TVK Vijay Tamilnadu : తమిళనాడు రాజకీయాల్లో ఇప్పుడు అంతా విజయ్ మాయ నడుస్తోంది. తన సొంత పార్టీ తమిళగ వెట్రి కళగం పేరుతో ఆయన పొలిటికల్ ఎంట్రీ ఇచ్చినప్పటి నుంచి భారీ ఎత్తున అంచనాలు పెరిగిపోయాయి. విక్రవాండిలో జరిగిన పార్టీ మొదటి బహిరంగ సభకు లక్షలాది మంది తరలిరావడంతో విజయ్ క్రేజ్ ఏంటో అందరికీ అర్థమైంది. అయితే బయటకు కనిపిస్తున్న ఈ భారీ ఫాలోయింగ్ వేరు పార్టీ లోపల అసలు పరిస్థితి వేరు అనే టాక్ ఇప్పుడు గట్టిగా వినిపిస్తోంది. వచ్చే అసెంబ్లీ ఎన్నికల్లో 234 స్థానాల్లో పోటీ చేస్తామని విజయ్ ప్రకటించినప్పటికీ దానికి తగ్గట్టుగా సరైన అభ్యర్థులు దొరకకపోవడం ఇప్పుడు పార్టీకి పెద్ద తలనొప్పిగా మారింది.

TVK Vijay Tamilnadu : నమ్మకస్తుల కోసం వెతుకులాట

సాధారణంగా ఒక స్టార్ హీరో పార్టీ పెడితే టికెట్ల కోసం వేల సంఖ్యలో దరఖాస్తులు వస్తాయి. కానీ విజయ్ విషయంలో పరిస్థితి భిన్నంగా ఉంది. అభిమానులు భారీగా ఉన్నప్పటికీ ఎన్నికల బరిలో నిలబడి గట్టి పోటీ ఇవ్వగల నేతలు పార్టీలో కనిపించడం లేదు. కేవలం ఫ్యాన్స్ అసోసియేషన్ సభ్యులనే నమ్ముకుని ఎన్నికలకు వెళ్తే ఫలితాలు తారుమారయ్యే ప్రమాదం ఉంది. అందుకే విజయ్ ఇతర పార్టీల్లోని అసంతృప్త నేతలను సీనియర్లను ఆహ్వానిస్తున్నట్లు తెలుస్తోంది. ఇప్పటికే ఉన్న రాజకీయ నాయకులు విజయ్ పార్టీ వైపు చూడటానికి వెనుకాడటం ఆశ్చర్యం కలిగిస్తోంది. దీంతో అభ్యర్థుల ఎంపిక ప్రక్రియ విజయ్ కి ఒక పెద్ద సవాలుగా మారింది.

ఒకవైపు అధికార డీఎంకే బలంగా ఉండటం మరోవైపు ఏఐఏడీఎంకే వంటి పార్టీలు తమ ఉనికిని కాపాడుకోవడానికి ప్రయత్నిస్తుండటంతో కొత్తగా వచ్చిన టీవీకే కు అభ్యర్థులు దొరకడం గగనమైపోతోంది. కొందరు నేతలకు టికెట్ ఇస్తామని అడిగినా వారు పోటీకి అంతగా ఆసక్తి చూపడం లేదని సమాచారం. ఈ పరిస్థితి చూస్తుంటే విజయ్ తన అభ్యర్థులను వెతుక్కునే క్రమంలో దండం పెట్టి బతిమాలాడాల్సిన పరిస్థితి ఏర్పడిందా అనే గుసగుసలు వినిపిస్తున్నాయి. అభ్యర్థుల కొరత వల్ల పార్టీ బలహీనపడే అవకాశం ఉందని విశ్లేషకులు భావిస్తున్నారు. ఈ కష్టాలను దాటుకుని విజయ్ తన సైన్యాన్ని ఎలా సిద్ధం చేస్తారో వేచి చూడాలి. సరైన అభ్యర్థులు లేకుండా కేవలం ఇమేజ్ తోనే ఎన్నికల యుద్ధం గెలవడం అంత సులభం కాదు. 2026 ఎన్నికల నాటికి ఈ సమస్యను విజయ్ ఎలా పరిష్కరిస్తారో అన్నది ఇప్పుడు కోలీవుడ్ నుంచి పొలిటికల్ సర్కిల్స్ వరకు హాట్ టాపిక్ గా మారింది.