Pawan Kalyan  : ఆంధ్రప్రదేశ్ Andhra pradesh ఉపముఖ్యమంత్రి, జనసేన Janasena  అధినేత పవన్ కళ్యాణ్ తన పార్టీ శ్రేణులకు మరియు నాయకులకు కీలక ఆదేశాలు జారీ చేశారు. ఇటీవల సోషల్ మీడియా మరియు కొన్ని ప్రధానాంతర మాధ్యమాల్లో జనసేన పార్టీ లక్ష్యంగా జరుగుతున్న తప్పుడు ప్రచారాలను ( దుష్ప్రచారాలను ) సమర్థవంతంగా తిప్పికొట్టాలని ఆయన పిలుపునిచ్చారు. పార్టీ ప్రతిష్టను దెబ్బతీసేందుకు పక్కా ప్రణాళికతో కొన్ని శక్తులు పని చేస్తున్నాయని, వీటిని పార్టీ నాయకులు ఏమాత్రం ఉపేక్షించకూడదని ఆయన స్పష్టం చేశారు. ఈ మేరకు జనసేన పార్టీ కేంద్ర కార్యాలయం ఒక అధికారిక ప్రకటనను విడుదల చేసింది.

వ్యక్తిగత గొడవలు, ఆర్థిక లావాదేవీలు లేదా రెండు వర్గాల మధ్య జరిగే కుల విభేదాలను ఉద్దేశపూర్వకంగా జనసేన పార్టీకి ఆపాదిస్తున్నారని పవన్ కళ్యాణ్ ఆవేదన వ్యక్తం చేశారు. “కొందరు కిరాయి వక్తలు, పెయిడ్ మీడియా సంస్థలు పార్టీ ఇమేజ్‌ను డ్యామేజ్ చేయడానికి కుట్రలు పన్నుతున్నాయి. చివరికి వ్యక్తుల మధ్య ఉండే వివాహేతర సంబంధాల గొడవలను కూడా పార్టీ ఖాతాలో వేయాలని చూడటం అత్యంత దుర్మార్గం” అని ఆయన మండిపడ్డారు. పార్టీకి ఎటువంటి సంబంధం లేని అంశాలను కూడా రాజకీయ రంగు పులిమి లబ్ధి పొందాలని చూస్తున్నారని ఆయన విశ్లేషించారు.

రాబోయే రోజుల్లో రాజకీయ పరిణామాలు మరింత వేడెక్కే అవకాశం ఉన్నందున, జనసేన నాయకులు మరియు సోషల్ మీడియా సైనికులు నిరంతరం అప్రమత్తంగా ఉండాలని పవన్ సూచించారు. ఏదైనా సంఘటన జరిగినప్పుడు వాస్తవాలను తెలుసుకోకుండా పార్టీపై బురద చల్లే ప్రయత్నం చేస్తే, గట్టిగా సమాధానం చెప్పాలని దిశానిర్దేశం చేశారు. ప్రజలకు వాస్తవాలను విడమర్చి చెప్పడం ద్వారా ప్రత్యర్థుల కుట్రలను నిర్వీర్యం చేయాలని ఆయన కోరారు. పార్టీ క్రమశిక్షణను కాపాడుతూనే, దుష్ట శక్తులపై రాజీలేని పోరాటం చేయాలని కార్యకర్తలకు భరోసా ఇచ్చారు.