Nara Lokesh Birthday Special: యువగళం.. విజయపథం.. నవ్యాంధ్ర రాజకీయ ధ్రువతార నారా లోకేష్!
Nara Lokesh Birthday Special: నారా లోకేష్ ఇది పేరు కాదు ఓ బ్రాండ్. సాధారణ కార్యకర్త నుండి మాస్ లీడర్ గా ఎదిగిన వ్యక్తి. 1983 జనవరి 23న రాజకీయ, సినీ నేపథ్యం ఉన్న అత్యంత ప్రభావవంతమైన కుటుంబంలో జన్మించారు. ఆయన పుట్టే సమయానికే తాత నందమూరి తారక రామారావు ముఖ్యమంత్రిగా సంచలనం సృష్టిస్తుండగా, తండ్రి నారా చంద్రబాబు నాయుడు రాష్ట్ర రాజకీయాల్లో కీలక పాత్ర పోషిస్తున్నారు. అమెరికాలోని స్టాన్ఫర్డ్ యూనివర్సిటీలో ఎంబీఏ పూర్తి చేసిన లోకేష్, తొలినాళ్లలో హెరిటేజ్ సంస్థ బాధ్యతలు చూసినప్పటికీ, క్రమంగా రాజకీయాల వైపు మళ్లారు. తన మేనమామ నందమూరి బాలకృష్ణ కుమార్తె బ్రాహ్మణిని వివాహం చేసుకుని అటు సినీ, ఇటు రాజకీయ కుటుంబాల బంధాన్ని మరింత బలోపేతం చేశారు. తొలినాళ్లలో తెలుగు భాషా ఉచ్చారణపై విమర్శలు ఎదుర్కొన్నప్పటికీ, పట్టుదలతో తనను తాను మెరుగుపరుచుకుని విమర్శకుల నోళ్లు మూయించారు.
Nara Lokesh Birthday Special: యువగళం.. విజయపథం.. నవ్యాంధ్ర రాజకీయ ధ్రువతార నారా లోకేష్!
లోకేష్ రాజకీయ జీవితంలో అనేక ఒడిదుడుకులు ఎదురయ్యాయి. 2017లో ఎమ్మెల్సీగా మంత్రి పదవిని చేపట్టిన ఆయన, 2019 మంగళగిరి అసెంబ్లీ ఎన్నికల్లో ఓటమి పాలవ్వడం ఒక పెద్ద ఎదురుదెబ్బగా నిలిచింది. అయితే ఆ ఓటమి ఆయనను కుంగదీయలేదు. 2023 జనవరి 27న ఆయన చేపట్టిన ‘యువగళం’ పాదయాత్ర ఆంధ్రప్రదేశ్ రాజకీయాల్లో ఒక భారీ ‘గేమ్ ఛేంజర్’గా మారింది. తండ్రి చంద్రబాబు నాయుడు జైలుకు వెళ్లిన క్లిష్ట సమయంలో పార్టీ బాధ్యతలను భుజానికెత్తుకుని, కార్యకర్తల్లో ధైర్యం నింపారు. ఈ కఠోర శ్రమకు ఫలితంగానే 2024 ఎన్నికల్లో మంగళగిరి నుండి 91,413 ఓట్ల భారీ మెజారిటీతో విజయం సాధించి, మూడో అతిపెద్ద మెజారిటీ సాధించిన అభ్యర్థిగా రికార్డు సృష్టించారు.
ప్రస్తుతం చంద్రబాబు నాయుడు క్యాబినెట్లో విద్య, ఐటీ మరియు ఎలక్ట్రానిక్స్ శాఖల మంత్రిగా లోకేష్ తనదైన ముద్ర వేస్తున్నారు. రాష్ట్రానికి పెట్టుబడులను ఆకర్షించడంతో పాటు, విద్యా వ్యవస్థలో సమూల మార్పుల కోసం ఆయన కృషి చేస్తున్నారు. అటు ఎన్టీఆర్ ట్రస్ట్ ద్వారా సేవా కార్యక్రమాల్లో తల్లి భువనేశ్వరికి అండగా నిలుస్తూనే, ఇటు పార్టీని భవిష్యత్తు నాయకత్వం వైపు నడిపిస్తున్నారు. నలభై ఏళ్ల వయసులోనే పరిణతి చెందిన నాయకుడిగా ఎదిగిన లోకేష్, భవిష్యత్తులో మరిన్ని ఉన్నత శిఖరాలను అధిరోహించే దిశగా అడుగులు వేస్తున్నారు. నేడు ఆయన పుట్టినరోజు సందర్భంగా అభిమానులు, పార్టీ శ్రేణులు రాష్ట్రవ్యాప్తంగా పండుగలా వేడుకలు నిర్వహిస్తున్నారు.