సినిమా రంగంలో పాత సూపర్ హిట్ చిత్రాల టైటిళ్లను మళ్ళీ వాడుకోవడం ఒక ఆనవాయితీగా వస్తోంది. సాధారణంగా ఒక సినిమా టైటిల్‌ను పదేళ్ల తర్వాత మరో చిత్రం కోసం వాడుకునే వీలుంటుంది. అయితే ‘మాయాబజార్’, ‘మరో చరిత్ర’ వంటి ఐకానిక్ టైటిళ్లను రీమేక్ చేసినప్పుడు లేదా తిరిగి వాడినప్పుడు ఆశించిన స్థాయిలో ఫలితాలు రాకపోయేసరికి, లెజెండరీ సినిమాల పరువు తీశారనే విమర్శలు ఎదుర్కోవాల్సి వచ్చింది. తాజాగా నందమూరి బాలకృష్ణ కెరీర్‌లో క్లాసిక్ ఫ్యామిలీ ఎంటర్‌టైనర్‌గా నిలిచిన ‘నారీ నారీ నడుమ మురారి’ టైటిల్‌ను యంగ్ హీరో శర్వానంద్ తన కొత్త సినిమా కోసం ఉపయోగించుకున్నారు. బాలయ్య మాస్ ఇమేజ్‌కు భిన్నంగా వచ్చిన ఆ సినిమా అప్పట్లో పెద్ద విజయం సాధించడమే కాకుండా, అందులోని పాటలు కూడా ఇప్పటికీ శ్రోతలను అలరిస్తుంటాయి.

సంక్రాంతి కానుకగా విడుదలైన శర్వానంద్ ‘నారీ నారీ నడుమ మురారి’ చిత్రం బాక్సాఫీస్ వద్ద అనూహ్య విజయాన్ని అందుకుంది. పెద్దగా ప్రచార హడావుడి లేకుండా, పోటీలో కాస్త ఆలస్యంగా వచ్చినప్పటికీ, పాజిటివ్ టాక్‌తో ఈ సినిమా సూపర్ హిట్ దిశగా దూసుకుపోతోంది. శర్వానంద్‌కు ఇది చాలా కాలం తర్వాత దక్కిన విజయమే కాకుండా, సంక్రాంతి సీజన్‌లో ఆయనకు హ్యాట్రిక్ విజయాన్ని అందించింది. సినిమాలో ఒకటి. ఇద్దరు హీరోయిన్ల (సంయుక్త, సాక్షి వైద్య) మధ్య హీరో పడే ఇబ్బందులను దర్శకుడు రామ్ అబ్బరాజు వినోదాత్మకంగా మలిచారు. టైటిల్‌కు పూర్తి న్యాయం చేసేలా కథాంశం ఉండటంతో ప్రేక్షకులు ఈ చిత్రాన్ని ఆదరిస్తున్నారు.

ఈ సినిమా విజయంపై అసలు ‘మురారి’ అయిన బాలకృష్ణ కూడా స్పందించడం విశేషం. ఈ సినిమా టైటిల్ వాడుకోవడానికి ముందే శర్వానంద్ స్వయంగా బాలయ్య అనుమతి కోరగా, ఆయన సంతోషంగా అంగీకరించారు. సినిమా విడుదలయ్యాక, శర్వానంద్‌కు ఫోన్ చేసిన బాలయ్య “నా పరువు నిలబెట్టావు శర్వా” అంటూ అభినందించినట్లు చిత్ర బృందం వెల్లడించింది. ఐకానిక్ టైటిళ్లను వాడుకున్నప్పుడు వాటి గౌరవాన్ని కాపాడటం ఎంత ముఖ్యమో శర్వానంద్ నిరూపించారు. బాలయ్య వంటి అగ్ర హీరో ఒక యంగ్ హీరోను ఇలా ప్రోత్సహించడం టాలీవుడ్‌లో ఒక ఆరోగ్యకరమైన వాతావరణానికి నిదర్శనంగా నిలుస్తోంది.