Pushkarini : ఆంధ్రా-కర్ణాటక సరిహద్దులో ఉన్న చిత్తూరు జిల్లాలోని ములభాగల్ ప్రాంతంలో 600 సంవత్సరాల చరిత్ర కలిగిన శ్రీ పాద చార్యుల మఠం ఎంతో మహిమాన్వితంగా నిలిచింది. ఈ మఠం ప్రాంగణంలోనే ఉన్న నరసింహ తీర్థం అనే పుష్కరిణి, గంగానదిలో స్నానం చేసినంత పవిత్రతను కలిగిందని భక్తులు విశ్వసిస్తున్నారు. ఆలయ ప్రధాన అర్చకుల మాటల ప్రకారం.. ఈ నీటిలో స్నానం చేస్తే పాపాలు తొలగి, శరీర ఆరోగ్యం మెరుగవుతుంది. ఈ నీరు ఎక్కడి నుంచీ రాకపోయినా, స్వయంభుగా ఉద్భవిస్తున్నదన్న విశ్వాసం భక్తులలో ఉంది. కర్ణాటక ప్రభుత్వం ఈ జలాన్ని పరిశీలించి, ఇందులో ఉన్న ఔషధ గుణాలు మరియు ఆరోగ్య ప్రయోజనాలను గుర్తించినట్టు సమాచారం.

ఈ పుష్కరిణికి గల ప్రాచీన చరిత్ర విశేషమైనది. శ్రీ పాద చార్యులు సజీవంగా బృందావనంలో కొలువై ఉండగా, సంస్కృత విద్యార్థులు వేలాదిగా వారి వద్ద గురుకుల విద్యా అభ్యసించేవారు. కాశీకి వెళ్లి గంగానదిలో స్నానం చేయాలన్న శిష్యుల కోరికను గుర్తించి, శ్రీ పాద చార్యులు గంగా తీర్థాన్ని అక్కడికే ఆహ్వానించినట్టు స్థానిక స్థలపురాణం చెబుతోంది. అప్పటి నుండి ఆ నీరు అక్కడే పుష్కరిణిగా నిలిచింది. ఈ తీర్థంలో గంగానదితో సమానమైన పవిత్రత ఉన్నదని, ఇది కేవలం కథ కాదు, ఆధ్యాత్మిక అనుభవం అని భక్తులు చెప్పుకుంటున్నారు.

ప్రతి ఏడాది జ్యేష్ఠ మాసంలో విశేష పూజలు, గంగా హారతి, వడిబాల వంటి కార్యక్రమాలు నిర్వహించడం ఆనవాయితీగా మారింది. మూడు రాష్ట్రాల నుండి వేలాది మంది భక్తులు ఈ పుష్కరిణిలో స్నానం చేసి నరసింహస్వామి దర్శనం కోసం వస్తున్నారు. అన్నదాన కార్యక్రమాలు, పూజా కైంకర్యాలు ఎంతో వైభవంగా జరుగుతున్నాయి. శరీర రుగ్మతలు, మానసిక బాధలు నివారించుకోవాలనుకునే భక్తులు ఈ తీర్థాన్ని దర్శించి, శాంతి, పుణ్యం సంతరించుకుంటున్నారని స్థానికులు భావిస్తున్నారు.