Winter Season : చలికాలంలో ఒక్కొక్కరికి ఒక్కో అనుభూతి ఎందుకు?.. శరీరం చెప్పే సైన్స్ ఇదేనా?
Authored By Suma
| The Telugu News | Updated on :
18 January 2026,
8:00 am 
winter season : చలికాలంలో ఒక్కొక్కరికి ఒక్కో అనుభూతి ఎందుకు?.. శరీరం చెప్పే సైన్స్ ఇదేనా?
Winter Season : చలికాలం మొదలైతే మన చుట్టూ ఒక విచిత్రమైన దృశ్యం కనిపిస్తుంది. కొందరు మంచు గాలులు వీచినా స్లీవ్లెస్ టీషర్టులతో హాయిగా తిరుగుతుంటారు. మరికొందరు మాత్రం రెండు మూడు స్వెటర్లు వేసుకున్నా వణికిపోతుంటారు. ఒకే ప్రాంతం, ఒకే ఉష్ణోగ్రత అయినా ఈ తేడా ఎందుకు వస్తుంది? అసలు చలిని తట్టుకునే శక్తి ఒక్కొక్కరికి ఒక్కోలా ఎందుకు ఉంటుంది? దీని వెనుక మన శరీరంలో జరిగే ఆసక్తికరమైన శాస్త్రీయ కారణాలే దాగి ఉన్నాయి.
Winter Season : చలికాలంలో ఒక్కొక్కరికి ఒక్కో అనుభూతి ఎందుకు?.. శరీరం చెప్పే సైన్స్ ఇదేనా?
winter season : జీవక్రియ వేగమే చలిని నిర్ణయిస్తుంది
మన శరీరంలో వేడిని ఉత్పత్తి చేసే ప్రధాన వ్యవస్థ మెటబాలిజం (జీవక్రియ). ఇది ఎంత వేగంగా పనిచేస్తే అంత ఎక్కువగా శరీరం వేడిని ఉత్పత్తి చేస్తుంది. జీవక్రియ రేటు ఎక్కువగా ఉన్నవారికి చలికాలంలో కూడా సాధారణంగానే అనిపిస్తుంది. బయట ఉష్ణోగ్రత తగ్గినా శరీరం లోపల నుంచే వేడిని సృష్టించగలుగుతుంది. అదే మెటబాలిజం నెమ్మదిగా ఉన్నవారికి చలికాలం చాలా ఇబ్బందిగా మారుతుంది. అలాంటి వారు స్వల్ప గాలి వీసినా చలి ఎక్కువగా వేస్తుందని అనుభవిస్తారు. వ్యాయామం లేకపోవడం సరైన ఆహారం తీసుకోకపోవడం వల్ల కూడా జీవక్రియ మందగిస్తుంది.
winter season : రక్త ప్రసరణ..శరీర ఆకృతి ప్రభావం
శరీరంలోని రక్త ప్రసరణ కూడా చలిని తట్టుకునే శక్తిలో కీలక పాత్ర పోషిస్తుంది. రక్తం వేగంగా ప్రవహిస్తే శరీర ఉష్ణోగ్రత సమంగా ఉంటుంది. కానీ రక్త ప్రసరణ సరిగా లేని వారిలో చేతులు, కాళ్లు త్వరగా చల్లబడిపోతాయి. అందుకే కొందరికి వెచ్చని గదిలో ఉన్నా చలి వేస్తూనే ఉంటుంది. ఇక శరీర ఆకృతి విషయానికి వస్తే కండరాలు ఎక్కువగా ఉన్నవారిలో వేడి ఉత్పత్తి అధికంగా ఉంటుంది. అలాగే శరీరంలో కొవ్వు శాతం ఎక్కువగా ఉంటే అది సహజ ఇన్సులేటర్లా పనిచేసి లోపలి వేడిని బయటకు పోకుండా కాపాడుతుంది. అందుకే సన్నగా ఉన్నవారితో పోలిస్తే కాస్త బరువు ఉన్నవారు చలిని బాగా తట్టుకోగలుగుతారు.
winter season : లింగం, వయసు, జీవనశైలి కూడా కారణాలే
సాధారణంగా పురుషులతో పోలిస్తే స్త్రీలకు చలి ఎక్కువగా వేస్తుంది. దీనికి ప్రధాన కారణం హిమోగ్లోబిన్ స్థాయిలు. స్త్రీలలో సహజంగానే హిమోగ్లోబిన్ తక్కువగా ఉండే అవకాశం ఎక్కువ. రక్తహీనత ఉన్నవారికి శరీరానికి తగినంత ఆక్సిజన్ అందక చలి ఎక్కువగా అనిపిస్తుంది. అలాగే స్త్రీలలో కండరాల శాతం తక్కువగా ఉండటం కూడా ఒక కారణం. వయసు పెరిగే కొద్దీ శరీర ఉష్ణోగ్రతను నియంత్రించే సామర్థ్యం తగ్గిపోతుంది. అందుకే వృద్ధులు చలికాలంలో ఎక్కువ జాగ్రత్తలు తీసుకోవాల్సి ఉంటుంది. తక్కువ నీరు తాగడం అతిగా టీ–కాఫీలు తీసుకోవడం కూడా శరీర ఉష్ణోగ్రతపై ప్రభావం చూపుతాయి. మీకు ఇతరులకంటే ఎక్కువగా చలి వేస్తుంటే అది నిర్లక్ష్యం చేయాల్సిన విషయం కాదు. సరైన పోషకాహారం తగినంత నీరు క్రమం తప్పని వ్యాయామం ద్వారా జీవక్రియను మెరుగుపరుచుకోవచ్చు. అప్పుడు చలికాలం కూడా మీకు కాస్త స్నేహపూర్వకంగానే అనిపిస్తుంది.
Also read
