AP New Ration Cards : ఏపీలో ముందుగా కొత్త రేషన్ కార్డులు పంచేది ఆ జిల్లాలోనే !!
Authored By Sudheer Ramanujam
| The Telugu News |
Published on: August 22, 2025, 8:00 pm
New Ration Cards : ఆంధ్రప్రదేశ్ రాష్ట్రంలో కొత్త రేషన్ కార్డుల కోసం ఎదురుచూస్తున్న కుటుంబాలకు ప్రభుత్వం శుభవార్త అందించింది. ఈ నెల 25వ తేదీ నుంచి రాష్ట్రంలో స్మార్ట్ రేషన్ కార్డుల జారీ ప్రక్రియ ప్రారంభం కానుంది. ఇంతకు ముందు ప్రకటించినట్లుగానే, ఒకేసారి కాకుండా జిల్లాల వారీగా దశలవారీగా ఈ కార్డుల జారీ జరగనుంది. దీంతో రేషన్ పొందే హక్కుదారులకు ఎలాంటి ఇబ్బందులు తలెత్తకుండా, ప్రక్రియ సాఫీగా సాగుతుందని అధికారులు తెలిపారు.
#image_title
ప్రభుత్వం విడుదల చేసిన షెడ్యూల్ ప్రకారం, మొదటి విడతలో విజయనగరం, ఎన్టీఆర్, తిరుపతి, విశాఖపట్నం, నెల్లూరు, శ్రీకాకుళం, తూర్పుగోదావరి, పశ్చిమగోదావరి, కృష్ణా జిల్లాల్లో ఈ నెల 25 నుంచి కార్డుల జారీ మొదలవుతుంది. తర్వాత ఈ నెల 30వ తేదీ నుంచి చిత్తూరు, కాకినాడ, గుంటూరు, ఏలూరు జిల్లాల్లో ప్రారంభం అవుతుంది. వచ్చే నెల 6వ తేదీ నుంచి అనంతపురం, అల్లూరి సీతారామరాజు, పార్వతీపురం మన్యం, అంబేద్కర్ కోనసీమ, అనకాపల్లి జిల్లాల్లో రేషన్ కార్డుల జారీ కొనసాగుతుంది. చివరగా వచ్చే నెల 15వ తేదీ నుంచి మిగిలిన బాపట్ల, పల్నాడు, కడప, అన్నమయ్య, సత్యసాయి, కర్నూలు, నంద్యాల, ప్రకాశం జిల్లాల్లో కార్డుల పంపిణీ పూర్తవుతుంది.
రాష్ట్రంలో కొత్త స్మార్ట్ కార్డులు ప్రవేశపెట్టడం ద్వారా రేషన్ దుర్వినియోగం తగ్గించడమే కాకుండా పారదర్శకతను పెంచడం ప్రభుత్వ లక్ష్యం. ఈ కార్డుల్లో క్యూ ఆర్ కోడ్ నిక్షిప్తం చేయబడటం వలన వాటిని డూప్లికేట్ చేయడం లేదా అక్రమాలకు వాడుకోవడం అసాధ్యం అవుతుంది. గతంలో ఈకేవైసీ పూర్తి కాకపోవడం, అనర్హుల తొలగింపు వంటి సమస్యలతో రేషన్ కార్డుల జారీ ఆలస్యమైంది. ఇప్పుడు ఆ లోపాలను సరిదిద్దుతూ కొత్త సాంకేతిక పద్ధతులతో స్మార్ట్ కార్డులను అందించడం ద్వారా అర్హులైన ప్రతి కుటుంబానికి రేషన్ ప్రయోజనాలు చేరేటట్లు చూడాలని ప్రభుత్వం నిర్ణయించింది.
Also read
