Rythu Bharosa  : తెలంగాణలోని లక్షలాది మంది అన్నదాతలు ఎప్పుడెప్పుడా అని ఎదురుచూస్తున్న ‘రైతు భరోసా’ పెట్టుబడి సాయం పంపిణీకి ఎట్టకేలకు ముహూర్తం ఖరారైంది. సాగు పనులు ముమ్మరంగా సాగుతున్న తరుణంలో ప్రభుత్వం తీసుకున్న ఈ నిర్ణయం రైతుల్లో కొత్త ఆశలు చిగురింపజేస్తోంది.

Rythu Bharosa  : రైతు భరోసా నిధుల విడుదల

తెలంగాణ రాష్ట్రంలో యాసంగి (రబీ) సీజన్‌కు సంబంధించి పెండింగ్‌లో ఉన్న రైతు భరోసా నిధుల విడుదలకు ప్రభుత్వం రంగం సిద్ధం చేసింది. ఈ నెల 23న జరగనున్న రాష్ట్ర మంత్రివర్గ భేటీలో దీనిపై తుది నిర్ణయం తీసుకోనున్నారు. అనంతరం ఫిబ్రవరి 24వ తేదీ నుంచి నేరుగా రైతుల ఖాతాల్లో నగదు జమ చేసే ప్రక్రియ ప్రారంభం కానుంది. మున్సిపల్ ఎన్నికల కోడ్ మరియు ఇతర సాంకేతిక కారణాల వల్ల కొంత ఆలస్యమైనప్పటికీ, విత్తనాలు, ఎరువుల కొనుగోలుకు డబ్బు అవసరమైన ఈ కీలక సమయంలో నిధులు విడుదల చేయడం గమనార్హం. గత ఖరీఫ్ సీజన్‌లో మాదిరిగానే ఎకరానికి రూ. 6,000 చొప్పున ఈ పెట్టుబడి సాయం అందనుంది.

Rythu Bharosa  : గత సీజన్ లబ్ధిదారులకే ప్రాధాన్యత?

ఈసారి రైతు భరోసా ఎవరికి అందుతుందనే అంశంపై గత కొంతకాలంగా ఉత్కంఠ నెలకొంది. సాగులో ఉన్న భూములను గుర్తించేందుకు ప్రభుత్వం శాటిలైట్ సర్వే (SAR టెక్నాలజీ) అంశాన్ని తెరపైకి తెచ్చినప్పటికీ, ప్రస్తుతానికి గత వానాకాలం సీజన్‌లో నిధులు పొందిన లబ్ధిదారులందరికీ యథాతథంగా సాయం అందించాలని ప్రభుత్వం ప్రాథమికంగా నిర్ణయించింది. రాష్ట్రవ్యాప్తంగా సుమారు 69.39 లక్షల మంది రైతులకు, దాదాపు 1.46 కోట్ల ఎకరాలకు ఈ పథకం వర్తించనుంది. ఇందుకోసం ప్రభుత్వం సుమారు రూ. 8,744 కోట్ల నిధులను వెచ్చించాల్సి ఉంటుందని అంచనా. కేవలం సాగు భూములకే పరిమితం చేయాలా లేదా గత పద్ధతినే అనుసరించాలా అన్న దానిపై కేబినెట్ భేటీలో స్పష్టత రానుంది.

పెట్టుబడి కష్టాల్లో ఉన్న రైతాంగానికి పెద్ద ఊరట

యాసంగి సీజన్ ప్రారంభమై రెండు నెలలు దాటడం, ఇప్పటికే వరి వంటి పంటలు పొట్ట దశకు చేరుకోవడంతో రైతులు సాగు ఖర్చుల కోసం ప్రైవేట్ వ్యాపారుల వద్ద అప్పులు చేస్తున్నారు. ఈ క్రమంలో ప్రభుత్వం ఏకకాలంలో నిధులు విడుదల చేయాలని నిర్ణయించడం రైతులకు పెద్ద ఊరటనిస్తోంది. ముఖ్యమంత్రి రేవంత్ రెడ్డి ఇప్పటికే అధికారులకు స్పష్టమైన దిశానిర్దేశం చేస్తూ, అర్హులైన ఏ ఒక్క రైతుకూ అన్యాయం జరగకుండా నిధులు జమ చేయాలని ఆదేశించారు. అప్పుల బాధ నుంచి గట్టెక్కి, పంట దిగుబడిపై దృష్టి సారించేందుకు ఈ సాయం వెన్నుదన్నుగా నిలుస్తుందని వ్యవసాయ వర్గాలు భావిస్తున్నాయి.