India and Iran Issue : అండమాన్ నికోబార్ దీవులు భారత దేశ భవిష్యత్తును మార్చేయబోతున్నాయి. సాధారణంగా ఎక్కడ యుద్ధం జరిగినా లేదా చిన్న గొడవలు మొదలైనా దాని ప్రభావం నేరుగా సామాన్యుడి జేబు మీద పడుతుంది. ముఖ్యంగా అరబ్ దేశాల్లో ఏదైనా సమస్య వస్తే చమురు ధరలు ఆకాశాన్ని తాకుతాయని ప్రపంచం మొత్తం భయపడుతూ ఉంటుంది. ప్రతిరోజూ మన ఇంధన అవసరాల కోసం లక్షల కోట్లు ఖర్చు చేస్తూ ఇతర దేశాల మీద ఆధారపడటం మనకు ఎప్పటి నుంచో ఉన్న అలవాటు. కానీ ఇప్పుడు పరిస్థితి మారుతోంది. భారత్ ఇకపై కేవలం చమురును కొనుగోలు చేసే దేశంగా మాత్రమే మిగిలిపోదు. తన సొంత గడ్డపై, సముద్ర గర్భంలో దాగి ఉన్న ఇంధన నిధులను వెలికి తీసేందుకు ఒక భారీ ప్లాన్ సిద్ధం చేసింది.

India and Iran Issue : అండమాన్ ఇంధన సామ్రాజ్యం

అండమాన్ నికోబార్ దీవుల చుట్టూ జరుగుతున్న ఈ మార్పులు ఇప్పుడు ప్రపంచ దేశాలను ఆశ్చర్యానికి గురి చేస్తున్నాయి. ఒకప్పుడు మన దగ్గర తగినంత చమురు లేదని, మనం ఎప్పటికీ ఇతర దేశాల మీద ఆధారపడాలని అందరూ అనుకునేవారు. కానీ ఆ అపోహను బద్దలు కొడుతూ ఓఎన్జసి సంస్థ రంగంలోకి దిగింది. మన సముద్ర తీరాల వెంబడి ఎక్కడెక్కడ చమురు నిల్వలు ఉన్నాయో వాటన్నింటినీ వెలికి తీసేందుకు ప్రభుత్వం అనుమతులు ఇచ్చింది. ముఖ్యంగా సముద్రం లోపల మూడు కిలోమీటర్ల కంటే ఎక్కువ లోతుకు వెళ్లి డ్రిల్లింగ్ చేసే అల్ట్రా డీప్ వాటర్ టెక్నాలజీని వాడుతున్నారు. దీనికోసం దాదాపు లక్షా డెబ్బై వేల కోట్ల రూపాయల భారీ పెట్టుబడి పెట్టబోతున్నారు. ప్రపంచంలోని దిగ్గజ కంపెనీలు కూడా మనతో కలిసి పనిచేయడానికి ముందుకు వస్తున్నాయి.

గతంలో భద్రతా కారణాల వల్ల అండమాన్ ప్రాంతంలో ఇలాంటి పనులు చేయడానికి అనుమతులు ఉండేవి కావు. కానీ దేశ ప్రయోజనాల కోసం ఇప్పుడు ఆ ఆంక్షలను సడలించారు. ఈ ప్రాంతంలో భారీగా మిథేన్ గ్యాస్ నిల్వలు ఉన్నట్లు సర్వేల్లో తేలింది. ఈ మిషన్ గనుక పూర్తిగా సక్సెస్ అయితే వచ్చే డెబ్బై ఏళ్ల పాటు మనం ఏ దేశం ముందు చేయి చాపాల్సిన అవసరం ఉండదు. ప్రతి సంవత్సరం చమురు దిగుమతుల కోసం మనం ఖర్చు చేసే లక్షల కోట్లు మనకే మిగిలిపోతాయి. ఇది కేవలం డబ్బుకు సంబంధించిన విషయం మాత్రమే కాదు, దీనివల్ల భారత్ ఒక శక్తివంతమైన ఎనర్జీ లీడర్ గా మారుతుంది. చైనా లాంటి దేశాలు సముద్ర మార్గాల్లో ఇబ్బందులు సృష్టించకుండా అండమాన్ లోని మన బేస్ ఒక రక్షణ కవచంలా పనిచేస్తుంది. 2035 నాటికి భారీ స్థాయిలో హైడ్రోకార్బన్ ఉత్పత్తి చేయాలనే లక్ష్యంతో భారత్ వేగంగా ముందుకు వెళ్తోంది. ఇంధన రంగంలో మనం సాధించబోయే ఈ విజయం రేపటి తరాలకు గొప్ప బహుమతి అవుతుంది.