Thalliki Vandanam  : ఆంధ్రప్రదేశ్ ప్రభుత్వం “తల్లికి వందనం” పథకానికి సంబదించిన నిధులను విడుదల చేసింది. ఈ పథకం కింద రాష్ట్రంలోని 1వ తరగతి నుంచి 12వ తరగతి వరకు చదువుతున్న ప్రతి విద్యార్థికి రూ.15,000 నేరుగా వారి తల్లుల ఖాతాల్లో జమ చేయనుంది. ఈ పథకం ద్వారా తల్లుల పాత్రను గుర్తించి విద్యలో వారి భాగస్వామ్యాన్ని మెరుగుపరచడమే ప్రభుత్వ లక్ష్యంగా ఉంది. విద్యార్థులు పాఠశాలకు తరచుగా హాజరయ్యేలా చేయడంతోపాటు, తల్లులు విద్యపై మరింత దృష్టి పెట్టేందుకు ఈ ఆర్థిక ప్రోత్సాహం దోహదపడనుంది.

ఇక పాఠశాలల నిర్వహణ కోసం రాష్ట్ర ప్రభుత్వం మరో కీలక నిర్ణయం తెరతీసింది. ప్రతి విద్యార్థికి సంబంధించి పాఠశాల మెయింటెనెన్స్ కోసం సంబంధిత జిల్లా కలెక్టర్ ఖాతాకు రూ.2,000 జమ చేయనున్నట్టు ప్రకటించింది. ఈ నిధులను శుభ్రత, మౌలిక వసతులు, చిన్న మరమ్మత్తుల వంటి అవసరాలకు వినియోగించవచ్చు. పాఠశాలల పరిశుభ్రతను మెరుగుపరచడం, విద్యార్థులకు మంచి వాతావరణాన్ని కల్పించడం ద్వారా విద్యా ప్రమాణాలను పెంచే దిశగా ఈ చర్య ప్రభావం చూపనుంది.

“తల్లికి వందనం” పథకం ఇప్పటికే గత సంవత్సరాల్లో మంచి ఫలితాలను అందించిన నేపథ్యంలో, 2025-26లో మరింత పటిష్టంగా అమలయ్యేందుకు ప్రభుత్వం ముందంజ వేసింది. ఈ పథకం వల్ల తల్లుల ఆర్థిక భద్రత పెరగడమే కాదు, విద్యార్థుల చదువుపై కుటుంబాల దృష్టి మరింతగా పెరుగుతుంది. తల్లులను విద్యాభివృద్ధిలో భాగస్వాములుగా మార్చే ఈ కార్యక్రమం రాష్ట్రానికి ఒక మార్గదర్శకంగా నిలవనుంది.