Nayani Pavani BB Jodi :  BB JODI Season 2 Telugu బుల్లితెరపై అత్యంత ఆదరణ పొందుతున్న ‘బీబీ జోడీ సీజన్-2’లో ఊహించని పరిణామాలు చోటుచేసుకుంటున్నాయి. వరుసగా రెండో వారం కూడా ఒక పాపులర్ కంటెస్టెంట్ షో నుండి తప్పుకోవడం ప్రేక్షకులను దిగ్భ్రాంతికి గురిచేస్తోంది. గత వారం వ్యక్తిగత కారణాలతో కీర్తి భట్ ఎగ్జిట్ అవ్వగా, తాజా ఎపిసోడ్‌లో నాయని పావని కూడా షోను అర్ధాంతరంగా వీడుతున్నట్లు ప్రకటించింది. ‘ఐ’ సినిమాలోని ఎమోషనల్ సాంగ్‌కు నాయని మరియు ఆమె పార్ట్నర్ సాయి శ్రీనివాస్ అద్భుతమైన ప్రదర్శన ఇచ్చి జడ్జీల మనసు గెలుచుకున్నప్పటికీ, అదే సమయంలో ఆమె తన నిష్క్రమణ వార్తను చెప్పడం అందరినీ అవాక్కయ్యేలా చేసింది.

నాయని పావని తన డ్యాన్స్‌తో జడ్జీలను ఏడిపించేంత గొప్ప పెర్ఫామెన్స్ ఇచ్చింది. సాయి శ్రీనివాస్ నటనకు సదా ఎమోషనల్ అవ్వగా, శ్రీదేవి స్వయంగా స్టేజ్ పైకి వచ్చి నాయనిని హగ్ చేసుకుని ‘గోల్డెన్ ఫ్లవర్’ ఇచ్చి ప్రశంసించారు. ఇంతటి ఘనమైన ‘కమ్ బ్యాక్’ ఇచ్చిన తర్వాత కూడా ఆమె తప్పుకోవడం వెనుక అసలు కారణం ఏంటని శేఖర్ మాస్టర్ ఆరా తీశారు. అయితే, నాయని స్పష్టమైన కారణం చెప్పకుండా.. “నేను చాలా ట్రై చేశాను, కానీ నా వల్ల కావట్లేదు” అంటూ కన్నీళ్లు పెట్టుకుంది. ఆమె పర్సనల్ లైఫ్‌లో ఎదురవుతున్న కొన్ని అనివార్య కారణాల వల్లే ఈ నిర్ణయం తీసుకున్నట్లు యాంకర్ ప్రదీప్ స్పష్టం చేశారు.

బీబీ జోడీ నియమాల ప్రకారం ఇది ‘జోడీ’ కాబట్టి, నాయని పావని తప్పుకోవడంతో ఆమె పార్ట్నర్ సాయి శ్రీనివాస్ కూడా అనివార్యంగా షో నుండి నిష్క్రమించాల్సి వచ్చింది. అద్భుతంగా డ్యాన్స్ చేస్తున్న సాయికి ఇది ఒక రకంగా చేదు వార్తే అయినప్పటికీ, రూల్స్ ప్రకారం ఇద్దరి జర్నీ ఈ ఎపిసోడ్‌తో ముగిసింది. ఒకవైపు అద్భుతమైన ప్రదర్శనతో జడ్జీల ప్రశంసలు అందుకుంటూనే, మరోవైపు కన్నీళ్లతో షోకు వీడ్కోలు పలకడం సెట్‌లో అందరినీ కలిచివేసింది. నాయని నిష్క్రమణ వెనుక ఉన్న ఆ రహస్య కారణం ఏమిటనే దానిపై సోషల్ మీడియాలో ఇప్పుడు పెద్ద ఎత్తున చర్చ జరుగుతోంది.