Urea Shortage : తెలంగాణలో ఎన్నడూ లేని విధంగా యూరియా కొరత..అసలు కారణం ఏంటి..? ఎవరి వల్ల ఈ కొరత ..?

Urea Shortage in Telangana : రైతుల కష్టాలకు ముగింపు అనేది లేదు. స్వాతంత్య్రం వచ్చినప్పటి నుంచి ఇప్పటివరకు ప్రతి సంవత్సరం రైతులు ఏదో ఒక సమస్యను ఎదుర్కొంటూనే ఉన్నారు. ఈసారి తెలంగాణ రైతులు ఎదుర్కొంటున్న ప్రధాన సమస్య యూరియా కొరత. రైతులు రోజంతా లైన్లలో నిలబడి యూరియా కోసం ఆగిపోవాల్సిన పరిస్థితి ఏర్పడింది. బ్లాక్ మార్కెట్‌లో డబుల్ ధరలకు పైగా యూరియా అమ్ముతూ రైతులను నిలువునా దోచేస్తున్నారు. ప్రభుత్వాలు రైతుల సంక్షేమమే తమ ధ్యేయమని చెబుతున్నా, ఈ సమస్యను పరిష్కరించడంలో విఫలమవుతున్నాయి.

Urea Shortage in Telangana

ప్రస్తుతం తెలంగాణ కాంగ్రెస్ ప్రభుత్వం, కేంద్ర ప్రభుత్వంపై యూరియా సరఫరాలో నిర్లక్ష్యం చూపుతోందని ఆరోపిస్తోంది. ముఖ్యమంత్రి రేవంత్ రెడ్డి కేంద్రం రైతుల అవసరాలను పట్టించుకోవడం లేదని మండిపడుతున్నారు. అయితే కేంద్రం మాత్రం రాష్ట్రం ఎంత యూరియా కావాలో సరిగా డిమాండ్ చేయలేదని ప్రతిస్పందిస్తోంది. ఈ వాదోపవాదాల మధ్య రైతులు మాత్రం ఇరుక్కుపోతున్నారు. గతంలో బీఆర్ఎస్ పాలనలో కూడా రైతులు ఇలాంటి సమస్యను ఎదుర్కొన్నారు కాబట్టి, ఏ పార్టీ కూడా రైతుల కోసం స్పష్టమైన పరిష్కారం చూపలేకపోయిందనే విమర్శలు వస్తున్నాయి.

యూరియా లేకుండా పంటలు పండవు, దీనికి సమర్థవంతమైన ప్రత్యామ్నాయం ఇప్పటికీ అందుబాటులో లేదు. అందువల్ల రాజకీయ వాదోపవాదాలకు బదులు రైతుల అవసరాలపై దృష్టి పెట్టడం అత్యవసరం. రాష్ట్ర ప్రభుత్వం కేంద్రాన్ని మరింత ఒత్తిడి చేసి తగినంత యూరియా తెప్పించేలా చురుకుగా వ్యవహరించాలి. ఆలస్యం జరిగితే పంటలు దెబ్బతినే ప్రమాదం ఎక్కువ. ఇప్పటికే అతి వర్షాల వల్ల కష్టాల్లో ఉన్న రైతులకు యూరియా కొరత మరో భారమవుతోంది. రైతుల భవిష్యత్తు దృష్టిలో పెట్టుకుని, ఇరు ప్రభుత్వాలు కలసికట్టుగా పని చేసి రైతులకు తగిన మద్దతు ఇవ్వడం తప్పనిసరి.