Guava : తక్కువ ధరలోనే అధిక పోషకాలు అందించే పండ్లలో జామకాయ ప్రత్యేక స్థానం కలిగి ఉంది. విటమిన్ సి, ఎ, బి, కెతో పాటు ఫైబర్ సమృద్ధిగా ఉండటంతో దీనిని చాలామంది “పేదవారి ఆపిల్”గా కూడా పిలుస్తారు. అయితే జామకాయను తినేటప్పుడు చాలా మందికి ఒక సందేహం ఉంటుంది. దాన్ని తొక్కతో తినాలా? లేక తొక్క తీసి తినాలా? అలాగే కాయ తినడం మంచిదా, పండు తినడం మంచిదా? ఈ విషయాలపై ప్రముఖ పోషకాహార నిపుణురాలు దీప్షిక సోషల్ మీడియాలో కొన్ని ముఖ్యమైన వివరాలు వెల్లడించారు.

Guava : తొక్కతో తింటేనే ఎక్కువ ప్రయోజనం

నిపుణుల అభిప్రాయం ప్రకారం జామకాయను తొక్కతో పాటు తినడం ఉత్తమం. జామ తొక్కలో పొటాషియం, జింక్, విటమిన్ సి వంటి కీలక సూక్ష్మపోషకాలు అధికంగా ఉంటాయి. ఇవి చర్మ ఆరోగ్యాన్ని మెరుగుపరచడమే కాకుండా రోగనిరోధక శక్తిని కూడా పెంచుతాయి.

Guava : మధుమేహం, కొలెస్ట్రాల్ ఉన్నవారికి మంచిదే

అధిక రక్తపోటు, మధుమేహం, కొలెస్ట్రాల్ వంటి సమస్యలతో బాధపడేవారు జామకాయను తొక్కతో తినడం వల్ల మంచి ఫలితాలు పొందవచ్చని కొన్ని అధ్యయనాలు సూచిస్తున్నాయి. ఇందులో ఉండే ఫైబర్ రక్తంలో చక్కెర స్థాయిలను నియంత్రించడంలో సహాయపడుతుంది.

Guava : జామకాయా? జామపండా? ఏది మంచిది?

జామకాయ మరియు జామపండు రెండింటిలోనూ పోషకాలు ఉన్నప్పటికీ, అవసరాన్ని బట్టి ఎంపిక చేసుకోవాలని నిపుణులు చెబుతున్నారు.
జామకాయ (దోర కాయ): బరువు తగ్గాలని అనుకునేవారికి, దంతాల ఆరోగ్యం మెరుగుపరుచుకోవాలనుకునేవారికి ఇది మంచిది. మధుమేహం ఉన్నవారికి కూడా కాయ ఉపయోగకరంగా ఉంటుంది.
జామపండు: ఇది మృదువుగా, తియ్యగా ఉండటం వల్ల పిల్లలు మరియు వృద్ధులు సులభంగా తినగలరు. త్వరగా జీర్ణమవుతుంది. విటమిన్ సి మరియు యాంటీఆక్సిడెంట్లు సమృద్ధిగా ఉంటాయి.

Guava : గుండె ఆరోగ్యానికి కూడా ఉపయోగం

ప్రత్యేకంగా వృద్ధులు జామను ఆహారంలో చేర్చుకుంటే గుండె ఆరోగ్యం మెరుగుపడుతుంది. ఇందులో ఉండే పాలీఫెనాల్స్, ఫ్లేవనాయిడ్లు శరీరంలో వాపు మరియు మంటను తగ్గించడంలో సహాయపడతాయి. దీంతో గుండె సంబంధిత సమస్యలు వచ్చే అవకాశాలు తగ్గుతాయి. ఇకపోతే జామను ఏ రూపంలో తిన్నా ఆరోగ్యానికే మేలు. అయితే మీ శరీర స్వభావం, ఆరోగ్య పరిస్థితిని బట్టి కాయను లేదా పండును ఎంపిక చేసుకోవడం మంచిది. ముఖ్యంగా జామను తొక్క తీసకుండా తింటే పూర్తి స్థాయి పోషకాలు లభిస్తాయని నిపుణులు సూచిస్తున్నారు.