Anil Ravipudi : అప్పుడే 2027 సంక్రాంతి కాంబో ను సెట్ చేసిన అనిల్ రావిపూడి
టాలీవుడ్ బాక్సాఫీస్ వద్ద ‘సక్సెస్’ అనే పదానికి పర్యాయపదంగా మారారు దర్శకుడు అనిల్ రావిపూడి. అపజయమెరుగని దర్శకుడిగా పదేళ్ల ప్రస్థానాన్ని పూర్తి చేసుకున్న ఆయన, ఇప్పుడు విక్టరీ వెంకటేష్తో కలిసి హ్యాట్రిక్ తర్వాత మరో క్రేజీ ప్రాజెక్టుకు శ్రీకారం చుట్టడం ఇండస్ట్రీలో హాట్ టాపిక్గా మారింది.
అనిల్ రావిపూడికి సంక్రాంతి సీజన్ అనేది కేవలం పండగ మాత్రమే కాదు, అది ఆయన విజయాల అడ్డా. 2019లో వచ్చిన ‘F2’ నుంచి మొదలుకొని, ఇటీవలి ‘మన శంకరవరప్రసాద్ గారు’ వరకు ఆయన ప్రతీ ఏటా సంక్రాంతి విజేతగా నిలుస్తున్నారు. కమర్షియల్ ఎలిమెంట్స్కు స్వచ్ఛమైన వినోదాన్ని జోడించి, కుటుంబం అంతా థియేటర్లకు వచ్చేలా చేయడం అనిల్ ప్రత్యేక శైలి. పదికి పది విజయాలు అందుకోవాలనే పట్టుదలతో ఉన్న అనిల్, తన సక్సెస్ ఫుల్ హీరో వెంకటేష్తో కలిసి 2027 సంక్రాంతిని ఇప్పుడే బుక్ చేసుకోవడం ఆయన ఆత్మవిశ్వాసానికి నిదర్శనం.
Anil Ravipudi : అప్పుడే 2027 సంక్రాంతి కాంబో ను సెట్ చేసిన అనిల్ రావిపూడి
వెంకీ – అనిల్ మళ్లీ వస్తున్నారు..అంతేగా అంతేగా !!
విక్టరీ వెంకటేష్ మరియు అనిల్ రావిపూడి కలయికలో వచ్చిన చిత్రాలన్నీ బాక్సాఫీస్ వద్ద కాసుల వర్షం కురిపించినవే. ముఖ్యంగా గతేడాది విడుదలైన ‘సంక్రాంతికి వస్తున్నాం’ చిత్రం సుమారు ₹300 కోట్లకు పైగా గ్రాస్ వసూలు చేసి వెంకీ కెరీర్లోనే బిగ్గెస్ట్ హిట్గా నిలిచింది. ఇందులో వెంకటేష్ పోలీస్ ఆఫీసర్ పాత్రలో చేసిన కామెడీ, మేనరిజమ్స్ ప్రేక్షకులను విశేషంగా ఆకట్టుకున్నాయి. ఇప్పుడు వీరిద్దరి కాంబోలో రాబోయే కొత్త చిత్రం జూన్ నుంచి షూటింగ్ ప్రారంభం కానుందని, సాహు గారపాటి దీనిని భారీ బడ్జెట్తో నిర్మించనున్నారని తెలుస్తోంది. ఈ జోడీ మళ్ళీ కలిస్తే బాక్సాఫీస్ రికార్డులు తిరగరాయడం ఖాయమని ట్రేడ్ వర్గాలు విశ్లేషిస్తున్నాయి.
మరోసారి అదే హీరోతో రాబోతున్న అనిల్ రావిపూడి
ప్రస్తుతం వెంకటేష్ ఫుల్ బిజీ గా ఉన్నారు. ఒకవైపు త్రివిక్రమ్ శ్రీనివాస్ దర్శకత్వంలో ‘ఆదర్శ కుటుంబం – హౌస్ నెం:47’ షూటింగ్లో పాల్గొంటూనే, మరోవైపు ‘దృశ్యం 3’ వంటి భారీ సీక్వెల్ను లైన్లో పెట్టారు. ఇన్ని క్రేజీ ప్రాజెక్టుల మధ్య అనిల్ రావిపూడి కథకు గ్రీన్ సిగ్నల్ ఇచ్చారంటే, ఆ స్క్రిప్ట్లో వినోదం ఏ రేంజ్లో ఉంటుందో ఊహించుకోవచ్చు. ‘మన శంకరవరప్రసాద్ గారు’లో వెంకీ చేసిన క్యామియో రోల్ ఇచ్చిన కిక్ తర్వాత, ఇప్పుడు పూర్తి స్థాయి పాత్రలో అనిల్ దర్శకత్వంలో ఆయన కనిపించనుండటం మెగా, విక్టరీ అభిమానులకు పండగ లాంటి వార్తే.