Electricity : తెలుగు రాష్ట్రాల్లోని విద్యుత్ వినియోగదారులకు ఆంధ్రప్రదేశ్ మరియు తెలంగాణ ప్రభుత్వాలు కీలకమైన ఊరటనిచ్చే వార్తలు అందించాయి. ఆంధ్రప్రదేశ్ ముఖ్యమంత్రి నారా చంద్రబాబు నాయుడు గారు విద్యుత్ ఛార్జీల తగ్గింపుపై స్పష్టమైన ప్రణాళికను ప్రకటించారు. కూటమి ప్రభుత్వం అధికారంలోకి వచ్చే నాటికి యూనిట్ విద్యుత్ ధర రూ. 5.19 ఉండగా, దానిని ఇప్పటికే రూ. 4.90 కి తగ్గించామని ఆయన వెల్లడించారు. వచ్చే మార్చి నాటికి మరో 10 పైసలు, రాబోయే మూడేళ్లలో మొత్తంగా రూ. 1.19 తగ్గించి, యూనిట్ విద్యుత్‌ను కేవలం రూ. 4 లకే సామాన్యులకు అందుబాటులోకి తీసుకురావడమే తమ లక్ష్యమని సీఎం స్పష్టం చేశారు.

ఏపీ ప్రభుత్వం తీసుకున్న మరో సాహసోపేతమైన నిర్ణయం ఏంటంటే.. గత వైసీపీ ప్రభుత్వం హయాంలో (2019-24) పేరుకుపోయిన రూ. 4,498 కోట్ల ట్రూ అప్ ఛార్జీల భారాన్ని ప్రజలపై వేయకుండా, ఆ మొత్తాన్ని ప్రభుత్వమే భరించాలని కేబినెట్ నిర్ణయించింది. గత ప్రభుత్వం కేవలం కమీషన్ల కోసమే గందరగోళ నిర్ణయాలు తీసుకుందని, అందుకే విద్యుత్ రంగం అస్తవ్యస్తమైందని ముఖ్యమంత్రి విమర్శించారు. ప్రభుత్వమే ఈ భారాలను భరించడం వల్ల వినియోగదారుల నెలవారీ కరెంటు బిల్లులపై అదనపు వడ్డన తగ్గే అవకాశం ఉంది.

మరోవైపు తెలంగాణలో కూడా డిప్యూటీ సీఎం మల్లు భట్టి విక్రమార్క గారు విద్యుత్ ఛార్జీల పెంపు ఉండబోదని కీలక అప్డేట్ ఇచ్చారు. విద్యుత్ పంపిణీ సంస్థలు (డిస్కంలు) తమకున్న భారీ ఆర్థిక లోటును ప్రజల నుండి వసూలు చేయకుండా, ప్రభుత్వం ద్వారానే పూడ్చుకునేలా ఏర్పాట్లు చేస్తున్నారు. టీజీఎస్‌పీడీసీఎల్ (రూ. 9,583 కోట్లు) మరియు టీజీఎన్‌పీడీసీఎల్ (రూ. 12,521 కోట్లు) తమ లోటు నివేదికలను సవరించాయి. ఈ నివేదికలపై జనవరి 31 వరకు ప్రజా అభిప్రాయాలను సేకరించి, మార్చి మొదటి వారంలో బహిరంగ విచారణ జరిపిన అనంతరం కొత్త టారిఫ్ ఆర్డర్‌ను జారీ చేయనున్నారు. రెండు రాష్ట్రాల్లోనూ ప్రభుత్వాలు విద్యుత్ భారాలను తామే భరించాలని నిర్ణయించడం సామాన్యులకు పెద్ద ఊరట.