 బంతుల్లో 17 పరుగులు) కూడా విలువైన పరుగులు జోడించాడు.

ఈ సంచలన ఇన్నింగ్స్ క్రమంలో సంజూ శాంసన్ ఒక అరుదైన రికార్డును తన పేరిట లిఖించుకున్నాడు. టీ20 వరల్డ్ కప్ ఛేజింగ్ చరిత్రలో ఒక భారతీయ బ్యాటర్‌గా అత్యధిక వ్యక్తిగత స్కోరు సాధించిన ఆటగాడిగా నిలిచాడు. గతంలో విరాట్ కోహ్లీ పేరిట ఉన్న రికార్డును (ఆస్ట్రేలియా, పాకిస్థాన్‌లపై కోహ్లీ చేసిన 82 పరుగులు) శాంసన్ బద్దలు కొట్టాడు.

ఆఖరి ఓవర్లో హైడ్రామా.. విజయంతో సెమీస్‌కు

చివరి రెండు ఓవర్లలో భారత విజయానికి 17 పరుగులు కావాల్సి ఉండగా ఉత్కంఠ తారాస్థాయికి చేరుకుంది. 19వ ఓవర్లో షమర్ జోసెఫ్ బౌలింగ్‌లో భారీ షాట్‌కు యత్నించి హార్దిక్ పాండ్యా అవుట్ అయ్యాడు. ఆ సమయంలో క్రీజులోకి వచ్చిన శివం దూబే, తాను ఎదుర్కొన్న తొలి బంతికే ఫోర్ బాది ఒత్తిడిని తగ్గించాడు. ఇక ఆఖరి ఓవర్లో భారత్ గెలవడానికి 7 పరుగులు అవసరం కాగా.. రొమారియో షెఫర్డ్ వేసిన తొలి బంతినే డీప్ మిడ్ వికెట్ మీదుగా భారీ సిక్సర్ బాదిన శాంసన్ స్కోర్లను సమం చేశాడు. ఆ తర్వాతి బంతికి అద్భుతమైన ఫోర్ కొట్టి.. కేవలం 19.2 ఓవర్లలోనే 199/5 స్కోరుతో టీమిండియాకు చరిత్రాత్మక విజయాన్ని ఖాయం చేశాడు. ముగింపు వరకు క్రీజులో ఉన్న సంజూ శాంసన్ కేవలం 50 బంతుల్లోనే 97 పరుగులతో అజేయంగా నిలిచి జట్టును సెమీస్‌కు చేర్చాడు.

ముంబై వేదికగా ఇంగ్లాండ్‌తో సెమీస్ సమరం

ఈ ఘన విజయంతో గ్రూప్-1 సూపర్-8 పాయింట్ల పట్టికలో టాప్-2లో నిలిచిన భారత జట్టు.. దక్షిణాఫ్రికాతో పాటు సెమీ-ఫైనల్‌కు అర్హత సాధించింది. ఇంగ్లాండ్, న్యూజిలాండ్, దక్షిణాఫ్రికా జట్లు ఇప్పటికే సెమీస్ చేరుకోగా, భారత్ నాలుగో జట్టుగా ఆ జాబితాలో చేరింది. సెమీ-ఫైనల్ పోరులో భాగంగా మార్చి 5న ముంబైలో ఇంగ్లాండ్‌తో భారత జట్టు తలపడనుంది. కష్టకాలంలో జట్టును ఆదుకోవడమే కాకుండా.. అద్భుతమైన బ్యాటింగ్ నైపుణ్యంతో ఒంటిచేత్తో మ్యాచ్‌ను గెలిపించిన సంజూ శాంసన్ ఇన్నింగ్స్ క్రికెట్ అభిమానులకు ఎప్పటికీ గుర్తుండిపోతుంది.